قانداسىمىز قىتايدا دومبىرانى دارىپتەپ ءجۇر

نۇر-سۇلتان. قازاقپارات - ەكى ىشەكتىڭ ءبىرىن قاتتى، ءبىرىن ءسال- ءپال كەم بۇرا. ناعىز قازاق - قازاق ەمەس، ناعىز قازاق - دومبىرا. قىتايداعى قانداسىمىز مۇرال بيمۇرات بەيجىڭدەگى ۋنيۆەرسيەتتە ساباق بەرەدى.

العاشقى دومبىراسىن قولىنا 4 جاسىندا العان ول، قازاقتىڭ كيەلى اسپابىن سول كەزدەن باستاپ دارىپتەۋمەن كەلەدى. مۇرال قىتايدىڭ شىڭجاڭ- ۇيعىر اۆتونومدى ايماعىنداعى ءۇرىمجى قالاسىندا تۋىپ- وسكەن. اكەسىنىڭ دوس- جاراندارى قوناققا كەلىپ، قارا دومبىرادا ءان- كۇي توككەن ءسات بالا مۇرالعا قاتتى اسەر ەتەدى. العاشقى دومبىراسىن قولىنا 4 جاسىندا العان. وقۋىن اياقتاعاننان كەيىن ول بەيجىڭدە دومبىرا مەكتەبى اشىلعانىن ەستىپ، بىردەن قۇجاتتارىن وتكىزەدى. وسىلايشا جاس تالانتتىڭ ۇلكەن مۋزىكالىق ءومىرى باستالادى. جاس جىگىتتىڭ تاڭداۋىن اتا- اناسى بىردەن قولداي قويماعانىمەن مۇرال ايتقان بەتىنەن قايتپايدى. جوعارعى وقۋ ورنىن اياقتاعان سوڭ شىعارماشىلىق توپپەن قازاقستانعا كەلەدى. ءبىراق قاتتى تولقىعان جاس ءانىن ناقىشىنا كەلتىرە الماي قالادى. اقىرى جاس ورەن تاريحي وتانىندا ءبىلىم الىپ، شەبەرلىگىن شىڭداۋعا بەل بۋادى.

مۇرال بيمۇرات، قىتاي ۇلتتارى ورتالىق ۋنيۆەرسيتەتىنىڭ وقىتۋشىسى:

- اقىرىنداپ ءبىر- ەكى جىل قىزمەت ىستەگەننەن كەيىن وسى پەكيندەگى قىزمەتىمدى تاستاپ، قازاقستان ەلىندەگى ەڭ جوعارعى دەڭگەيدەگى وقۋ ورداسى كونسەرۆاتورياعا ءتۇسىپ، ءبىلىمدى اسىردىم. ماگيستراتۋرادا وقۋ جاس ماماننىڭ ءبىلىمىن جۇيەلەندىرۋگە كوپ كومەكتەسەدى.

ءبىراق الماتىداعى ستۋدەنتتىك ءومىر قيىندىقسىز بولماعانىن ايتادى.

مۇرال بيمۇرات، قىتاي ۇلتتارى ورتالىق ۋنيۆەرسيتەتىنىڭ وقىتۋشىسى:

- ماگيستراتۋرعا تۇسكەننەن باستاپ، بارلىق ساباقتى قازاقشا وقىدىم. سوندا ءبىرىنشى ساباعىم فيلوسوفيادان باستالعان عوي. وتە قيىن. ءمۇعالىم وتىر، ءبىر كىتاپتى وقىپ جاتىر. سوسىن مەن داپتەرگە جازىپ وتىرمىن، جەتە الماي قالامىن، ايتقان ءسوزىن دۇرىس قابىلداي الماي قالامىن دەگەن سياقتى. ءسويتىپ، سونداي كوپ قيىنشىلىق بولعان. مىسالى، تاعى اسحاناعا بارىپ، تاماق ىشكەندە تاماقتىڭ اتاۋىن بىلمەيمىن. سودان كەيىن تاكسي شوفەرىمەن سويلەسە المايمىن دەگەن سياقتى. ارتىنان اقىرىنداپ ءبارىن ۇيرەنىپ، ءبىر- ەكى جىل وتكەننەن كەيىن ول تۇرمىسقا دا ۇيرەنىپ قالدىم.

قازىر مۇرال بەيجىڭدەگى ءوزى وقىعان ۋنيۆەرسيتەتتە ساباق بەرىپ، ستۋدەنتتەرىن قازاق كونسەرۆتورياسىندا العان بىلىمىمەن سۋسىنداتىپ كەلەدى. سونىمەن قاتار شاعىن توپتا وينايدى. ونىڭ جاڭا باعىتىنا دجاز جانە روك- مۋزىكامەن اۋەستىگى ىقپال ەتكەن. قازىرگى قازاقستاندىق انشىلەردى تىڭداعاندى ۇناتادى.

مۇرال بيمۇرات، قىتاي ۇلتتارى ورتالىق ۋنيۆەرسيتەتىنىڭ وقىتۋشىسى:

- ول گرۋپپا اتاۋى حايا. «حايا» دەگەن موڭعول تىلىندە شەت دەگەن ءسوز. مىسالى، اسپاننىڭ شەتى، اسپاندا شەت دەگەن نارسە بولمايدى، ءبىراق كوزگە كورىنگەن شەت. از ۇلتتاردىڭ مادەنيەتىن وسى ەلگە تانىستىرىپ، شەتەلگە تانىستىرۋ ماقساتىمەن قۇرعان. ەندى مەن ءوز باسىم 2015 -جىلى وسى گرۋپپاعا قاتىسقانمىن. ەندى وسى گرۋپپادا دومبىرا مەن گيتارادا وينايمىن.

مۇرال مۋزىكالىق شىعارماشىلىق توپپەن بىرگە وزگە دە ءتۇرلى جوبالارعا قاتىسادى. قانداسىمىز اسپاپتاردا ويناپ قويماي ءان دە شىعارادى. ءبىر البومى جارىق كورىپ، ەندى ەكىنشىسىن دايىنداپ جاتىر. ارمانى ۇجىمىمەن قازاقستاندا ونەر كورسەتۋ.

اۆتور: بوتاگوز سىرعابايەۆا

www.24.kz