ماجىلىستە ءولىم جازاسىن جويۋعا قاتىستى قۇجات ماقۇلداندى

نۇر-سۇلتان. قازاقپارات - پارلامەنت ءماجىلىسىنىڭ جالپى وتىرىسىندا «ءولىم جازاسىنىڭ كۇشىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىگە ەكىنشى فاكۋلتاتيۆتىك حاتتامانى راتيفيكاتسيالاۋ تۋرالى» زاڭ جوباسى ماقۇلداندى، دەپ حابارلايدى قازاقپارات ءتىلشىسى.

ق ر سىرتقى ىستەر ءمينيسترى مۇحتار تىلەۋبەردى قازاقستان رەسپۋبليكاسىنىڭ زاڭناماسىنا سايكەس ەكىنشى فاكۋلتاتيۆتىك حاتتامانىڭ ق ر پارلامەنتى تاراپىنان مىندەتتى راتيفيكاتسيالاۋعا جاتاتىنىن اتاپ ءوتتى.

«وسى حالىقارالىق قۇجاتقا سايكەس، قول قويۋشى ەلدەر ءولىم جازاسىن قولدانباۋ، ءوز يۋريسديكسياسى اياسىندا ءولىم جازاسىنىڭ كۇشىن جويۋ ءۇشىن بارلىق قاجەتتى شارالاردى ورىنداۋ مىندەتتەمەسىن قابىلدايدى، - دەدى مينيستر. ونىڭ ايتۋىنشا، قازاقستان كونۆەنسيامەن قاراستىرىلعان ءولىم جازاسىن قولدانۋدى كوزدەيتىن جالعىز ەسكەرتپە جاساۋ مۇمكىندىگىن پايدالانۋعا نيەتتى. ياعني، قازاقستان ەكىنشى فاكۋلتاتيۆتىك حاتتامانىڭ 2-بابىنا سايكەس، سوعىس ۋاقىتىندا جاسالعان اسكەري اسا اۋىر سيپاتتاعى قىلمىستار ءۇشىن كىنالى دەپ تانىلعاننان كەيىن، سوعىس ۋاقىتىندا ءولىم جازاسىن قولدانۋ قۇقىعىن وزىنە قالدىرادى.

«ءولىم جازاسىن الىپ تاستاۋ ماسەلەسى تەك زاڭدى عانا ەمەس، سونىمەن بىرگە ءمورالدى- ەتيكالىق ولشەمگە يە ەكەنىن تۇسىنەمىز. وسى ماسەلەنىڭ سەزىمتالدىعىن ەسكەرە وتىرىپ، ۇكىمەت رەگلامەنتىنە ساي قازاقستاندىق قوعامنىڭ پىكىرىن زەردەلەۋدى ەسكەرە وتىرىپ، كەلىسۋدىڭ بارلىق قاجەتتى راسىمدەرى جۇزەگە اسىرىلدى. 2003 -جىلى ءولىم جازاسىن قولدانۋعا موراتوري ەنگىزىلگەننەن كەيىن، ءبىزدىڭ ەلدە جوعارى جازا شاراسىن قولدانباۋىنىڭ تۇراقتى قۇقىقتىق رەجيمى قالىپتاسقانىن اتاپ وتكىم كەلەدى. بۇل قادام ەلىمىزدىڭ حالىقارالىق ارەناداعى بەدەلىن ارتتىراتىنىنا كامىل سەنەمىز»، - دەدى مۇحتار تىلەۋبەردى.

ەسكە سالايىق، 23-قىركۇيەكتە بىرىككەن ۇلتتار ۇيىمىنىڭ شتاب- پاتەرىندە قازاقستاننىڭ ب ۇ ۇ جانىنداعى تۇراقتى وكىلى قايرات وماروۆ ءولىم جازاسىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىنىڭ ەكىنشى فاكۋلتاتيۆتىك حاتتاماسىنا قول قويدى.

سول كۇنى ءولىم جازاسىن جويۋ تۋرالى حالىقارالىق حاتتاماعا قوسىلۋ تۋرالى شەشىمدى قازاقستان پرەزيدەنتى قاسىم- جومارت توقايەۆ ب ۇ ۇ باس اسسامبلەياسىنىڭ 75- مەرەيتويلىق سەسسياسىنىڭ جالپى ساياسي پىكىرتالاس باراسىندا سويلەگەن سوزىندە جاريالادى. كەيىننەن ق ر سىرتقى ىستەر مينيسترلىگىنىڭ باسپا ءسوز قىزمەتى قازاقستاننىڭ اتالمىش حالىقارالىق پاكتىگە قوسىلۋىنا قاتىستى تۇسىنىكتەمە بەردى.

اۆتور: رۋسلان عابباسوۆ