قازاقستاندا كوروناۆيرۋسقا قارسى ۆاكسينا الدىمەن كىمدەرگە ەگىلەدى
قاراعاندىداعى فارماتسيەۆتيكالىق كەشەن كوروناۆيرۋسقا قارسى رەسەيلىك «سپۋتنيك V « ۆاكسيناسىن شىعاراتىن نەگىزگى الاڭ رەتىندە ىرىكتەپ الىنعان بولاتىن. قازىردىڭ وزىندە زاۋىتتان شىعارىلعان 6 مىڭ دوزا «سپۋتنيك V « ۆاكسيناسىنىڭ تاجىريبەلىك پارتياسى ساپاسىن تەكسەرۋ ءۇشىن رەسەيگە جىبەرىلدى. جالپى، اتالعان كاسىپورىن اقپان ايىندا مۇنداي ۆاكسينانىڭ - 80 مىڭ، ناۋرىزدا - 150 مىڭ، ال ودان كەيىن اي سايىن 600 مىڭ دوزاسىن شىعارۋدى جوسپارلاپ وتىر. قازاقستاندا حالىقتى جاپپاي ۆاكسيناتسيالاۋ جۇمىسى 2021 -جىلدىڭ اقپان ايىنا جوسپارلانعان.
«ۆاكسينا قازاقستانداعى بۇكىل مەديتسينالىق مەكەمەگە جەتكىزىلەتىن بولادى. ەڭ الدىمەن ەرىكتى نەگىزدە مەديتسينا قىزمەتكەرلەرى، پەداگوگتەر، ستۋدەنتتەر، قۇقىق قورعاۋ ورگاندارىنىڭ، مەديتسينالىق- الەۋمەتتىك مەكەمەلەردىڭ قىزمەتكەرلەرى، سونىمەن قاتار سوزىلمالى اۋرۋلارى بار تاۋەكەل توپقا كىرەتىن ادامدار تەگىن ەكپە الادى»، - دەدى ق ر دەنساۋلىق ساقتاۋ مينيسترلىگىنىڭ مەديتسينالىق جانە فارماتسيەۆتيكالىق باقىلاۋ كوميتەتى ءتوراعاسىنىڭ ورىنباسارى نۇرلىبەك اسىلبەكوۆ.
ونىڭ اتاپ وتۋىنشە، ازىرشە، ۆاكسينانىڭ ناقتى قۇنى ايقىندالعان جوق. ەسكە سالساق، كەشە ق ر پرەمەر- ءمينيسترى اسقار مامين قاراعاندى فارماتسيەۆتيكالىق كەشەنىنە بارىپ، «سپۋتنيك V « ۆاكسيناسىن ءوندىرۋدى باستاپ بەردى. الدىن الا بولجامعا سايكەس، قازاقستاندا كوروناۆيرۋسقا قارسى ۆاكسينا 65 جاستان اسقان، جۇرەك- قان تامىرى اۋرۋى، قانت ديابەتى جانە سوزىلمالى وكپە اۋرۋلارى بار تاۋەكەل توبىنا كىرەتىن ادامدارعا جانە مەديتسينا قىزمەتكەرلەرىنە سالىناتىن بولادى. ۆاكسينا الاتىنداردىڭ بولجامدى سانى 2347000 ادامدى قۇرايدى.
اۆتور: مارلان جيەمباي