قازاق قىزى كورەيا ساحناسىن باعىندىرۋدا

نۇر-سۇلتان. قازاقپارات - وڭتۇستىك كورەيانىڭ ۇلكەن ساحناسىندا العاش رەت قازاق ارۋى ونەر كورسەتتى. جيىرما جاستاعى ايعانىم جالينوۆا بىرنەشە تىلدە ەركىن سويلەيدى. ول ءوز تالانتىمەن بۇكىل الەمگە تانىمال بولۋدى ارماندايدى.

جاقىندا ايعانىم ونەر كورسەتەتىن مۋزىكالىق توپتىڭ تۇساۋكەسەرى وتەدى. ستۋدەنت ايعانىم جالينوۆانىڭ كۇندەلىكتى تىرشىلىگى وسىلاي وتەدى. تاڭنان كەشكە دەيىن ۆوكال مەن بي ساباقتارى. جەرگىلىكتى «الفا رەي» توبىنداعى جالعىز شەتەلدىك - ايعانىم. توپ مۇشەسى اتانۋ ءۇشىن ول مىڭداعان ادام باق سىناعان كوپ ساتىلى كاستينگتەن وتكەن. كورەيادا تۇرعان ەكى جارىم جىل ىشىندە ول جەرگىلىكتى ءداستۇر مەن كورەي ءتىلىن جاقسى مەڭگەرىپ تە العان.

ايعانىم جالينوۆا، كورەي توبىنىڭ مۇشەسى:

- كورەيا ادامدارى وزدەرىنىڭ ويلارىن تىكە ايتپايدى. ۇناماسا دا ۇنادى دەپ اينالدىرىپ ايتادى. ال بىزدە تىكەلەي ايتىپ تاستايمىز عوي. سول جاعى كىشكەنە قيىن بولدى. سوسىن ايىرماشىلىعى، بىزدە قازاقستاندا 24 ساعات بويى جۇمىس جاسايتىن دۇكەندەر جوق. ال مۇندا 24 ساعات جاسايتىن دۇكەندەر بار. ءبىز كوبىنە تاماقتى ۇيدە جاسايتىن بولساق، ولار كوشەگە شىعىپ، مەيرامحانادا نەمەسە اسحانالاردا تاماقتانعاندى جاقسى كورەدى.

«التىن بەلگى» يەگەرى ءوز ءومىرىن شىعارماشىلىقپەن بايلانىستىرامىن دەپ ويلاماعان. ويتكەنى ول مەكتەپ قابىرعاسىندا جۇرگەنىندە مۋزىكالىق جارىستارعا ەمەس، ماتەماتيكا جانە ينفورماتيكا پاندەرى بويىنشا وليمپيادالارعا قاتىساتىن. ءبىراق كورەياعا ول ەسترادالىق توپتىڭ مۇشەسى اتانۋ ءۇشىن ارنايى ماقسات قويىپ كەلگەن. ناتيجەسىندە تالانتتى قىزدى جيىرما جىلدىق تاجىريبەسى بار، بىلىكتى مامان، فرانسۋز پروديۋسەرى بايقادى. ونىڭ كومپانياسىنىڭ ماقساتى - شىعىس پەن باتىستىڭ مادەنيەتىن بىرىكتىرگەن كوماندا قۇرۋ. بۇل ماقساتقا قازاقستاندىق قىز تولىق سايكەس كەلدى.

دجۋن حە شپيلمان، كومپانيا ديرەكتورى، پروديۋسەر:

- قازاق قىزدارى وتە ادەمى. جالپى حالقى وتە ادەمى، مادەنيەتى جوعارى، قازاقستان - ەۋروپا مەن ازيانىڭ اراسىندا ورنالاسقان ەرەكشە ەل.

توپ مۇشەلەرى دەبيۋتكە دايىندالۋدا. ال بوس ۋاقىتىندا ايعانىم ولارعا قازاق ءتىلىن ۇيرەتەدى. اقتوبەلىك ايعانىم ديماش قۇدايبەرگەنمەن ءبىر مەكتەپتە وقىعان ەكەن. الەمگە تانىمال جەرلەسى سەكىلدى ءورشىل قىزدىڭ دا العا قويعان ماقساتى بيىك.

ايعانىم جالينوۆا، كورەي توبىنىڭ مۇشەسى:

- كورەيادا عانا ەمەس، بۇكىل الەمدە تانىمال بولۋعا مۇمكىندىگىم بار دەپ ويلايمىن. ويتكەنى ۇجىمىمدا بىرگە جۇمىس جاساپ جاتقان ادامداردىڭ بارلىعى تاماشا جاندار.

اۆتورلارى: ۆلاديسلاۆ سوي، ولگا ليان

www.24.kz