تاۋەلسىزدىك كۇنىنە وراي قازاقستان پرەزيدەنتىنىڭ اتىنا قۇتتىقتاۋ جەدەلحاتتارى كەلىپ تۇسۋدە

نۇر- سۇلتان. قازاقپارات - تاۋەلسىزدىك كۇنىنە وراي قازاقستان پرەزيدەنتى قاسىم- جومارت توقايەۆتىڭ اتىنا قۇتتىقتاۋ جەدەلحاتتارى كەلىپ ءتۇسىپ جاتىر، دەپ حابارلايدى اقوردا.

مەملەكەت باسشىسى قاسىم- جومارت توقايەۆتىڭ اتىنا قازاقستان رەسپۋبليكاسىنىڭ تاۋەلسىزدىك كۇنىنە بايلانىستى قۇتتىقتاۋ جەدەلحاتتارى كەلىپ تۇسۋدە.

قىتاي حالىق رەسپۋبليكاسىنىڭ ءتوراعاسى شي جينپين جەكە ءوزىنىڭ جانە ق ح ر ۇكىمەتى مەن حالقىنىڭ اتىنان قاسىم- جومارت توقايەۆتى قازاقستان تاۋەلسىزدىگىنىڭ 29 جىلدىعىمەن قۇتتىقتادى.

«وتكەن جىلدىڭ قىركۇيەك ايىنداعى ءسىزدىڭ قىتايعا جاساعان مەملەكەتتىك ساپارىڭىز بارىسىندا قىتاي- قازاق قاتىناستارىنا ماڭگىلىك، جان- جاقتى ستراتەگيالىق سەرىكتەستىك مارتەبەسىن بەرۋگە ەكىجاقتى كەلىسىم جاسادىق. بۇل ەكىجاقتى ىنتىماقتاستىقتىڭ كوكجيەگىن كەڭەيتەدى. مەن قىتاي- قازاقستان قاتىناستارىن دامىتۋعا باسا ءمان بەرەمىن. سونىمەن قاتار ەكى ەلدىڭ يگىلىگى ءۇشىن بىرلەسىپ جۇزەگە اسىرىپ جاتقان ء«بىر بەلدەۋ - ءبىر جول» باعدارلاماسى اياسىندا جاڭا جەتىستىكتەرگە قول جەتكىزۋگە، ءوزارا قولداۋدى نىعايتۋعا جانە ستراتەگيالاردى تەرەڭدەتە وتىرىپ ۇشتاستىرۋعا وزىڭىزبەن بىرلەسىپ كۇش سالۋعا دايىنمىن»، - دەلىنگەن ق ح ر ءتوراعاسىنىڭ جەدەلحاتىندا. ءسوز سوڭىندا شي جينپين دوستاس قازاقستاننىڭ قۋاتى ارتىپ، ءوسىپ- وركەندەۋىنە، ال، حالقىنا باق- بەرەكە تىلەگەن. جاپونيا يمپەراتورى نارۋحيتو ءوزىنىڭ قۇتتىقتاۋ حاتىندا قاسىم- جومارت توقايەۆقا قۇت- بەرەكە، قازاقستان حالقىنىڭ ءوسىپ- ونە بەرۋىنە تىلەكتەستىك بىلدىرگەن. ساۋد ارابيا كورولى سالمان بەن ابدەلازيز ءال ساۋد جانە ساۋد ارابياسى كورولدىگىنىڭ تاق مۇراگەرى مۇحاممەد بەن سالمان ءال ساۋد قازاقستاننىڭ ودان ءارى دامىپ، گۇلدەنۋىن تىلەگەن.

ۇلى بريتانيا پاتشايىمى ەليزاۆەتا مەملەكەت باسشىسى قاسىم- جومارت توقايەۆتى تاۋەلسىزدىك كۇنىمەن قۇتتىقتادى.

- جوعارى مارتەبەلى پرەزيدەنت مىرزا، سىزدەردىڭ ۇلتتىق مەرەكەلەرىڭىزگە وراي جۇرەكجاردى قۇتتىقتاۋىمدى قابىل الىڭىز. سونداي- اق وسىنداي قيىن- قىستاۋ كەزەڭدە قازاقستان حالقىنا بار جاقسىلىقتى تىلەيمىن، - دەلىنگەن جەدەلحاتتا.

مەرەكە قارساڭىندا قازاقستان پرەزيدەنتىنىڭ اتىنا يسپانيا كورولى فەليپە، بەلگيا كورولى فيليپپ، ماروككو كورولى VI مۇحاممەد، قاتار مەملەكەتىنىڭ ءامىرى تاميم بەن حاماد ءال ءتاني، ومان سۇلتانى حايسام بەن تاريق، كامبودجا كورولى نورودوم سياموني قۇتتىقتاۋ حاتتارىن جولدادى. وزبەكستان پرەزيدەنتى شاۆكات ميرزيەيەۆ جەكە ءوزىنىڭ جانە وزبەك حالقىنىڭ اتىنان قاسىم- جومارت توقايەۆ پەن قازاقستاندىقتاردى ۇلتتىق مەرەكەمەن قۇتتىقتادى.

«قازاقستان حالقىنىڭ ءال- اۋقاتىن ارتتىرۋ جانە ەلىڭىزدىڭ حالىقارالىق ارەناداعى بەدەلىن ودان ءارى نىعايتۋ جولىنداعى جەتىستىكتەرىڭىزگە تاتۋ كورشىلەرىڭىز رەتىندە ەرەكشە قۋانامىز. اسىرەسە جاھاندىق پاندەميا جاعدايىندا ەلىڭىزدىڭ ەكونوميكالىق دامۋىن قامتاماسىز ەتۋگە جانە ونىڭ سالدارىن جويۋعا بايلانىستى قابىلداعان ءتيىمدى شارالارىڭىزعا ءتانتىمىز. سوڭعى جىلدارى ەكى ەل اراسىنداعى ءوزارا ءتيىمدى جانە ۇزاق مەرزىمدى قاتىناستاردى نىعايتۋعا باعىتتالعان بىرلەسكەن ءىس- قيمىلداردىڭ جاندانعانىن، سونداي- اق، ونىڭ جاڭا دەڭگەيگە كوتەرىلگەنىن ەرەكشە اتاپ وتكىم كەلەدى»، - دەلىنگەن وزبەكستان پرەزيدەنتىنىڭ جەدەلحاتىندا.

تاجىكستان پرەزيدەنتى ەمومالي راحمون تاۋەلسىزدىك كۇنىنە وراي ءوزىنىڭ جۇرەكجاردى قۇتتىقتاۋىن جىبەردى.

«ءبىز ەكى حالىق اراسىنداعى بەرىك، تاريحي بايلانىستاردى جوعارى باعالايمىز. ءوزارا كۇش جۇمىلدىرا وتىرىپ، تاجىك- قازاق ستراتەگيالىق سەرىكتەستىگىن دايەكتى، قارقىندى دامىتا الامىز دەپ سەنەمىن»، - دەلىنگەن قۇتتىقتاۋ حاتتا.

تۇرىكمەنستان پرەزيدەنتى گۋربانگۋلى بەردىمۇحامەدوۆ جەكە ءوزىنىڭ جانە تۇرىكمەن حالقىنىڭ اتىنان تاۋەلسىزدىك كۇنىمەن قۇتتىقتاپ، قازاقستاننىڭ ءوسىپ- وركەندەي بەرۋىنە تىلەكتەستىك ءبىلدىردى. تۇركيا پرەزيدەنتى رەجەپ تاييپ ەردوعان قاسىم- جومارت توقايەۆتى جانە قازاقستان حالقىن تاۋەلسىزدىك كۇنىمەن قۇتتىقتاپ، تابىس تىلەگەن.

«ورتاق تاريحي، مادەني جانە باۋىرلاستىق تامىرىمىز بايلانىستىراتىن قازاقستانمەن اراداعى ستراتەگيالىق سەرىكتەستىك دەڭگەيىندەگى قارىم- قاتىناستاردىڭ جاڭا سالالاردا دا تۇرلەنىپ، بايي تۇسكەنىنە قۋانىشتىمىز. قولايلى كۇنى قازاقستانعا ساپارمەن بارىپ، وزىڭىزبەن بىرگە جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ وتىرىسىنا قاتىسۋعا بەيىلدى ەكەنىمدى بىلدىرەمىن»، - دەلىنگەن جەدەلحاتتا.

يران پرەزيدەنتى حاسان رۋحاني ءوزىنىڭ قۇتتىقتاۋىندا ەكى ەل اراسىنداعى قارىم- قاتىناستاردىڭ كۇشەيگەنىن، سونداي- اق، ءوزارا ىنتىماقتاستىقتى ودان ءارى دامىتۋعا الەۋەتىمىزدىڭ زور ەكەنىن جەتكىزگەن.

قازاقستاننىڭ تاۋەلسىزدىك كۇنىنە وراي قۇتتىقتاۋ جەدەلحاتتارىن موڭعوليا پرەزيدەنتى حالتمااگين باتتۋلگا، ينديا پرەزيدەنتى رام نات كوۆيند جولدادى. كورەيا رەسپۋبليكاسىنىڭ پرەزيدەنتى مۋن چجە ين مەرەكەمەن قۇتتىقتاپ: «ءارتۇرلى سالاداعى ىنتىماقتاستىقتىڭ ارقاسىندا ەكى ەل اراسىنداعى دوستىق بايلانىستار قارقىندى دامىپ كەلەدى. قازاقستانعا بىلتىر جاساعان ساپارىم ەكىجاقتى قاتىناستاردىڭ دامۋىنا تىڭ سەرپىن بەردى. COVID-19 پاندەمياسىنا بايلانىستى احۋال تۇراقتانعاننان كەيىن ءسىزدىڭ كورەيا رەسپۋبليكاسىنا جاسايتىن ساپارىڭىز ەكى ەل اراسىنداعى ستراتەگيالىق سەرىكتەستىكتى ودان ءارى تەرەڭدەتىپ، دامىتۋعا مۇمكىندىك بەرەدى دەپ ۇمىتتەنەمىن»، - دەگەن قۇتتىقتاۋ حاتىن جولداعان.

ۋكراينا پرەزيدەنتى ۆلاديمير زەلەنسكيي مەملەكەت باسشىسى قاسىم- جومارت توقايەۆتى تاۋەلسىزدىك كۇنىمەن قۇتتىقتادى.

«تاۋەلسىزدىك جىلدارىندا قازاقستان رەسپۋبليكاسى ۋكراينانىڭ ورتالىق ازياداعى سەنىمدى سەرىگىنە اينالدى. تاۋەلسىز مەملەكەتتەرىمىز اراسىنداعى ەكىجاقتى ىقپالداستىق ءوزارا سەنىمگە جانە ەلدەرىمىزدىڭ ەگەمەندىگى مەن جەرىمىزدىڭ بۇتىندىگىن ساقتاۋعا نەگىزدەلىپ، ودان ءارى دامي بەرەدى دەپ سانايمىن»، - دەلىنگەن جەدەلحاتتا.

سونىمەن قاتار قازاقستان تاۋەلسىزدىگىنىڭ 29 جىلدىعىنا وراي قاسىم- جومارت توقايەۆتىڭ اتىنا گرۋزيا پرەزيدەنتى سالومە زۋرابيشۆيلي، ماجارستان پرەزيدەنتى يانوش ادەر، يتاليا پرەزيدەنتى سەردجو ماتتارەللا، شۆەيتساريا پرەزيدەنتى سيمونەتتا سوممارۋگا، پولشا پرەزيدەنتى اندجەي دۋدا، فينليانديا پرەزيدەنتى ساۋلي نيينيست، سەربيا پرەزيدەنتى الەكساندر ۆۋچيچ، يزرايل پرەزيدەنتى رەۋۆەن ريۆلين، ليتۆا پرەزيدەنتى گيتاناسە ناۋسەدا، حورۆاتيا پرەزيدەنتى زوران ميلانوۆيچ، بولگاريا پرەزيدەنتى رۋمەن راديەۆ، مولدوۆا پرەزيدەنتى يگور دودون، مالتا پرەزيدەنتى دجوردج ۆەللا، سان- مارينونىڭ كاپيتان- رەگەنتتەرى الەسساندرو كاردەللي مەن ميركو دولچيني، كۋبا پرەزيدەنتى ميگەل دياس- كانەل بەرمۋدەس، ەگيپەت پرەزيدەنتى ابدەل فاتتاح اس- سيسي، پالەستينا پرەزيدەنتى ماحمۋد ابباس، وڭتۇستىك افريكا رەسپۋبليكاسىنىڭ پرەزيدەنتى ماتامەلا سيريل راماپوزا، تۋنيس پرەزيدەنتى كايس سايد، سەررا- لەونە پرەزيدەنتى دجۋليۋس ماادا بيو، ەۋرازيالىق ەكونوميكالىق كوميسسيا القاسىنىڭ ءتوراعاسى ميحايل مياسنيكوۆيچ، شانحاي ىنتىماقتاستىق ۇيىمىنىڭ باس حاتشىسى ۆلاديمير نوروۆ، ۇجىمدىق قاۋىپسىزدىك شارتى تۋرالى ۇيىمنىڭ باس حاتشىسى ستانيسلاۆ زاس، يسلام ىنتىماقتاستىعى ۇيىمىنىڭ باس حاتشىسى يۋسەف ءال- وسەيمين، ەكونوميكالىق ىنتىماقتاستىق ۇيىمىنىڭ باس حاتشىسى حادي سۋلەيمانپۋر، ب ۇ ۇ باس حاتشىسىنىڭ ورتالىق ازيا بويىنشا ارنايى وكىلى ناتاليا گەرمان، ەۋرازيالىق دامۋ بانكىنىڭ باسقارما ءتوراعاسى نيكولاي پودگۋزوۆ، ExxonMobil Global Projects Company كومپانياسىنىڭ پرەزيدەنتى نيل داففين، Eni كومپانياسىنىڭ باس اتقارۋشى ديرەكتورى كلاۋديو دەسكالتسي، رەسەي فەدەراتسياسى بىرلەسكەن يادرولىق زەرتتەۋلەر ينستيتۋتىنىڭ ديرەكتورى ۆيكتور ماتۆەيەۆ، ەستونيانىڭ قازاقستانداعى ەلشىسى حەيتي مياەمەەس، پەنزا وبلىسىنىڭ گۋبەرناتورى يۆان بەلوزەرتسيەۆ، بايقوڭىر قالاسى اكىمشىلىگىنىڭ باسشىسى كونستانتين بۋسىگين وزدەرىنىڭ قۇتتىقتاۋ حاتتارىن جولدادى.