«كوك تۋدىڭ جەلبىرەگەنى» ءانىنىڭ ءسوزى قورعاس شەكاراسىندا جازىلعان - الماس احمەتبەك

None
None
الماتى. قازاقپارات - «كوك تۋدىڭ جەلبىرەگەنى» ءانى - جاندى تەبىرەنتىپ، رۋحتى وياتاتىن ناعىز پاتريوتتىق ءان. ول ارنايى تاپسىرىسپەن جازىلعان ءان ەمەس.

ول اتامەكەنگە دەگەن ىستىق ساعىنىش پەن بويداعى ەلجاندىلىقتان تۋعان دۇنيە. تاريحي وتانىنا جەتە الماي جۇرگەن وزگە ەلدەردەگى قازاق باۋىرلاردىڭ جۇرەگىنىڭ ءلۇپىلى. بۇل تۋرالى قازاقپارات تىلشىسىنە ءانىڭ ءسوزىن جازعان اقىن الماس احمەتبەك ايتتى.

توقسانىنشى جىلداردىڭ باسىندا قىتايدىڭ شاۋەشەك دەگەن اۋىلىندا تۇراتىن اقىن الماس احمەتبەك قازاقتىڭ كوك تۋىن العاش رەت تەلەديداردان تاماشالايدى. اقىنىڭ ايتۋىنشا، ەلباسى بايراقتى تىزەرلەپ تۇرىپ سۇيگەندە ەكران الدىندا وتىرعان قانداستار كوز جاستارىنا ەرىك بەرگەن. بۇل وتانعا دەگەن- قۇرمەت!

«ءبىزدىڭ اتا- بابالارىمىز قازاقستاننان جىراق جەردە ءومىر ءسۇردى. سوندىقتان ولاردىڭ بۇكىل ارمانى، بالالارىنا تاپسىراتىن ۇلكەن مۇراتى ەلگە جەتۋ ەدى. ولاردىڭ تاربيەسىنىڭ وزەگى ازاتتىق بولاتىن. ءبىز سول ەگەمەندىكتى اڭساعان، اتادان ۇرپاققا مۇرا بولىپ قالعان اۋلەتتىڭ، ءداستۇردىڭ تۋىندىسىمىز. مەنىڭ اكەم بالا كۇنىمدە ماعان مىنا ولەڭدى جاتاتقان ەدى.

مەن بىتكەن ويپاڭ جەرگە الاسا اعاش،

ەمەسپىن جەمىسى مول تاماشا اعاش.

قالعانشا جارتى جاڭقام،

مەن سەنىكى- پايلان شارۋاڭا جارسا، الاش!

بۇل ءمىرجاقىپ دۋلاتوۆتىڭ ولەڭى. وسى ولەڭ جولدارى ارقىلى اكەم بويىمداعى پاتريوتتىق سەزىمىمدى وياتقان ەكەن»، - دەدى الماس احمەتبەك .

سونىمەن قاتار، ول «جەلتوقسان» وقيعاسى بولعاندا ارعى بەتتەگى قازاقتار جازىقسىز جاپا شەككەن قازاقتىڭ ۇل- قىزدارى ءۇشىن الاڭدادى.

«ءبىز ءبارىن ەستىپ- ءبىلىپ وتىردىق. قانداس باۋىرلارىمىزعا جۇرەگىمىز اۋىردى. قىتاي تاراتقان بيۋللەتەندەر ارقىلى ءسابيتوۆا مەن كەنجەبەكوۆتىڭ ەسىمدەرى ەسىمىزدە قالدى. سول كەزدە ءبىز قازاقستاننىڭ تاۋەلسىزدىگىنىڭ كەلە جاتقانىن، كوپ ۇزاماي ازاتتىق تاڭى اتاتىنىن سەزدىك. قازاقستان تاۋەلسىزدىگىن جاريالاعان كەزدە شەتەلدەگى قازاقتاردىڭ قۋانىشىن سوزبەن ايتىپ، جەتكىزۋ مۇمكىن ەمەس. ءبىز كوشەگە ۇرانداپ شىقتىق، تويلادىق. ءبىز ەندى ءبىر كۇندە قىتايدا قالمايمىز دەپ قۋانىپ، قۇجاتىمىزدى، جۇمىسىمىزدى تاپسىرا باستادىق. ءبىز ول جاقتا جوعارى ءبىلىمدى، بەلسەندى كادر بولدىق. الايدا بۇل- ەلگە، جەرگە دەگەن ساعىنىشىمىزدىڭ قاسىندا تۇككە تۇرعىسىز بولدى»، - دەيدى اقىن.

اقىن الاماس احمەتبەك «كوك تۋدىڭ جەلبىرەگەن» ءانىنىڭ ءسوزىن قالاي جازعانىن ايتتى.

«مەن 1993 -جىلدىڭ اقپان ايىندا قورعاس شەكاراسىنان ءوتىپ كەلە جاتتىم. ول كەزدە كەدەن سالىنباعان، الاسا عانا ءۇيدىڭ توبەسىندە ءبىزدىڭ ەكى مەترلىك تۋىمىز جەلبىرەپ تۇردى. اقىندىق شابىت دەگەن بولادى. مەن ول كەزدە 32 جاستامىن. تۋعا قاراپ مىنا ولەڭ شۇماقتارى تىلىمە ورالىپ، سانامدى بيلەپ الدى. كوك تۋدىڭ جەلبىرەگەنى باقىتتىڭ ەلجىرەگەنى، قيىردا قالعان قازاقتىڭ ازات وتانعا جەتە الماي كوزىنىڭ مولدىرەگەنى. كەيىن الماتىعا كەلگەندە ولەڭ بەس شۋماق بولىپ جازىلدى. مەنىڭ ولەڭدەرىمنىڭ باسىم بولىگى پاتريوتتىق تاقىرىپتا. 2001 -جىلى تاۋەلسىزدىكتىڭ 10 جىلدىعىندا بۇركىت اياعان دەگەن جىگىت تاۋەلسىزدىككە ارنالعان ادەبي شىعارمالاردى جينادى. سوندا انىق بولعانى ازاتتىقا ارنالعان شىعارمالاردىڭ 90 پايىزىن شەت ەلدەن كەلگەن قازاقتىڭ اقىن- جازۋشىلارى جازىپتى. وعان سەبەپ، ەلىنە، جەرىنە دەگەن ساعىنىش»، - دەدى ول.

سونىمەن قاتار، ول اتالعان ولەڭگە بىرنەشە ءان جازىلعانىن جەتكىزدى.

«بۇل ولەڭگە بىرنەشە ءان جازىلدى. جاقىن جولداس جىگىتتەر دە جازدى. ءبىراق ماعان ونىڭ ۇلگىسى، دياپازونى ۇنامادى. كەيىن ءوزىم اقىن- سازگەر، وپەرا ءانشىسى ەرمۇرات زەيىپحان ۇلىنا ولەڭگە ءان جازىپ بەرۋىن سۇرادىم. سازگەر ءاننىڭ ەكى نۇسقاسىن جازدى. ەكەۋىن دە تىڭداپ، ۇناتقان نۇسقاسىن قالدىردىق. العاش رەت ساحناعا «كوك تۋدىڭ جەلبىرەگەنى» ءانىن ءانشى، وتاندىق وپەرا جۇلدىزى مايرا مۇحاممەد قىزى ورىنداپ شىقتى. بۇل 2001 -جىلىدىڭ ءبىرىنشى مامىرى بولاتىن»، - دەپ ەسكە الدى اقىن.

قازىر ونى ءانشى يبراگيم ەسكەندىر ناقىشىنا كەلتىرىپ ورىنداپ ءجۇر.



سوڭعى جاڭالىقتار