ۆلاديمير پۋتين قازاقستاندىقتاردى تاۋەلسىزدىك كۇنىمەن قۇتتىقتادى
مەملەكەت باسشىسى قاسىم- جومارت توقايەۆتىڭ اتىنا قازاقستان رەسپۋبليكاسىنىڭ تاۋەلسىزدىك كۇنىنە وراي رەسەي فەدەراتسياسىنىڭ پرەزيدەنتى ۆلاديمير پۋتيننىڭ قۇتتىقتاۋ جەدەلحاتى كەلىپ ءتۇستى. ۆلاديمير پۋتين ءوزىنىڭ قۇتتىقتاۋىندا قازاقستاننىڭ الەۋمەتتىك- ەكونوميكالىق جانە عىلىمي- تەحنيكالىق دامۋ ىسىندە زور تابىسقا قول جەتكىزگەنىن، الەمدىك ارەنادا ۇلكەن بەدەلگە يە ەكەنىن، حالىقارالىق وزەكتى پروبلەمالاردى شەشۋدە ماڭىزدى ءارى كونسترۋكتيۆتى ءرول اتقاراتىنىن اتاپ وتكەن.
«مەملەكەتتەرىمىز اراسىنداعى ستراتەگيالىق سەرىكتەستىك پەن وداقتاستىق قاتىناستار تابىستى دامىپ كەلە جاتقانى قۋانتادى. ءبىز كۇش بىرىكتىرە وتىرىپ، بارلىق ەكىجاقتى بايلانىستاردى، سونداي- اق، ەۋرازيالىق ەكونوميكالىق وداق، ۇجىمدىق قاۋىپسىزدىك شارت تۋرالى ۇيىم، ت م د، شانحاي ىنتىماقتاستىق ۇيىمى، بىرىككەن ۇلتتار ۇيىمى جانە باسقا دا كوپجاقتى قۇرىلىمدار اياسىنداعى ىقپالداستىقتى ودان ءارى نىعايتاتىنىمىزعا سەنىمدىمىن. مۇنىڭ باۋىرلاس حالىقتارىمىزدىڭ مۇددەلەرىنە جاۋاپ بەرەتىنى ءسوزسىز. سونداي- اق ەۋرازيالىق كەڭىستىكتەگى قاۋىپسىزدىك پەن تۇراقتىلىقتى نىعايتۋ جولىمەن كەلە جاتقانىمىزدى بىلدىرەدى. وزىڭىزگە زور دەنساۋلىق پەن تابىس، ال بارلىق دوستاس قازاقستان ازاماتتارىنا شىن جۇرەكتەن باق- بەرەكە تىلەيمىن»، - دەلىنگەن رەسەي پرەزيدەنتىنىڭ جەدەلحاتىندا.