ماڭعىستاۋدان العاش رەت «ەۋروپا-قىتاي» ترانزيتتىك جۇك پويىزى جونەلتىلدى

اقتاۋ. قازاقپارات - ماڭعىستاۋدا العاش رەت «ترانسكاسپيلىك حالىقارالىق كولىك باعىتى» حالىقارالىق قاۋىمداستىعى شەڭبەرىندە تۇركيادان شىققان جۇك ماڭعىستاۋدان قىتايعا پويىزبەن جونەلتىلدى، دەپ حابارلايدى قازاقپارات.

سالتاناتتى راسىمگە تۇركيانىڭ كولىك جانە ينفراقۇرىلىم ءمينيسترى ءادىل قارايسمايلوعلۋ مەن ماڭعىستاۋ وبلىسى اكىمىنىڭ ورىنباسارى نۇرلىباي اققۇلوۆ قاتىستى. ەندى ەۋروپادان ازياعا تەمىرجول ارقىلى جۇك تاسىمالداۋدىڭ جولى اشىلىپ وتىر.

حالىق تۇتىناتىن تاۋارلار بار 42 كونتەينەر تيەلگەن قۇرامنىڭ ءجۇرۋ مارشرۋتىنىڭ جالپى ۇزاقتىعى 8693 شاقىرىمدى (2 قۇرلىق، 2 تەڭىز جانە بەس ەل) قۇرايدى. جۇكتىڭ جالپى ءجۇرۋ ۋاقىتى - 12 تاۋلىك.

جەتكىزۋ ورنى - شانحاي قالاسى. جۇك پويىزى ىستانبۇل تەمىرجول ستانتسياسىنان جولعا شىقتى. جەراستى تۋننەلى ارقىلى بوسفور بۇعازىن كەسىپ ءوتىپ، انكاراعا، بۇدان سوڭ كارس- تبيليسي- باكۋدىڭ جاڭا كولىك دالىزىمەن پويىز باكۋ پورتىنا جەتتى.

12- جەلتوقساندا «بەكەت اتا» قازتەڭىزكولىك فلوتى فيدەرلىك كەمەسىمەن كاسپي تەڭىزى ارقىلى جۇك اقتاۋ پورتىنا جەتكىزىلدى. جۇك قۇرامى قازاقستان اۋماعى بويىنشا 3200 شاقىرىم تەمىر جولمەن ءجۇرىپ وتەدى. بۇدان ءارى سيان ارقىلى شانحايعا جەتكىزىلمەك.

اتالمىش ساپار ەۋروپا-قىتاي ترانزيتتىك باعىتى بويىنشا اليات پورتىنان %100 جۇكپەن شىققان فيدەرلىك كەمە رەتىندە ەستە قالدى. بۇل حالىقارالىق كولىك ءدالىزىن دامىتۋعا، كليەنتتەر مەن ينۆەستورلاردى تارتۋعا، مارشرۋتقا قاتىسۋشى بارلىق ەلدەردىڭ ينفراقۇرىلىمىن جاقسارتۋعا وڭ اسەرىن تيگىزەدى.

تاسىمالداۋ وپەراتورى - ترانسكاسپيلىك حالىقارالىق كولىك مارشرۋتى بويىنشا تاسىمالداۋدى جۇزەگە اسىراتىن ترانسكاسپي حالىقارالىق كولىك كونسورتسيۋمى بولىپ تابىلادى.

ال، كولىك قاتىناسىنىڭ تەڭىز وپەراتورى - قازتەڭىزكولىكفلوتى.

ايتا كەتكەن ءجون، وتكەن جىلدىڭ 16- ساۋىرىندە «اقتاۋ- اليات (باكۋ) - اقتاۋ» باعىتى بويىنشا كونتەينەرلىك فيدەرلىك جەلى ىسكە قوسىلعان بولاتىن. فيدەرلىك جەلى ىسكە قوسىلعاننان بەرى 20000 كونتەينەر تاسىمالداندى.

ال، كونتەينەرلەردىڭ %70 اقتاۋدان اليات پورتىنا تاسىمالداندى. بۇل باعىت ەۋروپادان قىتايعا اپاراتىن ەڭ قىسقا جول بولىپ تابىلادى. وسى جاڭا كولىك باعىتى بويىنشا جۇك تاسىمالدارىنا قاتىسۋ قازاقستان ءۇشىن ترانزيتتىك الەۋەتىن ارتتىرۋعا مۇمكىندىك بەرەدى جانە ەل ەكونوميكاسىنىڭ دامۋىنا ۇلەس قوسادى.