كارانتين: اقتاۋدا كاراوكە-كلۋب قوناقتارى پوليتسەيلەرمەن جانجالداستى

اقتاۋ. قازاقپارات - اقتاۋدا ىندەتتىڭ الدىن الۋ ماقساتىندا باس سانيتارلىق دارىگەردىڭ قاۋلىسىنا سايكەس اكىمدىك قىزمەتكەرلەرى جانە جەرگىلىكتى پوليتسيا وكىلىمەن بىرلەسكەن توپ قالاداعى بىرنەشە نىسانعا كەزەكتى مونيتورينگ جۇمىستارىن جۇرگىزدى.

قازاقپارات بۇل تۋرالى اقتاۋ قالاسى اكىمدىگىنىڭ باسپا ءسوز قىزمەتىنە سىلتەمە جاساپ حابارلايدى.

سەيسەنبى كۇنى وتكەن مونيتورينگ بارىسىندا قالاداعى 5-شاعىن اۋداندا ورنالاسقان «R12» ءدامحاناسىنىڭ (كاراوكە) جۇمىس ىستەپ تۇرعانى انىقتالدى.

پوليتسەيلەر مەن مونيتورينگىلىك توپ وكىلدەرى كارانتين تالاپتارىن ساقتاماعان نىسانعا كىرىپ، قوناقتاردى تاراتۋعا تىرىسقان.

الايدا كاراوكە-كلۋبقا كەلۋشىلەر پوليتسەيلەرمەن جانجالداسىپ، تارتىپكە باعىنباۋدىڭ جولىن ىزدەدى.

ماڭعىستاۋ وبلىسىنىڭ باس سانيتار دارىگەرىنىڭ 2020-جىلدىڭ 21- قازان كۇنگى قاۋلىسىنا سايكەس كافەلەر مەن مەيرامحانالارعا ساعات 22.00 گە دەيىن عانا قىزمەت ەتۋگە رۇقسات بەرىلگەن.

وسىعان بايلانىستى كارانتين تالاپتارىن ساقتاماعان نىسان يەلەرىنەن تۇسىنىكتەمە الىنىپ، اكىمشىلىك حاتتاما تولتىرىلدى.

ايتا كەتەيىك، بۇعان دەيىن اقتاۋدا تۇنگى كلۋب يەسى تانىمال رەپەردىڭ كونسەرتىن جاسىرىن وتكىزبەك بولعانىن جازعان ەدىك.