قازاقستان جانە ۇلى بريتانيا اراسىندا ستراتەگيالىق ارىپتەستىك نىعايا تۇسەدى
جۇمىس توپتارىنىڭ قاتىسۋشىلارى، ونىڭ ىشىندە ۇلىبريتانيانىڭ بيزنەس توپتارىنىڭ 20 دان استام وكىلى ۇ ا ك وتكەن جىلعى قىزمەتىنىڭ ناتيجەلەرىن زەردەلەدى. سونداي- اق ەكىجاقتى كوپجوسپارلى ىنتىماقتاستىقتى ودان ءارى دامىتۋدىڭ نەگىزگى باعىتتارىن بەلگىلەدى. بۇدان باسقا ەنەرگەتيكا، قارجى جانە تاۋ- كەن سەكتورلارىنداعى، سونداي- اق COVID-19 پاندەمياسى جاعدايىندا دەنساۋلىق ساقتاۋ جانە ءبىلىم بەرۋ سالاسىنداعى ءوزارا ءىس- قيمىل پەرسپەكتيۆالارى تالقىلاندى. الماس ايداروۆ ءوز سوزىندە قازاقستان تىكەلەي شەتەلدىك ينۆەستيتسيالاردى عانا ەمەس، جاڭا تەحنولوگيالاردى دا تارتۋعا ۇمتىلاتىنىن اتاپ ءوتتى. وسىعان بايلانىستى ول بريتانيالىق بيزنەس وكىلدەرىن «سيفرلىق قازاقستان» باعدارلاماسىنا بەلسەندى تۇردە قاتىسۋعا شاقىردى.
«سيفرلاندىرۋ، كولىك، لوگيستيكا، اگروبيزنەس، وڭدەۋ ونەركاسىبى، ەنەرگەتيكا جانە تاۋ- كەن ونەركاسىبى باعىتىندا ەكونوميكا جىلدام ءارتاراپتاندىرىلۋدا. قازاقستان قول جەتكىزگەن جەتىستىكتەرىمەن توقتاپ قالماي، ۇزاق مەرزىمدى تۇراقتى دامۋدىڭ جاڭا ماقساتتارىن بەلگىلەدى. ق ر پرەزيدەنتى قاسىم- جومارت توقايەۆ باسقاراتىن جانە ەقدب بۇرىنعى پرەزيدەنتى سەر سۋما چاكرابارتي كەڭەس بەرۋىمەن قولعا الىنعان رەفورمالار بويىنشا جوعارى كەڭەستىڭ قۇرىلۋى ءبىزدىڭ جارقىن بولاشاعىمىزدىڭ جولىنداعى تاعى ءبىر ماڭىزدى قادام»، - دەپ پىكىر ءبىلدىردى ول.
ءوز كەزەگىندە ر. دجاياۆاردەنا قازاقستاننىڭ استاناسى نۇر- سۇلتاننىڭ الەمدىك دەڭگەيدەگى كوممەرتسيالىق حابقا اينالۋ الەۋەتى تۋرالى اڭگىمەلەدى. وسى ماقساتقا جەتۋ ءۇشىن قاجەتتى تاۋارلاردى، قىزمەتتەردى جانە قارجىلاندىرۋدى، سونىڭ ىشىندە الدىڭعى قاتارلى ساۋلەت، سيفرلىق تەحنولوگيالار، دەنساۋلىق ساقتاۋ، ءبىلىم بەرۋ، قارجىلىق قىزمەتتەر، سونداي- اق جاڭارتىلاتىن ەنەرگيا كوزدەرىن ۇسىنۋدا بريتانيالىق بيزنەستىڭ شەشۋشى ءرول اتقاراتىنىنا سەنىم ءبىلدىردى.
«ءبىز قارىم- قاتىناسىمىزدى نىعايتۋعا جانە تەرەڭدەتۋگە ءتيىسپىز. ءبىز پلانەتامىزدى ترانسفورماتسيالايتىن جاڭا تەحنولوگيالاردىڭ ارتىقشىلىقتارىن پايدالانا وتىرىپ، بولاشاقتىڭ تازا، نەعۇرلىم ءارتاراپتاندىرىلعان جانە نەعۇرلىم ورنىقتى ەكونوميكالارىن قۇرۋعا مىندەتتىمىز. ءبىز بىرلەسە وتىرىپ، بۇكىل الەم بويىنشا ەركىن ساۋدا مەن حالىقارالىق ينۆەستيتسيالاردى ىلگەرىلەتە الامىز»، - دەپ اتاپ ءوتتى ر. دجاياۆاردەنا.
ۇ ا ك شەڭبەرىندە قارجى جانە قارجىلىق قىزمەتتەر، ءبىلىم بەرۋ، جەر قويناۋىن پايدالانۋ، ەنەرگەتيكا جانە دەنساۋلىق ساقتاۋ بويىنشا بەس جۇمىس توبىنىڭ وتىرىستارى ءوتتى. وتىرىسقا جانە ەكىجاقتى كەلىسسوزدەرگە قاتىسۋشىلار ساۋدا- ەكونوميكالىق ءوزارا ءىس- قيمىلدىڭ نەگىزگى اسپەكتىلەرى بويىنشا ءبىر مامىلەگە كەلە وتىرىپ، كورونوۆيرۋستان كەيىنگى داعدارىستىڭ كۇردەلى جاعدايلارىندا قازاقستان- بريتان ستراتەگيالىق ارىپتەستىگىن ودان ءارى كەڭەيتۋگە دەگەن ءوزارا نيەتىن راستادى. ءىس- شارانىڭ قورىتىندىسى بويىنشا ساۋدا- ەكونوميكالىق، عىلىمي- تەحنيكالىق جانە مادەني ىنتىماقتاستىق جونىندەگى قازاقستان- بريتان ۇكىمەتارالىق كوميسسياسىنىڭ جەتىنشى وتىرىسىنىڭ حاتتاماسىنا قول قويىلىپ، ەكىجاقتى ءوزارا ءىس- قيمىلدى ودان ءارى كەڭەيتۋ جونىندەگى ۇزاقمەرزىمدى جوسپارلار بەكىتىلدى.