قازاق- قىتاي شەكاراسىنداعى جۇكتىڭ الىس- بەرىسى قيىنداپ تۇر

نۇر- سۇلتان. قازاقپارات - قازاقستان مەن قىتاي اراسىندا جۇك كولىكتەرى ارقىلى جاسالاتىن الىس- بەرىس قيىنداپ تۇر. وعان شىعىستاعى كورشى مەملەكەتتىڭ كوروناۆيرۋس ينفەكسياسىنا بايلانىستى سانيتارلىق تالاپتاردى كۇشەيتۋى سەبەپ.

الماتى وبلىسىنداعى «نۇر جولى» كەدەن بەكەتى ارقىلى پاندەمياعا دەيىن كۇنىنە 200-گە جۋىق جۇك كولىگى وتسە، قازىر بۇل كورسەتكىش مۇلدەم ازايعان. كەدەندەگى كەزەك نەلىكتەن تۋىنداپ وتىر؟ ماسەلە قالاي شەشىلىپ جاتىر؟

«نۇر جولى» كەدەن بەكەتىنىڭ اۋماعىندا 100-گە جۋىق قازاقستاندىق جۇك كولىگى ءوزىنىڭ كەزەگىن كۇتىپ تۇر. ءبىراق قىتاي تاراپى ولاردى قابىلداۋعا اسىعار ەمەس. بۇعان دەيىن ءبىزدىڭ كولىكتەر كورشى ەلدەگى ارنايى تۇراققا كىرىپ تىركەمەلەرىن تاستاپ كەرى ورالاتىن. جۇك تيەلىپ بولعان سوڭ قايتادان بارىپ الىپ شىعاتىن. ەندى ول دا جوق. ەرەجە كۇندە قۇبىلىپ تۇر ەكەن.

عابيت ورازوۆ، وبلىستىق مەملەكەتتىك كىرىستەر دەپارتامەنتى كەدەندىك اكىمشىلەندىرۋ باسقارماسىنىڭ باسشىسى:

- شامامەن 50-دەن استام اۆتوكولىكتەر كۇتىپ تۇر. ولار الدىڭعى وزدەرىنىڭ كىرگىزگەن تىركەۋلەرىن الىپ كەتۋ ءۇشىن كىرىپ وتىر. بۇگىنگى تاڭدا قىتاي تەك سولاردى عانا قابىلداپ وتىر. قالعان مىناۋ بوس تىركەۋلەردى قازاقستاندىق جانە ەكسپورتتىق توۆارلاردى مۇلدەم قابىلداپ جاتقان جوق.

بارىس- كەلىس قيىنداعاندىقتان تامىز ايىندا كەدەن ماڭىنداعى كەپتەلىس 50 شاقىرىمنان اسقان ەدى. پىسىقاي دەلدالدار كەزەكتى بۇزىپ، جۇرگىزۋشىلەردىڭ اشۋ- ىزاسىن كەلتىرگەن بولاتىن. وسىدان سوڭ ەلەكتروندىق كەزەك جۇيەسى ەنگىزىلىپ بۇل ماسەلە شەشىمىن تاپتى. بۇگىندە اقپاراتتىق جۇيەگە 5 مىڭنان استام جۇك كولىگى تىركەلىپتى.

وسكار ەرمانوۆ، ەلەكتروندى كەزەك جۇيەسىن جاساعان كومپانيا وكىلى:

- جۇيە اشىق. كەز كەلگەن قولدانۋشى جەكە كابينەتى ارقىلى ءوزىنىڭ قانشاسىنشى تۇرعانىن بىلە الادى. ءبىر قولدانۋشى بىرنەشە كولىكتى كەزەككە قويا الادى. ەگەر قىتاي تاراپى بۇگىن 20 ماشينا كىرگىزەمىز دەسە اقپاراتتىق جۇيە كەزەگى كەلگەن 20 كولىك جۇرگىزۋشىسىنە sms-حات جىبەرەدى.

بۇگىنگى تاڭدا «نۇر جولىنداعى» كولىك- لوگيستيكالىق ورتالىقتىڭ ماشينالارىمەن عانا قىتايدان جۇك اكەلۋ مۇمكىن بولىپ وتىر. سەبەبى بۇل ماسەلە ۇكىمەتتىك دەڭگەيدە كەلىسىلگەن ەكەن.

عابيت ورازوۆ، وبلىستىق مەملەكەتتىك كىرىستەر دەپارتامەنتى كەدەندىك اكىمشىلەندىرۋ باسقارماسىنىڭ باسشىسى:

- شامامەن 10 - قاراشادا جۇكتەردى قابىلداماعاننان باستاپ قازاقستان تاراپىنان سۇراۋ جىبەرىلدى. ءبىراق قىتاي تاراپىنان ەشقانداي كەرى جاۋاپ قايتارىلىپ جاتقان جوق. قىتاي تاراپىنىڭ سانيتارلىق تالاپتى كۇشەيتكەنى سونشالىقتى ءتىپتى وزدەرىنىڭ بوس تىركەمەلەرىن الماي وتىر. قازىر «نۇر جولىندا» قىتايلىق كاسىپكەرلەردىڭ 400-دەن استام تىركەمەسى جاتىر. جەرگىلىكتى مەملەكەتتىك ورگاندار تاراپىنان جاعدايدى رەتتەۋ ءۇشىن بارلىق شارالار قولدانىلۋدا. ءبىراق ماسەلە ۇكىمەتتىك دەڭگەيدە قارالماسا شەشىلمەيتىن سەكىلدى.

www.24.kz