مەكتەپ وقۋ باعدارلامالارى ەندى مىندەتتى تۇردە تاۋەلسىز ساراپتامادان وتكىزىلەدى

None
None
نۇر-سۇلتان. قازاقپارات - مەكتەپ وقۋ باعدارلامالارى مىندەتتى تۇردە تاۋەلسىز ساراپتامادان وتكىزىلەتىن بولادى.

بۇل جايىندا سەنات دەپۋتاتتارىنىڭ ساۋالىنا ق ر پرەمەر-ءمينيسترى اسقار ماميننىڭ جاۋابىندا ايتىلعان، دەپ حابارلايدى قازاقپارات ءتىلشىسى.

«جاڭارتىلعان وقۋ باعدارلامالارى 2016 -جىلدان باستاپ ءبىلىم بەرۋ پروتسەسىنە كەزەڭ- كەزەڭىمەن ەنگىزىلۋدە (2016 -جىلى - 1، 2017 -جىلى - 2، 5 جانە 7، 2018 -جىلى - 3، 6 جانە 8، 2019 -جىلى - 9 جانە 10، 2020 -جىلى - 11-سىنىپتار).

ۇلگىلىك وقۋ باعدارلامالارى بەكىتىلگەنگە دەيىن ولاردى ءتيىستى ءبىلىم سالالارىنىڭ بەلگىلى عالىمدارى، پەداگوگ- پراكتيكتەر بىرنەشە رەت تالقىلادى، كوپشىلىكتىڭ تالقىلاۋى جانە جۇرتشىلىقتىڭ قاراۋى ءۇشىن اشىق پورتالعا ورنالاستىرىلدى.

سونداي-اق ءبىلىم بەرۋدىڭ جاڭارتىلعان مازمۇنىنا كوشۋدىڭ باعدارلامالارى مەن كەزەڭدەرى 2016 -جىلعى 31-مامىردا پارلامەنت ءماجىلىسىنىڭ الەۋمەتتىك- مادەني دامۋ كوميتەتىنىڭ «12 جىلدىق ءبىلىم بەرۋدى ەنگىزۋ جانە مەكتەپتە وقىتۋ ستاندارتتارىن جاڭارتۋ جونىندەگى جۇيەلى شارالار تۋرالى» تاقىرىبىنداعى وتىرىسىندا قولداۋ تاپتى. بۇدان باسقا، 2017 -جىلعى 22 قىركۇيەكتە وتكەن پارلامەنت سەناتىنداعى پارلامەنتتىك تىڭداۋدىڭ قورىتىندىسى بويىنشا ءبىلىم بەرۋ مازمۇنىن جاڭارتۋعا قاتىستى جۇمىستى جالعاستىرۋ بويىنشا ۇسىنىمدار بەرىلدى»، - دەپ اتاپ وتەدى ۇكىمەت باسشىسى.

ونىڭ ايتۋىنشا، ءبىلىم بەرۋدىڭ جاڭارتىلعان مازمۇنى ەنگىزىلگەنگە دەيىن 2015 -جىلى 30 پيلوتتىق مەكتەپتە وقۋ باعدارلامالارى، ونىڭ ىشىندە مەملەكەتتىك جالپىعا مىندەتتى ءبىلىم بەرۋ ستاندارتىنىڭ تالاپتارىن ساقتاي وتىرىپ ازىرلەنگەن جاڭا وقۋ پاندەرى بويىنشا اپروباتسيا جۇرگىزىلدى. بارلىق تەستىلەۋلەردىڭ ناتيجەلەرى بويىنشا پيلوتتىق مەكتەپتەر ورتاشا بالدىڭ ايتارلىقتاي (+38،1 بالل) پروگرەسىنە يە.

بۇل باقىلاۋ مەكتەپتەرىنىڭ كورسەتكىشتەرىنەن ەكى ەسە (+21،3 بالل) ارتىق.

«وقۋ باعدارلامالارىن ازىرلەۋ كەزىندە ءپانارالىق، دەڭگەيارالىق بايلانىستار ەسكەرىلدى. ولار بارلىق وقۋ پاندەرىنىڭ ينتەگراتسياسىنا، وقۋشىلاردىڭ تۇتاس قابىلداۋى مەن تاربيەسىنە ىقپال ەتەتىن ورتاق تاقىرىپتار ارقىلى ىسكە اسىرىلادى. وقۋ باعدارلامالارىنىڭ ساباقتاستىعى وقۋشىلاردىڭ جاس ەرەكشەلىكتەرىن ەسكەرەدى، مۇندا وقۋ باعدارلاماسىنىڭ مازمۇنى سپيرال پرينتسيپى بويىنشا قاراپايىمنان كۇردەلىگە قاراي تىگىنەن دە، كولدەنەڭىنەن دە كۇردەلەنە تۇسەدى»، - دەدى اسقار مامين.

ۇكىمەت باسشىسى كەلىپ تۇسكەن ۇسىنىستار مەن ۇسىنىمداردى ەسكەرە وتىرىپ، وقۋ باعدارلامالارىن جەتىلدىرۋ بويىنشا جۇمىس تۇراقتى نەگىزدە جۇرگىزىلەتىندىگىن ايتادى.

«سونداي-اق، پارلامەنت ماجىلىسىندە قارالىپ جاتقان ءبىلىم بەرۋ ماسەلەلەرى جونىندەگى زاڭ جوباسى شەڭبەرىندە «ءبىلىم تۋرالى» قازاقستان رەسپۋبليكاسى زاڭىنىڭ 5-بابىنا وقۋ باعدارلامالارىنىڭ مىندەتتى تۇردە تاۋەلسىز ساراپتامادان ءوتۋى بولىگىندە وزگەرىس ەنگىزىلەدى. ساراپتامادان وتكەن وقۋ باعدارلامالارى ءبىلىم بەرۋ ۇيىمدارىندا سىناقتان وتكىزىلەدى»، - دەدى پرەمەر-مينيستر.

اۆتور: مارلان جيەمباي

سوڭعى جاڭالىقتار