جامبىلدىق شارۋا ەشكى سۇتىنەن سابىن جاسايدى

تاراز. قازاقپارات - جامبىل وبلىسىندا شارۋا ەشكى سۇتىنەن سابىن شىعارۋدا، - دەپ حابارلايدى قازاقپارات ءتىلشىسى.

جامبىل وبلىسىنداعى كوكدونەن اۋىلىنىڭ تۇرعىنى كەنجەبەك سەيداحمەتوۆ اسىل تۇقىمدى ەشكى وسىرۋمەن اينالىسۋدا.

ول كارانتين كەزىندە قاراپ جاتپاي، عالامتور ارقىلى ەشكى سۇتىنەن نە جاساۋعا بولاتىنىن زەردەلەگەن. ءسويتىپ، ءۇش اي ونلاين سەمينارعا قاتىسىپ، سابىن جاساۋدىڭ ءادىسىن ۇيرەنىپ شىققان.

بۇلدىرشىندەردى قىزىقتىرۋ ءۇشىن سالماعى 80 گرام بولاتىن بالالار سابىنىن ويىنشىققا ۇقساتىپ ازىرلەپتى. قازىر ۇلكەندەرگە ارنالعان سابىن - 700، بالالارعا ارنالعان سابىن 500 تەڭگەدەن ساتىلۋدا.

«بۇل كاسىپكە كەلۋىمنىڭ وزىندىك سەبەبى بار. مەن الماتىداعى، تارازداعى جوعارى وقۋ ورىندارىندا ساباق بەردىم. ءتىپتى نۇر-سۇلتان قالاسىندا دا لاۋازىمدى قىزمەت اتقاردىم. الايدا اياق استىنان اۋىرىپ، ينسۋلت الىپ قالدىم. سول كەسەلىمنەن ەشكىنىڭ ءسۇتىن ءىشىپ ەمدەلىپ، ءتاۋىر بولعان سوڭ وسى كاسىپكە بەت بۇردىم»، - دەگەن كەنجەبەك وسىرگەن ەشكىلەرىنىڭ سۇتىنە سۇرانىس جوعارى ەكەنىن دە ايتتى.

ءتىپتى ەسىگىنىڭ الدىنان ساتىپ الىپ كەتەتىندەر دە بار ەكەن. ۇيىنەن قۇرت، ىرىمشىك، سۇزبە ۇزىلمەيدى. ول بىلتىر «اتامەكەن» كاسىپكەرلىك پالاتاسىنان 4 ميلليون تەڭگە نەسيە الىپ، 20 اسىل تۇقىمدى ەشكى ساتىپ العان. بيىل سول ەشكىلەر الپىسقا جەتىپتى. 6 پايىزبەن العان نەسيەسىن 5 جىل ىشىندە قايتارادى.

قازىر كەنجەبەك وزگە ارىپتەستەرىمەن بىرگە اسىل تۇقىمدى ەشكىگە سۋبسيديا تولەنسە دەگەن ماسەلەنى كوتەرىپ ءجۇر.

«ەشكى ءسۇتىنىڭ ءوزى - ەم. ال مەن وعان نەشە ءتۇرلى پايدالى قوسپا مايلار قوسامىن. بۇل سابىندى قولىڭا جاعىپ، 4-5 مينۋتتان سوڭ عانا جۋۋ قاجەت. بەت جارىلعاندا جاقساڭ، بىردەن اسەر ەتەدى. ەش حيميالىق قوسپاسى جوق. تازا تابيعي ءونىم، باعاسى دا سوعان لايىق. وسىلايشا ەشكى سۇتىنەن سابىن جاساۋعا قول جەتكىزىپ وتىرمىز. مەملەكەتتەن قولداۋ بولسا، ەشكى وسىرۋمەن اينالىسقىسى كەلەتىن جاستاردى تاربيەلەر ەدىم»، - دەيدى ك. سەيداحمەتوۆ.

قازىر شارۋانىڭ قوراسىندا گوللانديالىق «زاننين»، پاكىستاندىق «بيتتال» تۇقىمدى ەتتى جانە ءسۇتتى ەشكىلەر وسۋدە. تاۋلىگىنە 25 ليتر ءسۇت بەرەتىن «بيتتال» تۇقىمدى ءبىر ەشكىنىڭ قۇنى - 1,5 مىڭ دوللار نەمەسە 600 مىڭ تەڭگە شاماسىندا. ال، «زاننين» تاۋلىگىنە 5 ليتر ءسۇت بەرەدى. ەشكى ءسۇتىنىڭ ءبىر ليترى - 400 تەڭگە.

«يسپانيادان اكەلىنگەن اسىل تۇقىمدى ەشكىلەرىم دە بار. بۇل ەشكىنىڭ قۇنى - 370 مىڭ تەڭگە. مال ازىعىنا كەتەتىن شىعىن كوپ ەمەس. ماسەلەن، الپىس ەشكىنىڭ التى اي قىستان شىعۋىنا 500 تۇك جوڭىشقا، 3 توننا ءبيداي جەتىپ جاتىر. جىلىنا 3-4 مارتە تولدەيتىن «رومانسكي»، اۋعانستاندىق «ۆاگير» تۇقىمدى قويلاردى دا وسىرۋدەمىز. «ۆاگير» تۇقىمدى ەكى ايلىق قوزى 200 مىڭ تەڭگە تۇرادى. بابى كەلىسسە، بۇل قويدىڭ ەتى 145 كيلوگرام تارتادى»، - دەيدى شارۋا.