قازاقستاندا اقىلى جولدار سانى ارتادى

None
None
شىمكەنت. قازاقپارات - كەلەسى جىلدان باستاپ ەلىمىزدەگى اقىلى جولدار سانى كوبەيىپ، بۇگىندە ءبىرقاتار وڭىردە رەسپۋبليكالىق ماڭىزى بار اۆتوباندارعا جولاقى جينايتىن جۇيە ورناتىلىپ جاتىر.

اقىلى جولداردىڭ قاتارىنا «شىمكەنت - تاشكەنت» جولى دا ەنگىزىلىپ، سىناق رەجيمىندە وسى جۇيەگە قوسىلعان، دەپ حابارلايدى قازاقپارات ءتىلشىسى.

ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆتىڭ ايتۋىنشا، ينۆەستيتسيالىق بايقاۋدىڭ قورىتىندىسى بويىنشا 3 بىردەي كومپانيامەن كەلىسىمگە قول قويىلعان. ولار ۇزىندىعى 11 مىڭ شاقىرىم بولاتىن جولداردا اقى جيناۋ جۇيەسىن قوسۋمەن جانە قىزمەت كورسەتۋمەن اينالىسادى. بيىل مۇنداي قۇرىلعىلار ەلىمىزدەگى جولداردىڭ 5,8 مىڭ شاقىرىم ۋچاسكىسىنە ورناتىلعان. اتاپ ايتساق، «اقتوبە – ر ف ش- سى (ورىنبورعا)» ، «ورال - رف ش- سى (ساراتوۆقا)»، «ورال – ر ف ش- سى (ساماراعا)». «اتىراۋ - دوسسور - بەينەۋ - اقجىگىت - وزبەكستان ش- سى»، «تاراز - قاينار»، «قوستاناي – ر ف (ترويتسككە)»، «پاۆلودار - رف ش- سى (ومبىعا)، «قاپشاعاي - تالدىقورعان»، «نۇر- سۇلتان - قوستاناي»، «نۇر- سۇلتان - پاۆلودار»، «پاۆلودار - سەمەي»، «ورال - اقتوبە»، «اقتوبە - قارابۇتاق». جولدىڭ قالعان 5,2 مىڭ شاقىرىمىندا قايتا قۇرۋ جۇمىستارىنىڭ اياقتالۋىنا قاراي، 2024 -جىلعا قاراي ىسكە قوسۋ جوسپارلانىپ وتىر.

جىل سوڭىنا دەيىن 99 باقىلاۋ اركاسى ورناتىلىپ، ولار تولىقتاي ينۆەستوردىڭ قاراجاتىنا سالىنباق. ءاربىر باقىلاۋ اركاسىندا تىركەۋ جانە شولۋ جاسايتىن كامەرالار، ونەركاسىپتىك كومپيۋتەر مەن اپپاراتتىق شكاف، لازەرلىك قاشىقتىق ولشەۋىش پەن ۇزدىكسىز قۋات بەرۋ كوزى رەتىندەگى ليتي- يوندى اككۋمۋلياتورلار بولادى. سالا ماماندارى كەي جەرلەردە كۇن باتارەيالارىمەن بالامالى قۋات كوزدەرى قويىلىپ، ۇيالى بايلانىس تا قامتاماسىز ەتىلەتىنىن اتاپ وتۋدە. بۇدان بولەك، جول قاۋىپسىزدىگىن ەسكەرگەن ماماندار ەلىمىزدە IRAP حالىقارالىق باعالاۋ جۇيەسى ەنگىزىلەتىنىن ايتادى.

ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ جاعدايدى رەتتەۋ ءۇشىن دۇنيەجۇزىلىك بانكتىڭ قولداۋىمەن شۆەتسيانىڭ SweRoad كومپانياسىمەن جانە قازاق جول قوزعالىسى قاۋىپسىزدىگى عىلىمي- زەرتتەۋ ينستيتۋتىمەن كەلىسىمشارتقا قول قويدى. جوبا اياسىندا 6200 شاقىرىم قالالىق جانە رەسپۋبليكالىق ماڭىزى بار اۆتوموبيل جولدارى باعالاۋدان وتكىزىلمەك.

باعالاۋ تۇسىرىلىمدەرىن «جول اكتيۆتەرى ساپاسى ۇلتتىق ورتالىعى» رمك بىلىكتى ماماندارى ورىنداماق. ولار ءار 100 مەتر سايىن جولدى 50 دەن استام پارامەتر ارقىلى ولشەپ، تىركەيدى. 5 بالدىق شكالا بويىنشا اۆتوموبيل ىشىندەگى جول جۇرىسىنە قاتىسۋشىلارعا، سونداي- اق جاياۋ جۇرگىنشىلەرگە، موتوتسيكل جۇرگىزۋشىلەرىنە جانە ۆەلوسيپەدشىلەرگە بولەك تاعايىندالادى. باعالاۋ اياقتالعاننان كەيىن ءاربىر جولدىڭ رەيتينگى انىقتالادى. وسىلايشا جول اپاتتارىن، ءولىم- ءجىتىمدى ازايتۋ ءۇشىن، كەمشىلىكتەردى جويۋ ءۇشىن ءىس- شارالار قولعا الىنباق.

وعان ارنايى ينۆەستيتسيالىق جوسپار جاسالماق. ايتا كەتەيىك، ەلىمىزدە وتكەن جىلى 2373 ادام جول اپاتىنان كوز جۇمعان. بۇل دەگەنىمىز، ءاربىر 100 مىڭ ادامنىڭ 13 ءى جازىم بولىپ جاتىر دەگەن ءسوز.


سوڭعى جاڭالىقتار