الەم ەكونوميكاسىنا قاتىستى بولجام جاقساردى

نۇر- سۇلتان. قازاقپارات – كوروناۆيرۋسقا قارسى ۆاكسينانىڭ پايدا بولۋى الەم ەكونوميكاسى بويىنشا بولجامدارعا دا جاقسى اسەر ەتكەن. ەكونوميكالىق ىنتىماقتاستىق جانە دامۋ ۇيىمى دۇنيە جۇزىندە ىشكى جالپى ءونىمىنىڭ تومەندەۋىن ازايتتى.

ونىڭ دەڭگەيى جىل سوڭىندا 4,2 پروتسەنت بولماق. ءبىراق بيىل الەم ەكونوميكاسى ىندەتتەن 7 تريلليون دوللار كىرىسىنەن ايىرىلۋى مۇمكىن. بۇل شامامەن گەرمانيا مەن فرانسيانىڭ ءبىر جىلدىق ىشكى جالپى ونىمىنە پارا پار.

مامانداردىڭ ايتۋىنشا، اسىرەسە ارگەنتينا مەن باتىس ەۋروپا ەلدەرىنىڭ ەكونوميكاسىنىڭ قالپىنا كەلۋى قيىنعا سوعادى. ال قىتاي، وڭتۇستىك كورەيا جانە سكانديناۆيا ەلدەرى تەز دامۋ جولىنا ءتۇسۋى مۇمكىن. قالپىنا كەلۋ كەزىندە كوپتەگەن كاسىپورىن مەن مەملەكەتتەر قارىز ماسەلەسىن باستان كەشەدى. وسىعان بايلانىستى شاعىن بيزنەستى قولداۋ ماڭىزدى دەيدى ساراپشىلار. جاستار اراسىنداعى جۇمىسسىزدىققا كوپ كوڭىل بولۋگە دە شاقىردى.

انحەل گۋرريا، ەكونوميكالىق ىنتىماقتاستىق جانە دامۋ ۇيىمى باس حاتشىسى:

- ءبىز كوروناۆيرۋستى جەڭسەك عانا الەم ەكونوميكاسىن تەزدەتىپ قالپىنا كەلتىرىپ، حالىقتى الەۋمەتتىك تۇراقسىزدىقتان ساقتاي الامىز. ءار ەلدىڭ ۇكىمەت ىندەتتىڭ كاسىپورىندارعا كەرى اسەرىمەن كۇرەستى جالعاستىرا بەرۋى ءتيىس. مەملەكەتتىك قولداۋ ۆاكسينا شىعارىلعاننان كەيىن دە جۇرگىزىلە بەرۋى قاجەت.