اتىراۋدا پوليتسەيلەر قاشقان جۇرگىزۋشىنى وق اتىپ توقتاتتى

اتىراۋ. قازاقپارات - اتىراۋ وبلىسىندا پوليتسەيلەر تابەلدىك قارۋدان وق اتتى، دەپ حابارلايدى قازاقپارات.

بۇل وقيعا بۇگىن تۇنگى ساعات 01:00 شاماسىندا جىلىوي اۋدانىنداعى مايكومگەن اۋىلىنىڭ ماڭىندا بولعان. پوليتسيا قىزمەتكەرلەرىنىڭ توقتاۋ تۋرالى زاڭدى تالابىنا «ۋاز 390945-441» كولىگىنىڭ جۇرگىزۋشىسى باعىنباعان.

«پوليتسەيلەردەن قاشقان كولىكتەگى جولاۋشىلارىنىڭ ءبىرى وق اتقان. ءتارتىپ ساقشىلارى تابەلدىك قارۋدان الدىمەن اسپانعا، سودان كەيىن دوڭگەلەكتەرگە ءبىر رەت ەسكەرتۋ رەتىندە وق اتقاننان كەيىن عانا «ۋاز» توقتاتىلدى. ناتيجەسىندە وقيعا ورنىندا ماڭعىستاۋ وبلىسى، بورانقۇل اۋىلىنىڭ 1995 -جىلى تۋعان تۇرعىنى كۇدىكتى رەتىندە ۇستالدى. ودان 16 كاليبرلى «ي ج» ماركالى تىركەلمەگەن اڭشى مىلتىعى تاركىلەندى»، - دەدى اتىراۋ وبلىستىق پوليتسيا دەپارتامەنتىنىڭ باستىعى، پوليتسيا پولكوۆنيگى قامزا ۇمبەتقاليەۆ.

قازىر ۇستالعان ازامات تەرگەۋ يزولياتورىنا قاماۋعا الىندى.

ەسكە سالا كەتەلىك، بۇدان بۇرىن اتىراۋدا ماس كۇيدە كولىك جۇرگىزگەن شەتەلدىك 15 كۇنگە قامالعان بولاتىن.

اۆتور: بەك مۇستافا