اتىراۋ وبلىسىندا ءمۇيىزدى ءىرى قارانىڭ نەدەن قىرىلعانى انىقتالدى

اتىراۋ. قازاقپارات - اتىراۋ وبلىسىنىڭ يندەر اۋدانىندا ءمۇيىزدى ءىرى قارانىڭ نەدەن قىرىلعانى انىقتالدى، دەپ حابارلايدى قازاقپارات.

وڭىرلىك كوممۋنيكاتسيالار قىزمەتىنىڭ اقپاراتىنا سۇيەنسەك، بۇدان بۇرىن يندەر اۋدانىنىڭ جارسۋات اۋىلىنداعى قۋرايلى ساي كانالى مەن ايدىن ۋچاسكەسىندەگى ەگىستىك القابىندا ​ 13 ءمۇيىزدى ءىرى قارانىڭ ءولىمى تىركەلگەن. وبلىستىق مال دارىگەرلىك ​ زەرتحاناسىنا جىبەرىلگەن ساراپتاما ناتيجەسىنە سايكەس، سيىرلاردىڭ ءولىمى ەگىستىك القابىندا جينالماي قالعان پيازدى شامادان تىس جەۋ سالدارىنان بولعان.

«يندەر اۋداندىق ۆەتەريناريالىق ينسپەكتسياسى مەن ۆەتەريناريالىق ستانساسىنىڭ ماماندارى ​ ولگەن مالدى ​ ەرەجەگە سايكەس سويىپ، تەكسەرۋ جۇرگىزدى. سونىڭ قورىتىندىسىندا ءمۇيىزدى ءىرى قارانىڭ پيازدى شامادان تىس مولشەردە جەپ، اس قورىتۋ جولدارى قىزمەتىنىڭ ناشارلاۋىنان ولگەنى انىقتالدى. زەرتحانالىق ساراپتاۋ ناتيجەسىندە مالدىڭ ىشكى قۇرىلىسىندا نيترات، نيتريت جانە الكولويدتتەر قالىپتى جاعدايدا بولعان»- دەيدى يندەر اۋداندىق اكىمىنىڭ ​ ورىنباسارى سالاۋات وتەعۇلوۆ.

قازىر يندەر اۋدانىنىڭ اكىمدىگى ەگىستىك القابىنداعى ءونىمىن ۋاقىتىلى جيناماعان جەكە كاسىپكەرگە اكىمشىلىك شارا قولدانۋ تۋرالى اۋداندىق پروكۋراتۋرا مەن وبلىستىق جەردىڭ قورعالۋى مەن پايدالانۋىن باقىلاۋ باسقارماسىنا حات جولدادى.