شۋ اۋدانىندا بۋكمەكەرلىك كەڭسەگە قارۋلى شابۋىل جاساعان كۇدىكتىلەر ۇستالدى

تاراز. قازاقپارات - جامبىلدىق پوليتسەيلەر بۋكمەكەرلىك كەڭسەگە قاراقشىلىق شابۋىل جاساعان كۇدىكتىلەردى ۇستادى، - دەپ حابارلايدى قازاقپارات ءتىلشىسى.

جامبىل وبلىسى پوليتسيا دەپارتامەنتىنىڭ قىزمەتكەرلەرى شۋ اۋدانىنداعى بۋكمەكەرلىك كەڭسەلەردىڭ بىرىنە قاراقشىلىق شابۋىل جاساعان اۋداننىڭ ەكى تۇرعىنىن قولعا ءتۇسىردى. بۇل تۋرالى دەپارتامەنتتىڭ باسپا ءسوز قىزمەتى حابارلادى.

«جامبىل وبلىسى شۋ اۋدانىنىڭ پ ب كەزەكشى بولىمىنە ساعات تاڭعى 04:30 دا بەلگىسىز تۇلعالاردىڭ بۋكمەكەرلىك كەڭسەگە كىرىپ، كاسسيردى قورقىتىپ، اقشا الىپ كەتكەنى تۋرالى حابارلاما كەلىپ ءتۇستى. تەرگەۋ بارىسىندا جاس جىگىتتەردىڭ پلاستيكالىق تەرەزەنى سىعىمداۋ ارقىلى بۋكمەكەرلىك كەڭسەگە كىرىپ، كاسسيرگە بەلگىسىز قارۋ قولدانۋ ارقىلى 773 مىڭ تەڭگە كولەمىندەگى اقشانى يەمدەنگەنى انىقتالدى. وسىدان كەيىن ولار بەلگىسىز باعىتقا قاشىپ كەتكەن»، - دەلىنگەن حابارلامادا.

ىزدەستىرۋ ءىس- شارالارىنىڭ ناتيجەسىندە جامبىل وبلىسىنىڭ پوليتسەيلەرى كۇدىكتىلەردى انىقتاپ، ۇستاعان. ولار بۇرىن سوتتى بولعان جامبىل وبلىسىنىڭ 23 جانە 24 جاستاعى تۇرعىندارى بولىپ شىقتى. جاۋاپ الۋ بارىسىندا ۇستالعاندار ءوز كىنالارىن مويىنداعان. پوليتسيا دەپارتامەنتىنىڭ حابارلاۋىنشا، قازىرگى تاڭدا اتالعان دەرەككە قاتىستى ق ر ق ك 192-بابىنىڭ 3-بولىگىمەن (قاراقشىلىق) سوتقا دەيىنگى تەرگەۋ باستالعان. كۇدىكتىلەر ۋاقىتشا ۇستاۋ يزولياتورىنا قاماۋعا الىنىپتى. تەرگەۋ امالدارى جۇرگىزىلۋدە، ۇستالعانداردىڭ باسقا دا وسىعان ۇقساس قىلمىستارعا قاتىستىلىعى تەكسەرىلۋدە.