ەلوردادا مەديتسينالىق ۋنيۆەرسيتەتكە وقۋعا تۇسىرەمىن دەپ پارا العان كۇدىكتى ۇستالدى

نۇر- سۇلتان. قازاقپارات - استانا پوليتسەيلەرى ازاماتتاردى ۋنيۆەرسيتەتكە گرانتقا وقۋعا تۇسىرەمىن دەپ الداعان الاياقتى قولعا ءتۇسىردى، دەپ حابارلايدى قازاقپارات نۇر- سۇلتان قالالىق پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

پوليتسياعا ەلوردا تۇرعىنى ارىزدانعان. ايەلدىڭ ايتۋىنشا، ونىڭ تانىسى نۇر- سۇلتان قالاسىنداعى مەديتسينالىق ۋنيۆەرسيتەتكە وقۋ گرانتىن الىپ بەرەمىن دەپ ۋادە بەرىپ، 2,5 ميلليون تەڭگە سىياقى سۇراعان. اقشانى قولىنا العان سوڭ بايلانىستى سيرەتىپ، كەيىن مۇلدەم حابارسىز كەتكەن. كەيىنىرەك، ۋادە ەتىلگەن گرانت الاياقتىڭ ارباۋى ەكەنىن تۇسىنگەن ايەل پوليتسياعا جۇگىندى.

پوليتسيا قىزمەتكەرلەرى جەدەل- ىزدەۋ شارالارى كەزىندە كۇدىكتىنى قولعا ءتۇسىردى. ول 33 جاستاعى قالا تۇرعىنى بولىپ شىقتى. ەر ادام كىناسىن تولىعىمەن مويىنداپ، اقشانى قاجەتىنە جۇمساپ ۇلگەرگەنىن ايتقان. وسى فاكت بويىنشا ق ر ق ك 190-بابى («الاياقتىق» ) بويىنشا سوتقا دەيىنگى تەرگەۋ ءجۇرىپ جاتىر. ونىڭ وسى سەكىلدى وزگە دە قىلمىستارعا قاتىسى بار- جوعى تەكسەرىلىپ جاتىر.