دونالد ترامپتىڭ قىزى ساياسي مانسابىن باستاۋى مۇمكىن – ب ا ق

نۇر -سۇلتان. قازاقپارات – ا ق ش پرەزيدەنتى دونالد ترامپتىڭ قىزى جانە كەڭەسشىسى يۆانكا اكەسى مەملەكەت باسشىسى قىزمەتىنەن كەتكەننەن كەيىن ساياسي مانسابىن باستاۋى مۇمكىن، - دەپ حابارلايدى ريا نوۆوستي.

Washington Post باسىلىمى ترامپ وتباسىنداعى دەرەككوزگە سىلتەمە جاساي وتىرىپ، يۆانكا ءوزىن قانداي دا ءبىر ساياسي لاۋازىمعا ۇسىنۋ نەمەسە رەسپۋبليكالىق ساياسي پارتيا شەڭبەرىندە ىقپالىن نىعايتۋ ارقىلى ساياسي مانسابىن جالعاستىرۋدى ويلاپ جاتقانىن جازادى.

الايدا دونالد ترامپتىڭ قىزى «پرەزيدەنت سايلاۋىنا قاتىسۋى مۇمكىن بە؟» دەگەن سۇراققا تىكەلەي جاۋاپ بەرۋدەن جالتارىپ وتىر.

باسىلىم مالىمەتىنە سايكەس، يۆانكا ترامپ ا ق ش پرەزيدەنتىنىڭ كەڭەسشىسى رەتىندە جۇمىس ىستەگەن 4 جىل ىشىندە كوپتەگەن ادام ونى «ليبەرال كوزقاراستاعى ايگىلى نيۋ-يورك تۇرعىنى» رەتىندە قازىرگى ا ق ش پرەزيدەنتىن سابىرعا شاقىرادى دەگەن ويدا بولعان. الايدا ول «امەريكا بيىك بەلەستى باعىندىرادى» باعدارلاماسىن قولداپ، دونالد ترامپتىڭ جاقىن جاقتاستارىنىڭ بىرىنە اينالعان. بۇل تۋرالى يۆانكا Fox News تەلەارناسى بەرگەن سۇحباتىندا ايتقان.

«مەنىڭ ويىمشا، ول ساياساتتا قالعىسى كەلسە، ونى ادامدار قولدايدى. ءبىراق ساياساتتا قالۋ، سايلاۋعا ءتۇسۋ ەمەس»، - دەيدى اق ۇيدە جۇمىس ىستەگەن بۇرىنعى شەنەۋنىك.

«ول ا ق ش-تىڭ ءبىرىنشى ايەل پرەزيدەنتى بولعىسى كەلەدى دەپ ويلايمىن. يۆانكا ەشقاشان سانگە قىزىعۋشىلىق تانىتپاعان. ءبىراق ءبارى بارىنشا كەز كەلگەن بيلىكتى الۋ تۇرعىسىنان قاراستىرىلادى»، - دەيدى يۆانكا ترامپتىڭ بۇرىنعى كرەاتيۆتى ديرەكتورى ماريسسا ۆەلەس كراكسبەرگەر.

ايتا كەتەيىك، وسىعان دەيىن ا ق ش پرەزيدەنتى دونالد ترامپ دجو بايدەن بيلىككە كەلگەن كەزدە ونى ادىلەت مينيسترلىگى ارقىلى جازالاۋى مۇمكىن ەكەنىن ويلاپ، الاڭدايتىنى حابارلانعان ەدى. ول ءۇشىن دجو بايدەن ترامپتىڭ 3 بالاسى: كىشى دونالد ترامپ، ەريكا ترامپ، يۆانكا ترامپ جانە ونىڭ كۇيەۋى دجارەد كۋشنەردى تاڭداۋى مۇمكىن.

الدىن الا مالىمەتتەر بويىنشا ترامپ دەموكرات دجو بايدەننىڭ پرەزيدەنت سايلاۋىندا جەڭگەنىن مويىنداماي وتىر.

Tengrinews.kz