الماتىدا بىتىمگەرلەر دايىندايتىن قازاقستان - ءۇندىستان سىنىبى اشىلدى
بۇل شارا قازاقستان مەن ءۇندىستان اراسىنداعى قورعانىس جانە بىتىمگەرشىلىك سالاسىنداعى ەكىجاقتى ىنتىماقتاستىقتى ودان ءارى دامىتۋ شەڭبەرىندە ۇيىمداستىرىلعان، دەپ حابارلايدى قازاقپارات ءتىلشىسى.
شاراعا ق ر قورعانىس ءمينيسترىنىڭ ورىنباسارى، گەنەرال- مايور مۇحامەدجان تالاسوۆ، ءۇندىستاننىڭ قازاقستانداعى توتەنشە جانە وكىلەتتى ەلشىسى پرابحات كۋمار مىرزا، سونداي-اق، اسكەري ديپلوماتيالىق كورپۋستىڭ وكىلدەرى قاتىستى. بۇگىنگى كۇنى ورتالىقتا قازاقستان قارۋلى كۇشتەرىنىڭ بىتىمگەرشىلىك كۇشتەرى وقۋدان ءوتىپ جاتىر.
تاجىربيەلى نۇسقاۋشىلار جاۋىنگەرلىك دايىندىق باعدارلاماسى بويىنشا پسيحولوگيالىق جانە اعىلشىن ءتىلى تەستىنەن، تەوريا مەن پراكتيكادان وتەتىن اسكەري قىزمەتكەرلەرمەن جان-جاقتى جۇمىس ىستەپ جاتىر. بارلىق دايىندىق حالىقارالىق ستاندارتتارعا سايكەس جۇزەگە اسىرىلادى. ءار ءتۇرلى بىتىمگەرشىلىك ميسسيالاردا بولعان اسكەري قىزمەتشىلەر دە ءوز تاجىريبەلەرىن بولاشاق بىتىمگەرشىلىك كۇشتەرگە ۇيرەتۋدە. سونىمەن قاتار، ەكىجاقتى كەزدەسۋ بارىسىندا گەنەرال- مايور مۇحامەدجان تالاسوۆ پەن پرابحات كۋمار مىرزا ءۇندى كونتينگەنتى قۇرامىنداعى قازاقستاندىق بىتىمگەرشىلىك كومپانيانىڭ بۇۇ ميسسياسىنا قاتىسۋىن، سونداي-اق قورعانىس سالاسىنداعى ەكىجاقتى ىنتىماقتاستىقتى ودان ءارى دامىتۋ ماسەلەلەرىن تالقىلادى.
«ءبىز ءۇندى تاراپىنان قازاقستاندىق اسكەري قىزمەتشىلەردىڭ بۇۇ بىتىمگەرشىلىك ميسسيالارىنا پراكتيكالىق قاتىسۋ جوسپارلارىن جوعارى باعالايمىز. وسى تۇرعىدا العاشقى بىرلەسكەن قازاقستان- ءۇندى بىتىمگەرشىلىك اۋديتورياسىنىڭ اشىلۋى قازاقستاننىڭ بىتىمگەرشىلىك الەۋەتىن نىعايتۋ تاريحىنىڭ شەجىرەسىندە جازىلاتىن بولادى. بۇل قادام قازاقستان مەن ءۇندىستاننىڭ قورعانىس ۆەدومستۆولارىنىڭ بەيبىتشىلىك پەن قاۋىپسىزدىكتى نىعايتۋ ماقساتىندا قارىم- قاتىناستى ودان ءارى دامىتۋعا دەگەن قىزىعۋشىلىعىن راستايدى»، - دەدى قورعانىس ءمينيسترىنىڭ ورىنباسارى.
ءوز كەزەگىندە، پرابحات كۋمار قازاقستان ءۇندىستاننىڭ قورعانىس سالاسىنداعى نەگىزگى سەرىكتەسى ەكەنىن اتاپ ءوتتى جانە كاسىبي شەبەرلىك پەن جاۋىنگەرلىك دايارلىقتى جوعارى باعالادى.
اۆتور: الما مۇقانوۆا