سەناتور سولتۇستىك وڭىرلەرگە قونىس اۋدارۋشىلاردىڭ ماسەلەسىنە الاڭداۋشىلىق ءبىلدىردى

نۇر-سۇلتان. قازاقپارات - سەناتور ايگۇل قاپباروۆا كوشى-قون پروتسەستەرىن ىسكە اسىرۋداعى مەملەكەتتىك شارالار مەن تەتىكتەرگە قاراماستان، وڭىرلەردەگى كوشى-قون پروبلەمالارى تولىق شەشىلمەي وتىرعانىنا الاڭداۋشىلىق ءبىلدىردى.

بۇل تۋرالى سەناتور دەپۋتاتتىق ساۋالىندا جازدى، دەپ حابارلايدى قازاقپارات.

«2018-2019 -جىلى جانە وسى جىلدىڭ 9 ايىندا سولتۇستىك قازاقستان وبلىسىنا وڭتۇستىك وڭىردەن 5123 ادام قونىس اۋدارعان بولسا، وڭىردەن 10 مىڭعا جۋىق ادام كوشىپ كەتكەن. وسى وبلىستا سوڭعى جىلدارى مەكتەپتەر جابىلىپ، عيماراتتارى اۋكسيونعا قويىلىپ ساتىلۋدا»، - دەدى ايگۇل قاپباروۆا سەناتتىڭ جالپى وتىرىسىندا.

سوڭعى 5 جىلدا ەلدەن 189765 ادام قونىس اۋدارسا، 70933 ەتنيكالىق قازاق كوشىپ كەلدى. ايىرماشىلىق 118832 ادامدى قۇرايدى. قازاقستاننان شەتەلگە تۇراقتى تۇرۋعا كەتەتىندەردىڭ %43,8 ىن 15 پەن 34 جاسقا دەيىنگى جاستار قۇرايتىندىعى الاڭداتادى. سەناتور سىرتقى كوشى قوننىڭ سانىن ازايتۋ ءۇشىن ىشكى كوشى قون ۇدەرىسىندەگى ەڭبەك تەڭگەرىمىن تۇراقتى جانە ءتيىمدى قالپىن ساقتاۋ ماڭىزدى ەكەنىن ايتا كەلىپ، ەل اۋماعىنىڭ ءبىرتۇتاستىعى ءۇشىن وڭتۇستىكتەن سولتۇستىك ايماقتارعا باعىتتالعان كوشى-قون ءۇردىسىن جالعاستىرۋ كەرەك دەپ سانايدى.

«قونىس اۋدارۋشىلار ءۇشىن مەملەكەت بەرەتىن تۇرعىن ۇيلەردىڭ كوپشىلىگى قازىرگى زامانعى ءومىر ءسۇرۋ ستاندارتتارىنا، نورمالارعا سايكەس كەلمەيدى. كەيبىر ۇيلەر قونىس اۋدارۋشىلاردىڭ ايتۋىنشا، اپاتتى جاعدايدا تۇر. قونىس اۋدارۋشىلاردىڭ كاسىپكەرلىك قىزمەتپەن اينالىسۋعا قولداۋ كورسەتۋدىڭ كەيبىر تەتىكتەرى جەتكىلىكسىز»، - دەدى سەناتور ا. قاپباروۆا.

سەناتور دەپۋتاتتىق ساۋالدا حالىقتى كوشىرۋدىڭ ارنايى مەملەكەتتىك نەمەسە وڭىرلىك باعدارلاماسىن ازىرلەۋدى ۇسىنىپ وتىر. سەبەبى قازىرگى تاڭدا حالىقتى كوشىرۋ پروتسەسى «ەڭبەك» ناتيجەلى جۇمىسپەن قامتۋ باعدارلاماسىنىڭ ءبىر بولىگى عانا. بۇل باعدارلاما قونىستاندىرۋ بارىسىندا تۋىندايتىن مىندەتتەر مەن ماسەلەلەردىڭ بارلىق سپەكترىن شەشپەيدى جانە قامتىمايدى.

«ءوڭىرارالىق كوشى- قون پروتسەسىندە جاس وتباسىلارعا ەلەۋلى كوڭىل ءبولىنىپ، مەملەكەتتىك قولداۋدىڭ ناقتى تەتىكتەرى جۇزەگە اسىرۋ كەرەك»، - دەدى دەپۋتات.

سەناتور قونىس اۋدارۋشىلار ءۇشىن تۇرعىن ءۇي بەرۋدىڭ ناقتى تەتىگىن پىسىقتاۋدى، بيۋروكراتيالىق كەدەرگىسىز جەر ۋچاسكەلەرىن بەرۋ، قونىس اۋدارۋشىلاردى جيناقى قونىستاندىرۋ ءۇشىن جەكە تۇرعىن ءۇي سالۋعا جەڭىلدەتىلگەن نەسيە بەرۋ كەرەكتىگىن اتاپ ءوتتى. سونداي-اق «ءبىر تەرەزە» قاعيداتى بويىنشا قونىس اۋدارۋشىلار تۋرالى دەرەكتەردىڭ ءبىرىڭعاي اۆتوماتتاندىرىلعان اقپارات جۇيەسىن ەنگىزۋ قاجەتتىگى ايتىلدى.

اۆتور: رۋسلان عابباسوۆ