قالا مارتەبەسىنەن ايىرىلعان ەلدى مەكەن تۇرعىندارىنىڭ جالاقىسىنا ۇستەماقى قوسىلادى

نۇر-سۇلتان. قازاقپارات - پارلامەنت سەناتىنىڭ جالپى وتىرىسىندا «قازاقستان رەسپۋبليكاسىنىڭ اكىمشىلىك- اۋماقتىق قۇرىلىسى تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭى قابىلداندى، دەپ حابارلايدى قازاقپارات ءتىلشىسى.

زاڭ جوباسى ءبىرقاتار پارلامەنت دەپۋتاتتارى باستاماشىلىعىمەن ازىرلەنگەن.

«اتالعان زاڭ جوباسى قازاقستان رەسپۋبليكاسىنىڭ اكىمشىلىك- اۋماقتىق قۇرىلىمى سالاسىنداعى زاڭنامانى جەتىلدىرۋدى كوزدەيدى جانە ەلىمىزدىڭ اكىمشىلىك- اۋماقتىق بىرلىكتەرىنىڭ، ونىڭ ىشىندە اۋداندىق ماڭىزى بار قالالاردىڭ اعىمداعى مارتەبەسىن تولىق كولەمدە قامتۋعا باعىتتالعان. قولدانىستاعى «قازاقستان رەسپۋبليكاسىنىڭ اكىمشىلىك- اۋماقتىق قۇرىلىسى تۋرالى» زاڭىنا سايكەس اۋداندىق ماڭىزى بار قالالارعا حالىق سانى 10 مىڭ ادامنان كەم ەمەس ەلدى مەكەندەر جاتادى. قازىرگى ۋاقىتتا 48 اۋداندىق ماڭىزى بار قالانىڭ 13 ى حالىقتىڭ سانى بويىنشا قالا مارتەبەسىنە سايكەس كەلمەيدى، ياعني وسى اۋداندىق ماڭىزى بار قالالاردا تۇرعىندار سانىنىڭ ازدىعىنا بايلانىستى ولاردىڭ مارتەبەسىن وزگەرتۋ قاجەتتىگى تۋىندادى. الايدا قولدانىستاعى زاڭنامادا اۋداندىق ماڭىزى بار قالانىڭ مارتەبەسىن اۋىل ساناتىنا وزگەرتۋ جونىندە نورما قاراستىرىلماعان»، - دەدى سەناتور نۇرلان بەكنازاروۆ.

وسىعان بايلانىستى وسى زاڭ جوباسىندا اۋداندىق ماڭىزى بار قالالاردى وزگە ەلدى مەكەندەرگە قايتا قۇرۋ جونىندەگى قۇزىرەتتى ايقىندايتىن تۇزەتۋلەر ەنگىزىلىپ وتىر. ەنگىزىلگەن تۇزەتۋدىڭ ۇتىمدى تۇستارىنىڭ ءبىرى - قالا مارتەبەسىنەن اۋىلدىق ەلدى مەكەنگە وزگەرگەن جاعدايدا سوندا تۇراتىن ازاماتتار اۋىل تۇرعىندارى ءۇشىن زاڭدارمەن قاراستىرىلعان مەملەكەتتىك الەۋمەتتىك قولداۋلارعا قول جەتكىزەدى. مىسالى، دەنساۋلىق ساقتاۋ، ءبىلىم بەرۋ، سپورت، مادەنيەت، الەۋمەتتىك قامسىزداندىرۋ سالالارىنىڭ قىزمەتكەرلەرىنىڭ جالاقىسىنا جەرگىلىكتى وكىلدى ورگانداردىڭ شەشىمدەرى بويىنشا 25 پايىزدان كەم ەمەس ۇستەماقى قوسىلادى.

«وعان قوسىمشا تۇرعىندار كوممۋنالدىق تولەمدەرگە، قىزمەتتىك تۇرعىن ۇيگە، «ديپلوممەن اۋىلعا» باعدارلاماسى بويىنشا، «ەڭبەك» باعدارلاماسى بويىنشا كاسىپتىك ءبىلىم الۋ مەن اۋىلدىق جەردە كاسىپكەرلىكتى قولداۋعا، دامىتۋعا قاتىستى ءبىرقاتار جەڭىلدىكتەردى پايدالانا الاتىن بولادى»، - دەدى دەپۋتات.

سونداي-اق، زاڭ جوباسىندا حالىقتى جۇمىسپەن قامتۋداعى ولشەمشارتتاردىڭ ەسكىرۋى مەن ۋاقىت تالابىنا ساي بولماۋىنا بايلانىستى «اۋداندىق ماڭىزى بار قالا»، «كەنت» جانە «اۋىل» ۇعىمدارىنان قوسىمشا ولشەمشارتتاردى الىپ تاستاۋدى كوزدەيتىن تۇزەتۋلەر ۇسىنىلادى. بۇل تۇزەتۋلەر رەداكتسيالىق سيپاتتاعى تۇزەتۋلەر جانە قالالار مەن اۋىلداردىڭ ءومىر تىرشىلىگىنە اسەرىن تيگىزبەيدى.