پەداگوگتاردى دايىنداۋ ىسىنە ءالى كوڭىلىمىز تولمايدى - ءبىلىم ءمينيسترى

None
None
نۇر-سۇلتان. قازاقپارات - ءبىلىم جانە عىلىم ءمينيسترى اسحات ايماعامبەتوۆ جوعارى وقۋ ورىندارىنىڭ باسشىلارىنا پەداگوگتاردى دايىنداۋدا قوسىمشا ۇسىنىستاردى ەنگىزۋدى ۇسىندى، دەپ حابارلايدى قازاقپارات ءتىلشىسى.

«پەداگوگتاردى دايىنداۋ پروبلەماسى وزەكتى ەكەنىن وزدەرىڭىز جاقسى بىلەسىزدەر. شىنى كەرەك، ءالى دە كوڭىلىمىز تولمايدى. «مەكتەپتەر ۋنيۆەرسيتەتتەرگە قاراعاندا باعدارلامالارىن وزگەرتىپ، ۋنيۆەرسيتەتتەر سوعان ۇلگەرمەي جاتىر» دەپ، ءبىزدىڭ مەكتەپتەرىمىز، ءبىلىم باسقارمالارىنىڭ وزدەرى ايتىپ وتىر. ونىمەن كەلىسۋگە نەمەسە كەلىسپەۋگە بولادى. ءبىراق پروبلەما بار ەكەنى انىق. ونى مينيسترلىككە قاراپ وتىرماي، ۋنيۆەرسيتەتتەردىڭ وزدەرى رەتتەۋى ءتيىس. دەربەستىك كەرەك دەدى - بەرىلدى. باعدارلامالاردى وزگەرتۋگە بولادى. ءبىراق سول دەربەستىكتى قاجەتتى دەڭگەيدە قولدانىپ، باعدارلامالاردى وزگەرتىپ، مەكتەپكە كەرەكتى جانە زامانعا ساي مامانداردى شىعارۋ ماسەلەسى وتە وزەكتى»، - دەدى اسحات ايماعامبەتوۆ ءبىلىم جانە عىلىم مينيسترلىگىنىڭ اپپاراتتىق وتىرىسىندا.

مينيستر ايتسە دە كەيبىر جوعارى وقۋ ورىندارىنىڭ تاجىريبەسىنە وڭ كوزقاراسىن ءبىلدىردى. «ءبىراق نەگىزىندە وقۋ- ادىستەمەلىك بىرلەستىكتىڭ ەڭ باستى ماقساتى - بارلىق ماماندىق بويىنشا دايىنداپ جاتقان ج و و- لاردىڭ جۇمىسىن ۇيلەستىرۋ. كاسىپتىك ستاندارتتى دايىنداۋ كەرەك. جالپى ءبىلىم باعدارلامالارىن جاڭارتىپ، جۇيەلى تۇردە وزگەرىستەردى ەنگىزۋ كەرەك. بىرىنشىدەن وسى جۇمىستى جالعاستىرۋدى تاپسىرامىن. ەكىنشىدەن، كۇنى كەشە عانا مەن ارىپتەستەرىمىزبەن، دەكاندارمەن، كافەدرا مەڭگەرۋشىلەرىمەن، قاراپايىم وقىتۋشىلارمەن پەداگوگيكالىق ءبىلىمدى دامىتۋ بويىنشا كەزدەستىم. سوندا ءبىز ەمىن- ەركىن ەكى ساعاتتاي وسى ماسەلەلەردى تالقىلادىق. سوندا دا وسى ماسەلەلەر كوتەرىلدى. قاجەت بولسا وقۋ ادىستەمەلىك بىرلەستىكتىڭ ءارتۇرلى باعىتتارى بويىنشا ۇيلەستىرۋ قۇقىعىن مۇمكىن باسقا ۋنيۆەرسيتەتتەرگە دە بەرەتىندەي قاراستىرىپ، ءتيىستى ۇسىنىستاردى ەنگىزىڭىزدەر»، - دەپ ءتۇيدى اسحات ايماعامبەتوۆ.

اۆتور: ايان بەكەن ۇلى

سوڭعى جاڭالىقتار