نۇرسۇلتان نازاربايەۆ: بۇكىل ءومىرىمدى قازاقستاننىڭ تاۋەلسىزدىگىنە ارنادىم

نۇر-سۇلتان. قازاقپارات - ەلباسى نۇرسۇلتان نازاربايەۆ «Qazaqstan» ۇلتتىق ارناسىنداعى «تۇركىستان: كونە مەن كەلەشەك كوپىرى» دەرەكتى فيلمىندە بۇكىل ءومىرىن قازاقستاننىڭ تاۋەلسىزدىگىنە ارناعانىن ءمالىم ەتتى، دەپ حابارلايدى قازاقپارات ءتىلشىسى.

«ءبىزدىڭ قازىرگى زاماندا عالىمدار، ساراپشىلار «بارلىعىن بىلەمىز، ءبارىن دە يگەرەمىز» دەپ ويلايدى. ءبىراق ەشكىم وسىنداي ۆيرۋس كەلەدى دەپ ويلاعان جوق. ءبىر جەردەن شىقتى - ول ەندى تابيعاتتىڭ قۇبىلىسى. ءالى دە وندايلار بولۋى مۇمكىن. سوندىقتان ادام ءبارىن يگەردى، بارلىعىن ءبىلدى دەپ ايتۋعا بولمايدى. جاستارعا ءسوزىمدى ىلعي ايتىپ كەلەم. قازىرگى ايتارىم، مەن بۇكىل ءومىرىمدى قازاقستاننىڭ تاۋەلسىزدىگىنە سارپ ەتىپ كەلە جاتىرمىن. كەڭەس وكىمەتى كەزىندە 5 جىل قازاقستاننىڭ ۇكىمەتىن باسقاردىم. 30 جىل پرەزيدەنت بولدىم. 35 جىل بويى تىنباي، كۇندىز-ءتۇنى وسى جۇمىستى ىستەپ كەلە جاتىرمىز. ەلىمىزدىڭ، قازاقتىڭ، اتا- بابامىزدىڭ ارمانى - تاۋەلسىزدىك. قولىمىزعا كەلدى. ول بولماسا تۇك بولمايدى. ول بولماسا تاعى دا بودان بولامىز. ول بولماسا ءبىزدىڭ ءتىلىمىز، ءدىنىمىز بولمايدى. ول بولماسا ءبىزدى باسقالار باسقارادى»، - دەدى ەلباسى.

نۇرسۇلتان نازاربايەۆ بۇل ءسوزى ناسيحات ەمەس، شىنىمەن جادىنان، جانىنان ايتىپ وتىرعانىن اتاپ ءوتتى.

«جالپى قانشا ايتساق تا قازاق دەگەن باسقالارمەن سالىستىرعاندا ات توبەلىندەي حالىقپىز. ەكى جاعىمىزدا ەكى الىپ مەملەكەت تۇر. ءبىر جارىم ميللياردتىق قىتاي مىنا جاعىمىزدا، رەسەي مىنا جاعىمىزدا. ولاردىڭ ساياساتى بولاشاقتا قالاي بولادى؟ مەن ەندى قولىمنان كەلگەنشە شەكارانى شەگەندەپ، بارلىق توڭىرەكپەن دوستىق قارىم-قاتىناس جاسادىم. قازاقستاننىڭ جاۋى جوق قازىر. ال زامان وزگەرەدى، ەل مەن جۇرت وزگەرەدى. نە بولادى؟ سول تاۋەلسىزدىگىمىزدى كورە الماي، قازىردىڭ وزىندە كوز تىگىپ وتىرعاندار بار. سەبەبى ءبىز ەكونوميكا، رەفورما جاعىنان ءتورت-توڭىرەگىمىزدەن وزىپ كەتتىك. ارينە، ونىڭ بارىنە قىزعانىشپەن قارايدى. سوندىقتان تاۋەلسىزدىگىمىزدى ساقتاپ قالۋىمىز كەرەك»، - دەدى ول.