ەلباسى مۋزەيىنىڭ جاڭا عيماراتىندا قانداي جادىگەرلەر بار؟

نۇر-سۇلتان. قازاقپارات - جاقىندا ەلورداداعى ن. نازاربايەۆ ورتالىعىنىڭ جانىنان ق ر تۇڭعىش پرەزيدەنتى - ەلباسى مۋزەيىنىڭ جاڭا عيماراتى اشىلعان بولاتىن.

قازاقپارات اگەنتتىگى تۇڭعىش پرەزيدەنت كۇنىنە وراي، جاڭا عيماراتتان فوتورەپورتاج ۇسىنادى.

ءۇش قاباتتى عيماراتتىڭ جالپى اۋماعى 40 مىڭ شارشى مەتردەن اسادى، ونى «SEMBOL» تۇرىك كومپانياسى سالعان.

كىرەبەرىس ۆەستيبيۋلدىڭ بيىكتىگى 18 مەترگە جەتەدى. مۋزەيدى جوبالاۋدا ساۋلەتشىلەر اق تاس پەن ءمولدىر اينەككە باسىمدىق بەرىپ، زاماناۋي ساۋلەتتىڭ سۇلۋلىعى مەن جاڭا تەحنولوگيالىق شەشىمدەردى بىرىكتىرگەن.

مۋزەي اينالاسىنداعى ساياباقتى دا ەرەكشە اتاپ وتۋگە بولادى. مۇنداعى الۋان ءتۇرلى اعاشتار مەن ىڭعايلى جولدار ەلوردا قوناقتارى مەن تۇرعىندارىنىڭ سۇيىكتى دەمالىس ورنىنا اينالۋدا. مۋزەي ەكسپوزيتسيالارىندا ەلباسى ن. ءا. نازاربايەۆتىڭ ءومىرى مەن قىزمەتى ارقىلى قازاقستان ازاماتتارىنىڭ ەڭبەگى مەن جەتىستىكتەرى كورسەتىلگەن. ءبىرىنشى قاباتتا مۋزەي ەكسپوزيتسيالارى، كورمە زالدارى، مۋزەي قورى قويماسى، كىتاپحانا جانە ينتەراكتيۆتى وقۋ زالى ورنالاسسا، ەكىنشى قاباتتا - شارا وتكىزۋگە ارنالعان ەكى مىڭ ورىندىق كوپفۋنكتسيونالدى زال، ءۇشىنشى قاباتتا - كوۆوركينگ ورتالىعى مەن اكىمشىلىك كەڭسەلەر ورنالاسقان.

اتريۋمعا كىرگەندە ەلباسى ن. ءا. نازاربايەۆتىڭ ب ۇ ۇ باس اسسامبلەياسى مەن قاۋىپسىزدىك كەڭەسىنىڭ رەسمي قۇجاتى مارتەبەسىن العان «الەم. XXI عاسىر» مانيفەسىن كورۋگە بولادى.

وسىلايشا تۇڭعىش پرەزيدەنت ارقىلى ءبىزدىڭ ەلىمىز حالىقارالىق قاۋىمداستىققا بەيبىتشىلىك پەن جاسامپازدىققا ۇمتىلىسىن كورسەتتى. مۋزەيدە 7 زال ورنالاسقان جانە ونىڭ ءبىرىنشىسى «ەلباسىنىڭ بالالىق شاعى» جانە «تۇلعانىڭ قالىپتاسۋ جولى» دەپ اتالادى.

ن. نازاربايەۆ 1940-جىلى 6- شىلدەدە الماتى وبلىسى قاسكەلەن اۋدانى شامالعان اۋىلىندا دۇنيەگە كەلگەن. زالدا قازاقستاندىق سۋرەتشىلەردىڭ ەلباسىنىڭ اتا-اناسى ءابىش جانە ءالجان نازاربايەۆتار بەينەلەنگەن تۋىندىلارى قويىلعان.

كلاسسيكالىق ەكسپوزيتسيالىق شەشىمدەر مەن زاماناۋي تەحنولوگيالاردىڭ سينتەزى ارقىلى مۇندا ەلباسىنىڭ تۇلعا بولىپ قالىپتاسقان ءداۋىرى جاڭعىرتىلدى. زالدا ەلباسىنىڭ بالالىق شاعى، مەكتەپتەگى جىلدارى، ەڭبەك جولىنىڭ باستالۋى مەن ساياسي مانساپ كەزەڭدەرىن كورۋگە بولادى.

سونىمەن بىرگە، بۇل زالدا ن. نازاربايەۆتىڭ شەجىرەسىنەن باستاپ، مەكتەپ پەن ۋچيليشەدەگى، ينستيتۋت پەن جۇمىس ورنىنداعى جەتىستىكتەرىن، بەلسەندى پارتيالىق-كومسومول جۇمىستارى مەن قازاق س س ر مينيسترلەر كەڭەسىنىڭ ءتوراعالىعى، قازاقستان كومپارتياسى و ك ءبىرىنشى حاتشىلىعى جانە ەل پرەزيدەنتتىگىنە دەيىنگى كەزەڭدەردى تاماشالاۋعا بولادى.

مۋزەيدەگى ەكىنشى زال «پرەزيدەنت جولى» دەپ اتالادى. بۇل زال 1992-جىلى 4- ماۋسىمدا قابىلدانعان ەلىمىزدىڭ مەملەكەتتىك رامىزدەرىمەن اشىلادى.

ودان بولەك، كونستيتۋتسيا مەن قازاقستان اسكەرى، التىن ادام، تەڭگەنىڭ شىعارىلۋى جانە قازاقستان حالقى اسسامبلەياسىنىڭ قۇرىلۋى تۋرالى ارنايى ۆيترينالار جابدىقتالعان.

بۇل زالدا ەلىمىزدىڭ كوپۆەكتورلى ساياسات ۇستانىمىن كورسەتەتىن كارتا ورنالاسقان. تاۋەلسىزدىك جىلدارى قازاقستان الەمنىڭ 183 ەلىمەن ديپلوماتيالىق قارىم-قاتىناس ورناتقان. ءبىزدىڭ ەلىمىز 54 حالىقارالىق جانە 8 وڭىرلىك ۇيىمدارعا مۇشە.

ءۇشىنشى زال «ستراتەگ جولى» دەپ اتالادى، مۇندا ەلباسىنىڭ استانانى اۋىستىرۋ تۋرالى ماڭىزدى شەشىمىنەن باستاپ، ەلوردانىڭ باس جوسپارى، 2030-جىلعا دەيىنگى جولداردىڭ دامۋى كورسەتىلگەن. زال ورتاسىندا «قالانىڭ دامۋى» مەپپينگ- شوۋى كورسەتىلەدى. مەديا- ستولدا پلانشەتتەر ارقىلى ەل استاناسىنىڭ ارحيۆتىك قۇجاتتارى مەن فوتو-ۆيدەو ماتەريالدارى قولجەتىمدى.

ارنايى ينفوگرافيكا ارقىلى قازاقستاننىڭ حالىق سانى، جۇمىسپەن قامتۋ، ۇلتتىق ەكونوميكا، ونەركاسىپ، ساۋدا، كولىك، قۇرىلىس، تۋريزم، قورشاعان ورتا جانە ءبىلىم سالالارىنداعى ءوسۋ قارقىنىن كورۋگە بولادى.

«جاھاندىق كوشباسشى جولى» دەپ اتالاتىن ءتورتىنشى زالدا قازاقستاننىڭ يادروعا قارسى جاھاندىق قوزعالىس جەتەكشىسى ەكەنى، قازاقستاندىق ەتنيكاارالىق جانە كونفەسسياارالىق كەلىسىم ۇلگىسىنىڭ دۇنيە جۇزىندە مويىندالعانى ايتىلادى.

«الەم تانىعان كوشباسشى» فوتوگالەرەياسىندا ن. نازاربايەۆتىڭ وزگە ەلدەردىڭ كوشباسشىلارىمەن تۇسكەن سۋرەتتەرى توپتاستىرىلعان. جەر شارى ماكەتىندە ن. نازاربايەۆتىڭ ب ۇ ۇ باس اسسامبلەياسىندا سويلەگەن سوزدەرى كورسەتىلەدى.

يادرولىق قارۋسىزدانۋ ىسىندەگى جانە بەيبىت باستامالاردى ىلگەرىلەتۋدەگى ەڭبەگى ءۇشىن ەلباسى كوپتەگەن مەملەكەتتىك جانە قوعامدىق ناگرادالارمەن ماراپاتتالدى.

تيىسىنشە مۋزەيگە ۇلى بريتانيانىڭ اۋليە ميحايل جانە اۋليە گەورگيي وردەنى، «شىعىس-باتىس» ينستيتۋتىنىڭ بەيبىتشىلىك جانە پريەۆەنتيۆتى ديپلوماتياسى سىيلىعى، «حيروسيما قالاسىنىڭ ەرەكشە قۇرمەتتى ازاماتى» بەلگىسى، «NTI « قورى ت. تەرنەردىڭ ارنايى سىيلىعى قويىلعان.

«ەلباسى جانە وزگە ەلدەردىڭ كوشباسشىلارى» فوتوگالەرەياسىندا 700 فوتوسۋرەت ارقىلى قازاقستاننىڭ ديپلوماتيالىق تاريحىنىڭ وزىندىك جىلناماسى قالىپتاسقان. سونداي-اق، وسى زالدا ەلباسىعا سىيلانعان ديپلوماتيالىق سىي-سياپاتتار جانە قارۋ-جاراق توپتاماسى قويىلعان.

بەسىنشى زال «دانىشپان جولى» دەپ اتالادى جانە مۇندا «قازاقستان-2030» مەملەكەتتىك ستراتەگياسىنا قاتىستى كورنەكى بۇيىمدار قويىلعان.

ماسەلەن، تاۋ-مەتاللۋرگيالىق كەشەن ەلدەگى نەگىزگى سالالاردىڭ ءبىرى بولىپ سانالادى، الليۋمينيي قورى بويىنشا قازاقستان ت م د ەلدەرى اراسىندا ەكىنشى ورىن الادى. ماشينا جاساۋ مەن مۇناي-گازدى دا ەكونوميكانى ارتتىراتىن درايۆەر دەپ اتاۋعا بولادى.

ەلباسى ستراتەگياسىنىڭ تاعى ءبىر باسىمدىعى - ساپالى ءبىلىم مەن دەنساۋلىق ساقتاۋ بولاتىن. بۇل رەتتە 1993-جىلى ن. نازاربايەۆتىڭ باستاماسىمەن «بولاشاق» ستيپەندياسى بەكىتىلدى.

2019 -جىلى «قازاقستاننىڭ 100 جاڭا ەسىمى» جوباسى جۇزەگە استى. سونىمەن بىرگە، وسى زالدا كەلەشەك عالىمدار مەن زەرتتەۋشىلەرگە مۇرا رەتىندە ەلباسىنىڭ تاڭدامالى ەڭبەكتەرى قويىلعان.

ەلباسى ەڭبەكتەرى الەمنىڭ 30 دان استام تىلىنە اۋدارىلعان جانە شەتەلدىك وقىرماندار اراسىندا دا تانىمال.

ق ر تۇڭعىش پرەزيدەنتى - ەلباسى كىتاپحاناسىنىڭ قورىندا وزگە مەملەكەتتەر باسشىلارى مەن قوعام قايراتكەرلەرى ن. نازاربايەۆقا سىيلاعان كىتاپتار دا قولتاڭبالارىمەن ساقتاۋلى. زال ورتاسىندا «قازاقستان-2050» ستراتەگياسىنا ورىن بەرىلگەن.

2012 -جىلى جەلتوقساندا ن. نازاربايەۆ قازاقستان رەسپۋبليكاسىنىڭ 2050 -جىلعا دەيىنگى دامۋ ستراتەگياسىن ۇسىندى. ونىڭ باستى ماقساتى - مىقتى مەملەكەتتىڭ، دامىعان ەكونوميكانىڭ جانە جالپىعا ورتاق ەڭبەك نەگىزىندە بەرەكەلى قوعام قۇرۋ، قازاقستاندى الەمنىڭ ەڭ دامىعان وتىز ەلىنىڭ قاتارىنا قوسۋ.

وسى ماقساتتا «قازاقستان-2050» ستراتەگياسى ۇزاقمەرزىمدى جەتى باسىمدىقتى ىسكە اسىرۋدى كوزدەيدى. ستراتەگيانىڭ مازمۇنى مەن بولىمدەرى مۋلتيمەديالىق فورماتتا ۇسىنىلعان. التىنشى زالدا قازاقستاننىڭ تاۋەلسىزدىك العان ساتتەن بەرگى ءجۇرىپ وتكەن جولى شوۋ تۇرىندە كورسەتىلەدى.

ال سوڭعى جەتىنشى زال «قازاقستاننىڭ ماقتانىشى دەپ اتالادى. مۋزەي ەكسپوزيتسيالارىنان بولەك، كەلۋشىلەر وزدەرىن حوككەي، بوكس، ۆەلوسپورت نەمەسە اۋىر اتلەتيكا بويىنشا جارىس قاتىسۋشىسى رەتىندە سەزىنىپ، ەلدەگى سپورت پەن مادەنيەتتىڭ دامۋى تۋرالى پايدالى اقپارات الا الادى. «قازاقستاننىڭ سپورتتىق داڭقى» بولىمىندە قازاقستاننىڭ سپورتتاعى جەتىستىكتەرىن جانە جاقسىلىق ۇشكەمپىروۆ، بەكزات ساتتارحانوۆ، سەرىك ساپيەۆ، الەكساندر ۆينوكۋروۆ، داۋلەت تۇرلىحانوۆ، دميتري بالاندين جانە دەنيس تەنگە ارنالعان ۆيترينالار مەن ماراپاتتارىن، جەكە بۇيىمدارىن تاماشالاۋعا بولادى.

«كەلەشەكتەگى سپورت جۇلدىزى» فوتوايماعىندا كەز كەلگەن قوناق قۇرمەت تۇعىرىنا شىعىپ، ەستەلىككە سۋرەتكە تۇسە الادى.

«قازاقستاننىڭ مادەنيەتى» بولىمىندە كيىز ءۇي مەن ۇلتتىق مۋزىكالىق اسپاپتار قويىلعان تاعى ءبىر فوتو- زونا بار.

اقپاراتتىق بولىمشەدە قازاقستاننىڭ ۇلى كومپوزيتورلارى، مۋزىكانتتارى، جازۋشىلارى، سۋرەتشىلەرى، ساۋلەتشىلەرى مەن عالىمدارى تۋرالى مالىمەتتەر جيناقتالعان. مۇندا امىرە قاشاۋبايەۆ، كۇلاش بايسەيىتوۆا، الىبەك دىنىشيەۆ، ەرمەك سەركەبايەۆ، بيبىگۇل تولەگەنوۆا، روزا باعلانوۆا جانە ديماش قۇدايبەرگەن سىندى وتكەن جانە قازىرگى زامانعى ورىنداۋشىلاردىڭ ءانىن تىڭداۋعا بولادى.

ودان بولەك، قوبىز، دومبىرا، جەتىگەن سىندى ۇلتتىق اسپاپتارعا ارنايى ينستاللياتسيا اشىلعان.