ەرىك سۇلتانوۆ: تۇڭعىش پرەزيدەنت كۇنى - قازاقستانداعى حالىق بىرلىگى مەن كەلىسىم كۇنى

نۇر-سۇلتان. قازاقپارات - ەلىمىزدىڭ ءاربىر ازاماتى ءۇشىن تۇڭعىش پرەزيدەنت كۇنىن مەرەكەلەۋدىڭ ماڭىزى زور. بۇل - قازاقستانداعى حالىق بىرلىگى مەن كەلىسىم كۇنى.

پارلامەنت سەناتىنىڭ دەپۋتاتى ەرىك سۇلتانوۆ 1- جەلتوقسان مەرەكەسىنە وراي وسىنداي پىكىر ءبىلدىردى، دەپ حابارلايدى قازاقپارات.

«2012 -جىلدىڭ 1 جەلتوقسانىندا ەلىمىزدە العاش رەت قازاقستان رەسپۋبليكاسى تۇڭعىش پرەزيدەنتىنىڭ كۇنى مەملەكەتتىك مەرەكەسى اتاپ ءوتىلدى. مۇنداي ەلەۋلى كۇن مەملەكەت باسشىسى نۇرسۇلتان ءابىش ۇلى نازاربايەۆتىڭ قازاقستان حالقىنا جانە مەملەكەتىنە سىڭىرگەن وراسان زور ەڭبەگىنە دەگەن قۇرمەت بولىپ تابىلادى. ۇلت كوشباسشىسىنىڭ تۇراقتى جانە جۇيەلى نەگىزدە اتقارىپ كەلە جاتقان ولشەۋسىز ەڭبەگىنىڭ ناتيجەسىندە قازاقستان سەرپىندى دامۋ جولىنا ءتۇستى، ساياسي، ەكونوميكالىق جانە الەۋمەتتىك، ونىڭ ىشىندە دەنساۋلىق ساقتاۋ سالاسى جاڭعىرتىلدى. ق ر تۇڭعىش پرەزيدەنتى كۇنى مەرەكەسىن اتاپ وتە وتىرىپ، ەلباسىمىزعا، مەملەكەتىمىزدىڭ قالىپتاسۋى مەن دامۋىنا قوسقان تاريحي ەڭبەگىنە قۇرمەت كورسەتەمىز»، - دەيدى ە. سۇلتانوۆ.

دەپۋتاتتىڭ ايتۋىنشا، قازاقستاننىڭ جانە تۇڭعىش پرەزيدەنتتىڭ ايرىقشا جەتىستىگى جاڭا ەلوردا - نۇر-سۇلتان قالاسىنىڭ سالىنۋى.

«وتكەن 22 جىل ىشىندە قاتارداعى وبلىس ورتالىعىنىڭ ورنىندا قالا قۇرىلىسى، ساۋلەت سالاسىنداعى بارلىق الەمدىك تالاپتارعا، سونداي- اق وسىنداي دەڭگەيدەگى جانە مارتەبەلى قالالارعا قويىلاتىن باسقا دا تالاپتارعا سايكەس استانالىق فۋنكتسيالارى بار زاماناۋي قالا پايدا بولدى. نۇر-سۇلتان تاۋەلسىز قازاقستاننىڭ كەلبەتىنە اينالدى. ەلوردا بۇكىل رەسپۋبليكا ءومىرىنىڭ رەڭى مەن قارقىنىن بەلگىلەيدى. ەلوردانى كوشىرۋ تاۋەلسىزدىك كەزەڭىندەگى ەلىمىزدىڭ دامۋ بارىسىن ايقىنداپ بەرگەن داۋىرلىك وقيعا بولدى. ن. نازاربايەۆ پرەزيدەنتتىگىنىڭ 30 جىلىندا قازاقستان «ۇلى جەتىستىكتەرگە» قول جەتكىزدى، 1991-جىلدان باستاپ قازاقستان ەكونوميكاسى 20 ەسەگە جۋىق ءوستى، ءبىر جارىم مىڭنان استام مەكتەپ، ەكى مىڭنان استام ەمحانا مەن اۋرۋحانا، مىڭعا جۋىق بالاباقشا سالىندى، حالىقتىڭ ورتاشا ءومىر ءسۇرۋ ۇزاقتىعى — 67 جاستان 73 جاسقا دەيىن ءوستى»، - دەدى سەناتور.

ە. سۇلتانوۆ اتاپ وتكەندەي، وسى جىلدار ىشىندە ەلىمىزدە 14500 شاقىرىم جول سالىندى جانە قايتا جوندەلدى.

«بۇل جاي جولدار ەمەس، بەتون جولدار، اۆتوباندار. بۇرىن بەس-التى ساعاتتا ەڭسەرىلگەن جولدى قازىر ەكى-ءۇش ساعاتتا ەڭسەرەمىز. 2500 شاقىرىم تەمىر جول سالىندى، كاسپي تەڭىزىندە ەكى پورت سالىندى. بۇل باعىتتى ساقتاۋ عانا ەمەس، دامىتۋ دا ماڭىزدى. اۆتوجول قۇرىلىسىنىڭ كەيبىر جوبالارىنا مەن ءوزىم قاتىستىم. تۇتاستاي العاندا، ەگەر تاۋەلسىزدىكتىڭ 30 جىلى ىشىندە تۇڭعىش پرەزيدەنت ەلباسىنىڭ باسشىلىعىمەن جۇزەگە اسىرىلعان تابىستى رەفورمالار مەن جەتىستىكتەر تۋرالى ايتاتىن بولساق، وندا ولاردى وتە ۇزاق ۋاقىت اتاپ وتۋگە بولادى. شىنىندا دا، بۇل تاريحي ولشەمدەر بويىنشا قىسقا مەرزىم، ءبىراق ەل وسى جىلدار ىشىندە ەگەمەندى دامۋ جولىندا ماڭىزدى قادامدار جاسادى جانە ايتارلىقتاي جەتىستىكتەرگە جەتتى.

مەنىڭ ويىمشا، ەلىمىزدىڭ ءاربىر ازاماتى ءۇشىن تۇڭعىش پرەزيدەنت كۇنىن مەرەكەلەۋدىڭ ماڭىزى زور. بۇل قازاقستانداعى حالىق بىرلىگى مەن كەلىسىم كۇنى. ەلىمىزدىڭ تۇڭعىش پرەزيدەنتى تاريحقا ەگەمەن قازاقستاننىڭ بارلىق جەتىستىكتەرىمەن بايلانىستى تۇلعا رەتىندە، بۇكىل قىزمەتى ءوز حالقىنا قىزمەت ەتۋدىڭ جارقىن ۇلگىسى بولىپ تابىلاتىن الەمدىك اۋقىمداعى كورنەكتى ساياساتكەر رەتىندە ماڭگىلىككە ەندى. قۇرمەتتى وتانداستار! سىزدەردى قازاقستان رەسپۋبليكاسىنىڭ تۇڭعىش پرەزيدەنتى كۇنىمەن شىن جۇرەكتەن قۇتتىقتايمىن!»، - دەدى ق ر پارلامەنتى سەناتىنىڭ دەپۋتاتى.