الەمدىك تۇلعالار نۇرسۇلتان نازاربايەۆقا جىلى لەبىزدەرىن بىلدىرۋدە

نۇر-سۇلتان. قازاقپارات - نۇرسۇلتان نازاربايەۆتىڭ اتىنا شەتەلدىك مەملەكەتتەر باسشىلارىنان، ەكس-پرەزيدەنتتەردەن، بۇرىنعى ۇكىمەت باسشىلارى مەن ساياسي قايراتكەرلەردەن، الىس-جاقىن شەت ەلدەردىڭ بيزنەس وكىلدەرىنەن حاتتار كەلىپ تۇسۋدە.

قازاقپارات بۇل تۋرالى ەلباسى سايتىنا سىلتەمە جاساپ حابارلايدى.

وزبەكستان رەسپۋبليكاسىنىڭ پرەزيدەنتى شاۆكات ميرزيەيەۆ ەلباسىعا مىقتى دەنساۋلىق، باقىت جانە ەل يگىلىگى جولىنداعى قىزمەتىنە مول تابىس، ال قازاقستان حالقىنا تىنىشتىق، باق-بەرەكە، ورنىقتى دامۋ جانە باقۋاتتىلىق تىلەدى.

«تۇڭعىش پرەزيدەنت كۇنى - كوپ ۇلتتى قازاقستان حالقىنىڭ تاريحي تاڭداۋى، بەيبىتشىلىك پەن تۇراقتىلىقتىڭ، ۇلت بىرلىگى مەن كەلىسىمىنىڭ ەرەكشە سيمۆولى. ءسىز ۇزاق جىل بويى ەلدىڭ كوشباسشىسى، بارلىق سالاداعى ءتيىمدى رەفورمالاردىڭ جانە تاۋەلسىز قازاقستاننىڭ عالامات جەتىستىكتەرىنىڭ نەگىزىن قالاۋشى، الەمدىك قوعامداستىق مويىنداعان جاھاندىق باستامالاردىڭ اۆتورى، تاجىريبەلى ءارى تانىمال ساياساتكەر، حالقىنا جانە تۋعان جەرىنە قىزمەت ەتۋدى ءوزىنىڭ قاستەرلى پارىزى سانايتىن بىلىكتى باسشى رەتىندە كوپشىلىككە تانىلىپ، ۇلكەن قۇرمەتكە يە بولدىڭىز»، - دەلىنگەن جەدەلحاتتا.

امەريكا قۇراما شتاتتارىنىڭ 66-مەملەكەتتىك حاتشىسى كوندوليزا رايس ءوز قۇتتىقتاۋىندا قازاقستاننىڭ قارقىندى دامۋىنداعى ەلباسىنىڭ ەرەكشە ءرولىن اتاپ ءوتتى.

«ءبىزدىڭ تۇڭعىش پرەزيدەنتىمىز دجوردج ۆاشينگتون امەريكالىق قۇندىلىقتاردى بولاشاقتا اتقاراتىن ىستەرىمىزدىڭ نەگىزىنە اينالدىرا ءبىلدى. ءسىز قازاقستان ءۇشىن دە ءدال وسىنداي يگى جۇمىس اتقاردىڭىز. ءسىزدىڭ يادرولىق قارۋدان باس تارتۋ جانە عاجاپ ەلوردانى سالۋدان باستاپ، بەيبىت ءترانزيتتى جۇزەگە اسىرۋ سياقتى شەشىمدەرىڭىز سوزىمە دالەل»، - دەلىنگەن جەدەلحاتتا.

تۇركيا رەسپۋبليكاسىنىڭ بۇرىنعى پرەزيدەنتى ابدۋللا گۇل ءوز قۇتتىقتاۋىندا قازاقستاننىڭ تۇڭعىش پرەزيدەنتىنىڭ جاس مەملەكەتتى قالىپتاستىرۋعا جانە حالىقارالىق ىنتىماقتاستىقتى نىعايتۋعا قوسقان ۇلەسىن اتاپ وتكەن.

«سىزگە زور دەنساۋلىق پەن باق- بەرەكە تىلەيمىن. قازاق حالقىنىڭ جارقىن بولاشاعىنا سەنىمدىمىن. قازاقستاننىڭ تۇركى الەمىندە الاتىن ورنى بولەك. قازاق- تۇرىك قاتىناسىنىڭ وركەندەي بەرۋىنە تىلەكتەسپىن»، - دەلىنگەن جەدەلحاتتا. ۇلىبريتانيانىڭ بۇرىنعى پرەمەر-ءمينيسترى توني بلەر قازاقستاننىڭ تۇڭعىش پرەزيدەنتىنىڭ تاۋەلسىز ەل تاريحىنداعى ماڭىزدى ءرولىن اتاپ وتكەن.

«ەلدىڭ تابىسى مەن تۇراقتىلىعى كوبىنە پرەزيدەنت نازاربايەۆتىڭ باسشىلىعىمەن بايلانىستى. قازاقستاندى كۇتىپ تۇرعان بارلىق قيىندىقتار مەن رەفورمالارعا قاراماستان، قازىرگى ۋاقىتتا مەملەكەت بولاشاققا نىق سەنىممەن قاراي الادى»، - دەدى ت. بلەر.

سونداي-اق نۇرسۇلتان نازاربايەۆقا جىلى لەبىزدەرى مەن قولداۋىن ەستونيا رەسپۋبليكاسىنىڭ ەكس- پرەزيدەنتى ارنولد ريۋيتەل، تاۋەلسىز مەملەكەتتەر دوستاستىعى اتقارۋ كوميتەتىنىڭ ءتوراعاسى - اتقارۋشى حاتشىسى سەرگەي لەبەديەۆ، ۇجىمدىق قاۋىپسىزدىك شارتى ۇيىمىنىڭ باس حاتشىسى ستانيسلاۆ زاس، ب ۇ ۇ بۇرىنعى باس حاتشىسى، جاسىل دامۋدىڭ جاھاندىق ينستيتۋتىنىڭ ءتوراعاسى پان گي مۋن، ەۋروپا قايتا قۇرۋ جانە دامۋ بانكىنىڭ ءبىرىنشى پرەزيدەنتى جاك اتتالي، يسپانيا ۇكىمەتىنىڭ بۇرىنعى باسشىسى حوسە ماريا اسنار، يتاليانىڭ ەكس-پرەمەر-ءمينيسترى رومانو پرودي، يتاليانىڭ بۇرىنعى سىرتقى ىستەر ءمينيسترى فرانكو فراتتيني، ا ق ش- تىڭ بۇرىنعى مەملەكەتتىك حاتشىسى كولين پاۋەلل، باستى يۋدەي ۇيىمدارى جەتەكشىلەرى كونفەرەنتسياسى ءتوراعاسىنىڭ ورىنباسارى مالكولم حەنلاينن، «Chevron Corporation» كومپانياسىنىڭ بۇرىنعى باسقارما ءتوراعاسى جانە باس ديرەكتورى كەن دەرر ءبىلدىردى.