ەلوردادا توعىز جىل سالىنعان «گرانت» تۇرعىن ءۇي كەشەنى پايدالانۋعا بەرىلدى

نۇر-سۇلتان. قازاقپارات - ەلوردادا قۇرىلىسى ۇزاققا سوزىلعان تاعى ءبىر نىسان پايدالانۋعا بەرىلدى، دەپ حابارلايدى قازاقپارات قالا اكىمدىگىنە سىلتەمە جاساپ.

ق ر تۇڭعىش پرەزيدەنتى كۇنى قارساڭىندا «گرانت» تۇرعىن ءۇي كەشەنى پايدالانۋعا بەرىلدى. بۇل ءۇي 2011-جىلى سالىنا باستاعان. بۇگىندە مۇندا بارلىق ينجەنەرلىك جەلى ۇيگە تارتىلدى، ەندى ولاردى قوسۋ ءۇشىن تۇرعىندار كەلىسىمشارتقا وتىرۋى قاجەت.

«قۇرىلىسى ۇزاققا سوزىلعان تۇرعىن ءۇي كەشەندەرىنە بارعان كەزدە ۇلەسكەرلەردىڭ قۇرىلىس بىتەتىنىنە سەنبەيتىنىن بايقادىق. الايدا قۇرىلىس جۇمىسى قايتا جاندانعان كەزدە تۇرعىنداردىڭ ءۇمىتى ويانا باستادى. ۇلەسكەرلەر قۇرىلىس جۇمىسىن تالقىلاۋعا ەتەنە ارالاستى. سونداي قۇرىلىستىڭ بىرىنە اينالعان «گرانت» (سارىارقا اۋدانى) تۇرعىن ءۇي كەشەنى بىلتىر جازدا مەن بارعان العاشقى ءۇيدىڭ ءبىرى. ماسەلە كوپ بولدى. ءۇيدىڭ ىرگەتاسىن قالاپ، قاسبەتىمەن اينالىسۋ قاجەت ەدى. سونىمەن بىرگە تەرەزە مەن ەسىك ورناتۋ، ىشكى ارلەۋ جۇمىسىنا كوشۋ كەرەك بولدى. ءۇيدىڭ قۇجاتىن دايىنداۋ، ينجەنەرلىك جەلىگە قوسۋ ماسەلەسى دە تۇردى. بۇل قولعا العان كوپ شارۋانىڭ ءبىر بولىگى عانا»، - دەپ جازدى قالا اكىمى التاي كولگىنوۆ.

بۇل ءۇيدى قۇرىلىس سالۋشى 2011-جىلى سالا باستادى، ال 2015 بۇل ءۇي پروبلەمالىق دەپ تانىلعان.

«ق ر تۇڭعىش پرەزيدەنتى كۇنى قارساڭىندا ءۇيدى پايدالانۋعا بەردىك. بارلىق ينجەنەرلىك جەلى ۇيگە تارتىلدى، ەندى ولاردى قوسۋ ءۇشىن تۇرعىندار كەلىسىمشارتقا وتىرۋى قاجەت. بۇل ۇيدە 170 وتباسى تۇرادى. قۇرىلىسى ۇزاققا سوزىلعان ۇيلەردىڭ قۇرىلىسىن اياقتاۋ ماسەلەسى مەملەكەت باسشىسىنىڭ باقىلاۋىندا. بىلتىر 10 ءۇيدىڭ قۇرىلىسىن اياقتاپ، پايالانۋعا بەرسەك، بىيىل 20 ءۇيدى اياقتاپ پايدالانۋعا بەرۋدى جوسپارلاپ وتىرمىز»، - دەدى قالا اكىمى.