جەتىساي اۋدانىندا «حالىقتىق كەڭسە» اشىلدى

تۇركىستان. قازاقپارات - تۇركىستان وبلىسى، جەتىساي اۋدانى اكىمدىگى عيماراتىنان تۇرعىندارعا كورسەتىلەر مەملەكەتتىك قىزمەتتەردىڭ ساپاسىن جاقسارتۋ مەن حالىقتىڭ تسيفرلىق ساۋاتتىلىعىن ارتتىرۋ ماقساتىندا «حالىقتىق كەڭسە» ورتالىعى اشىلدى.

سىبايلاس جەمقورلىقتىڭ الدىن الۋ ماقساتىندا اشىلعان ورتالىقتا ءبىر مەزگىلدە ازاماتتاردى قابىلداۋ، قۇقىقتىق كەڭەس بەرۋ، قولجەتىمدى ءارى ساپالى قىزمەت كورسەتۋ جۇمىستارى قاراستىرىلعان، دەپ حابارلايدى قازاقپارات ءتىلشىسى.

ورتالىقتىڭ سالتاناتتى اشىلۋ راسىمىنە سىبايلاس جەمقورلىققا قارسى ءىس- قيمىل اگەنتتىگىنىڭ تۇركىستان وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى ميراس قارعاباي مەن اۋدان اكىمىنىڭ ورىنباسارى اسان ماحانبەتوۆ، اۋدان پروكۋرورىنىڭ ورىنباسارى ماقسات ەراليەۆ قاتىستى. اۋدانداعى مەكەمە جانە ءبولىم باسشىلارىمەن كەزدەسۋ وتكىزگەن دەپارتامەنت ءتوراعاسىنىڭ ءبىرىنشى ورىنباسارى ەلدەگى سىبايلاس جەمقورلىققا قارسى اتقارىلىپ جاتقان جۇمىستار مەن ناتيجەلەرى جايىندا ايتىپ ءوتتى. زاڭدارعا ەنگىزىلگەن وزگەرىستەر مەن تولىقتىرۋلارعا توقتالدى. سىبايلاس جەمقورلىق تاۋەكەلدەرىن تالداپ، سالدارىن سارالادى. اتقارىلعان جۇمىستاردىڭ بارىسىن ارنايى دايىندالعان سلايدتارمەن ءتۇسىندىردى.

«بۇگىنگى كۇنى اگەنتتىكتىڭ باستاماسىمەن ەل اۋماعىندا مەملەكەتتىك ورگانداردىڭ جۇمىسى «Open space»فورماتىنا كوشىرىلۋدە. بۇل حالىققا بارىنشا قولايلى جاعداي تۋعىزىپ، اشىقتىق پەن جاريالىلىقتى، سونداي- اق، جۇمىس ساپاسىنىڭ ارتۋى مەن تۇتىنۋشىلاردىڭ كەدەرگىسىز قىزمەت الۋ مۇمكىندىكتەرىن قالىپتاستىرۋدا. بۇگىنگى اشىلعان ورتالىق جەتىسايلىقتارعا ءتيىمدى قىزمەت كورسەتىپ قانا قويماي، سىبايلاس جەمقورلىق فاكتىلەرىن ازايتۋعا ىقپال ەتەتىن بولادى»، دەدى ميراس قارعاباي.

جاڭا كەڭسەدە ازاماتتاردىڭ ءوز- وزىنە قىزمەت كورسەتۋ بۇرىشى دا بار. مەملەكەتتىك قىزمەتكە جۇگىنگەن كەز- كەلگەن تۇرعىن سول جەردە كورسەتىلگەن قىزمەت تۇرىنە اۆتوماتتى تۇردە باعا دا بەرە الادى. قانداي دا ءبىر قۇجات ءۇشىن ءار ءبولىمنىڭ ەسىگىن قاعىپ، ۋاقىتىن جوعالتاتىن تۇرعىندار ەندىگى كەزەكتە اۋرە- سارساڭعا سالىنباي، شارۋاسىن ءبىر عانا ورتالىقتان ءبىتىرىپ كەتۋىنە مۇمكىندىك جاسالعان. بۇل ءوز كەزەگىندە مەملەكەتتىك قىزمەتكە دەگەن حالىقتىڭ سەنىمىن ارتتىرىپ، ساپاسىن جاقسارتۋعا ۇلكەن سەپتىگىن تيگىزبەك.