سمارتفون نەگە قىزىپ كەتەدى؟

نۇر-سۇلتان. قازاقپارات - تەلەفوننىڭ ازداپ قىزعانى قالىپتى نارسە. الايدا قاتتى قىزا باستاسا، شارا قولدانۋ قاجەت.

گادجەتتىڭ قاتتى قىزۋىنان قۇرىلعى جارىلىپ كەتىپ، ادامدار جاپا شەگىپ جاتاتىن جايتتار از ەمەس. سمارتفوننىڭ نە سەبەپتى قىزىپ كەتەتىنىن انىقتاپ كورەيىك.

1. سمارفوندى تىم كوپ قولداناسىز

ءۇش ولشەمدى ويىندار، بەينەجازبا جانە اۋىر قوسىمشالاردى قولدانعاندا پروتسەسسور شامادان تىس جۇمىس ىستەيدى. ناتيجەسىندە قۇرىلعى تەك قىزىپ قانا قويماي، قۋاتىن تەز جوعالتادى. GPS، Wi-Fi, Bluetooth نەمەسە 4G سياقتى ناۆيگاتسيالىق جانە جەلىلىك تەحنولوگيالاردى بەلسەندى قولدانعاندا دا سول جاعداي.

نە ىستەۋ كەرەك: تەلەفوندى شامادان كوپ قولدانباۋعا تىرىسىڭىز. جەلىدەن ۇلكەن فايلداردى جۇكتەۋ، كامەرامەن جانە اۋىر باعدارلامالارمەن جۇمىس ىستەۋ ءۇشىن ءۇزىلىس جاساڭىز. قاجەت بولماعان كەزدە جەلىلىك جانە ناۆيگاتسيالىق مودۋلدەردى ءوشىرىڭىز.

2. گادجەتتە اياقتالماعان باعدارلامالار بار

ورناتىلعان ءبىر نەمەسە بىرنەشە قوسىمشالاردا قاتەلەر بار. سوندىقتان پروتسەسسور شامادان تىس جۇمىس ىستەيدى. ناتيجەسىندە كوبىرەك جىلۋ ءبولىنىپ، باتارەيا تەز «وتىرادى».

نە ىستەۋ كەرەك: ويىن، بەينە قىزمەتى نەمەسە باسقا رەسۋرستاردى قاجەت ەتەتىن باعدارلامامەن جۇمىس ىستەمگەن كەزدە تەمپەراتۋرا كوتەرىلسە، ونى ءوشىرىپ، باسقاسىن جۇكتەڭىز. سونداي- اق، جەكە باعدارلامالاردى جاڭارتۋعا كەدەرگى جاساماڭىز، ويتكەنى جاڭا نۇسقالاردا قاتەلەر تۇزەتىلۋى مۇمكىن.

3. قۇرىلعىعا سىرتقى فاكتور اسەر ەتەدى

سمارتفون كۇن ساۋلەسىنىڭ استىندا كوپ تۇرسا، ونى پايدالانعان كەزدە قاتتى قىزىپ كەتەدى. ونى كۇن ساۋلەسى تىكەلەي تۇسەتىن جەرگە نەمەسە جاستىقتىڭ استىندا قالدىرماۋ كەرەك.

نە ىستەۋ كەرەك: كۇن ىستىقتا سمارتفوندى كۇن استىندا قالدىرماڭىز. كامەرانىڭ نەمەسە باسقا قولدانبالاردىڭ قالتاڭىزدا جۇمىس ىستەۋىنە جول بەرمەۋ ءۇشىن ەكراندى قۇلىپتاۋدى ۇمىتپاڭىز. ەگەر سمارتفون ۇلكەن باعدارلامالاردى جۇكتەپ جاتسا ونى ەشقاشان قالتاڭىزعا سالۋعا تىرىسپاڭىز. ويىن ويناۋ كەزىندە تەلەفوننىڭ سىرتقى قورعانىش قابىن الىپ تاستاڭىز.

4. سمارتفوندى دۇرىس قۋاتتامايسىز

دۇرىس جۇمىس ىستەمەيتىن، ارزان قۋاتتاۋ قۇرىلعىسىن پايدالانۋ تەلەفوننىڭ تەز قىزۋىنا سەبەپ بولادى. سونداي- اق، سمارتفوندى توق كوزىنە قوسىپ قويىپ پايدالانعاندا قىزىپ، ءتىپتى ورتەنىپ كەتۋى مۇمكىن.

نە ىستەۋ كەرەك: كومپانيالار ءوزى كۋالاندىرعان ساپالى قۋاتتاۋ قۇرىلعىلارىن پايدالانعان ءجون. ەگەر قۋاتتاۋ سىمى زاقىمدالسا، اۋىستىرىڭىز. قۋاتتاۋ كەزىندە گادجەتكە ەنەرگيانى كوپ قاجەت ەتەتىن ويىندار مەن «اۋىر» پروتسەستەردى قولدانباۋعا تىرىسىڭىز، ونداي كەزدە قۇرىلعى ەكى ەسە قىزىپ كەتەدى.

5. گادجەتتىڭ وپەراتسيالىق جۇيەسىندە اقاۋ بار

قۇرىلعىنىڭ تەمپەراتۋراسى وپەراتسيالىق جۇيەدەگى اقاۋدان دا كوتەرىلىپ كەتۋى مۇمكىن. سونىمەن بىرگە ۋاقىت وتە كەلە قاجەت ەمەس فايلدار مەن باسقا باعدارلامالىق قوقىستار جينالادى، بۇلار دا قىزۋعا ىقپال ەتەدى.

نە ىستەۋ كەرەك: الدىمەن قۇرىلعىنى ءوشىرىپ، قايتا قوسىڭىز جانە جۇيەنىڭ سوڭعى نۇسقاعا جاڭارتىلعانىنا كوز جەتكىزىڭىز. ەگەر ەشتەڭە وزگەرمەسە، ماڭىزدى دەرەكتەردى الدىن الا ساقتاي وتىرىپ، تەلەفوندى تازالاڭىز.

massaget.kz