قازاقستاندىق «ۇلبولسىن» فيلمى تالليندە وتكەن كينوفەستيۆالدە جۇلدەگەر اتاندى
بۇل جايىندا فيلمنىڭ رەجيسسەرى ءادىلحان ەرجانوۆ Instagram پاراقشاسىندا ءمالىم ەتتى. «بىرنەشە كۇن بۇرىن تالليندە وتكەن «قاراڭعى تۇندەر» كينوفەستيۆالىندە ءبىزدىڭ «ۇلبولسىن» اتتى فيلمىمىزدىڭ الەمدىك پرەمەراسى ءوتتى. ال كەشە فەستيۆالدىڭ جابىلۋ سالتاناتىندا ول «ۇزدىك ازيالىق فيلم» اتالىمىندا جەڭىمپاز اتاندى» دەپ جازادى ءادىلحان ەرجانوۆ.
«ۇلبولسىن» فيلمى جايلى اقپارات كينوفەستيۆالدىڭ Twitter پاراقشاسىندا دا جاريالاندى. ايتا كەتەيىك، كارتينانىڭ باستى كەيىپكەرى - قالادا تۇراتىن ۇلبولسىن. ونىڭ ءسىڭلىسى اجار قاراتاس اۋىلىنداعى مەكتەپتى ەندى عانا ءبىتىردى. ۇلبولسىن سۇيىكتى ءسىڭلىسىنىڭ بولاشاعىن جوسپارلاپ قويعان. ول اجاردى بەدەلدى شەتەلدىك ۋنيۆەرسيتەتكە ءتۇسىرۋ ءۇشىن جەتكىلىكتى اقشا جينادى، بۇل قىزدىڭ بولاشاقتاعى مانسابىنا جانە ەركىن جانە تاۋەلسىز بولۋىنا مۇمكىندىك بەرەدى. الايدا ول قاراتاسقا كەلگەندە قىزدى جەرگىلىكتى ەمشى، حالىق اراسىندا وتە بەدەلدى كىسى ۇرگەننىڭ توقال ەتۋ ءۇشىن الىپ قاشىپ كەتكەنىن كورەدى. ۇلبولسىن بۇعان كوندىگۋگە بولمايتىنىن ءتۇسىنىپ، قاراتاستىڭ پاتريارحالدى الەمىمەن كۇرەسۋگە بەل بۋادى.