بوكستان ايەلدەر اراسىندا قازاقستان چەمپيوندارى بەلگىلى بولدى

نۇر- سۇلتان. قازاقپارات - شىمكەنت قالاسىندا بوكستان ايەلدەر اراسىندا قازاقستان چەمپيوناتى مارەگە جەتتى، دەپ حابارلايدى قازاقپارات ءتىلشىسى.

يوردانيادا وليمپيادا جولداماسى ءۇشىن وتكەن تۋرنيردە قازاقستاننان جالعىز جولدامانى ۇتىپ العان قوستانايلىق نادەجدا ريابەتس 75 ك گ سالماقتا لوندون وليمپياداسىنىڭ قولا جۇلدەگەرى، ەلوردالىق مارينا ۆولنوۆامەن قولعاپ ءتۇيىستىردى. رينگكە بەس جىلعى ۇزىلىستەن كەيىن قايتا ورالعان قازاقستاننىڭ ەڭبەك سىڭىرگەن سپورت شەبەرى م. ۆولنوۆا 31-دە بولسا، قارسىلاسى ودان باقانداي 11 جاسقا كىشى ەدى. بۇل باسەكەدە تورەشىلەر جەڭىستى ءبىراۋىزدان ن. ريابەتسكە بەردى.

شىمكەنتتىك فاريزا شولتاي مەن قاراعاندىلىق ۆيولەتتا كنيازيەۆا 81 ك گ سالماقتا چەمپيوندىق اتاقتى ساراپقا سالدى. مۇندا ف. شولتاي قازىلاردىڭ ءبىراۋىزدان شەشىمىمەن جەڭىمپاز اتاندى. اسا اۋىر سالماقتا (81 ك گ جوعارى) ەلوردالىق، 2016 -جىلعى الەم چەمپيونى ءلاززات كۇنگەيبايەۆا مەن تاعى ءبىر شىمكەنتتىك دينا يسلامبەكوۆا شارشى الاڭعا شىقتى. ءلاززات 32-گە تولسا، 20 جاستاعى دينا جاستار اراسىندا الەم بىرىنشىلىگىندە توپ جارعان بولاتىن. ل. كۇنگەيبايەۆا 4:1 ەسەبىمەن كەزەكتى رەت ەل چەمپيونى اتاندى.

وسىلايشا ايەلدەر اراسىندا بارلىق جەڭىمپازدار بەلگىلى بولدى. ەرلەر اراسىندا فينالدىق باسەكە باستالدى.

اۆتور: ەلجان ەرالى