ازەربايجان حالقىنا قاراباقتاعى مينادان تازارتىلماعان جەرلەرگە بارۋ قاۋىپتى ەكەنى ەسكەرتىلدى

باكۋ. ازەرتادج - قازاقپارات - ازەربايجان باس پروكۋراتۋراسى مەن ەلدىڭ ىشكى ىستەر مينيسترلىگى بىرلەسكەن مالىمدەمە جاسادى.

ولار تاۋلى قاراباق ايماعى جارىلعىش زاتتان تولىق تازارتىلىپ، رۇقسات بەرىلگەنگە دەيىن ول جاققا بارۋعا بولمايتىنىن ەسكەرتەدى، دەپ حابارلايدى قازاقپارات ازەرتادج اقپارات اگەنتتىگىنە سىلتەمە جاساپ.

بىرلەسكەن مالىمدەمەدە ايتىلعانداي، ۇزاق جىلداردان بەرى اتامەكەنىن كورمەگەن ازەربايجاندىقتاردىڭ سەزىمىن تۇسىنۋگە بولادى. الايدا كەي ازاماتتار جاسالعان ەسكەرتۋگە قاراماستان جاۋدان بوساتىلعان جەرگە ءوز بەتىنشە بارىپ جاتىر. 28 -قاراشادا 4 ازامات فيزۋلي اۋدانىنا قاراستى گورگان جانە اشاعى اۋىلدارىنىڭ اراسىندا مينالانعان جەر بار دەگەن ەسكەرتۋگە قۇلاق اسپاي، 90-BL-558 ءنومىرلى Toyota Land Cruizer كولىگىمەن ساپارىن ءارى قاراي جالعاستىرا بەرگەن. سالدارىنان تانككە قارسى قويىلعان مينا جارىلىپ، تورتەۋى دە قازا تاپتى.

وسىعان بايلانىستى ەلدىڭ ىشكى ىستەر مينيسترلىگى مەن باس پروكۋراتۋرا حالىققا تاعى دا ەسكەرتۋ جاسادى. جاۋدان بوساتىلعان اۋماققا ارنايى رۇقساتسىز بارۋعا بولمايدى. ول ايماقتار مينا جانە باسقا دا جارىلعىش زاتتان تولىق تازارتىلعان كەزدە عانا رۇقسات بەرىلەدى.