ەلوردادا ماس جۇرگىزۋشى اۆتوبۋستى سوقتى

نۇر- سۇلتان. قازاقپارات - 26- قاراشادا ءۋاليحانوۆ پەن بوگەنباي كوشەسىنىڭ قيىلىسىندا كوپىردەن وتە بەرگەندە «لادا» اۆتوكولىگىنىڭ جۇرگىزۋشىسى ماس كۇيىندە مارشرۋتتىق اۆتوبۋستى سوققان، دەپ حابارلايدى قازاقپارات قالالىق پ د باسپا ءسوز قىزمەتىنە سىلتەمە جاساپ.

بۇل كەزدە جولاۋشىلار اۆتوبۋسى وڭعا قاراي بۇرىلىستا تۇرىپ، باستى باعىتتا ءوتىپ بارا جاتقان كولىكتەرگە جول بەرگەن. اپات سالدارىنان اۆتوبۋس جولاۋشىلارى زارداپ شەككەن جوق.

انىقتالعانداي، «لادا» جەڭىل اۆتوكولىگىنىڭ جۇرگىزۋشىسى 2016 -جىلدان بەرى تەمىر تۇلپاردى ماس كۇيىندە جۇرگىزگەنى ءۇشىن كولىك قۇرالىن باسقارۋ قۇقىعىنان ايىرىلعان. الايدا، وسى ۋاقىت ىشىندە جازانى ەلەمەي، ءۇشىنشى رەت ءرولدى ماس كۇيىندە تىزگىندەگەنى ءۇشىن پوليتسيانىڭ قولىنا تۇسكەن. مەديتسينالىق تەكسەرۋدەن وتكەننەن كەيىن ناركولوگتىڭ قورىتىندىسى جۇرگىزۋشىنىڭ ورتاشا دارەجەدە ماس بولعانىن راستادى. قازىرگى ۋاقىتتا اتالعان فاكتى بويىنشا ق ر قىلمىستىق كودەكسىنىڭ 346-بابى، 2-تارماعى بويىنشا قىلمىستىق ءىس قوزعالدى، جۇرگىزۋشى قامالدى.

اۆتور: اياۋلىم التىنبەك