دانيار ەلەۋسىنوۆ بۇرىنعى الەم چەمپيونىن تەحنيكالىق نوكاۋتپەن جەڭدى

نۇر- سۇلتان. قازاقپارات - بوكستان ريو وليمپياداسىنىڭ چەمپيونى، قازاقستاندىق كاسىپقوي بوكسشى دانيار ەلەۋسىنوۆ (9-0، 5 ك و) كەزەكتى جەكپە- جەگىندە جەڭىسكە جەتتى، دەپ حابارلايدى قازاقپارات.

امەريكانىڭ فلوريدا شتاتىنداعى Seminole Hard Rock Hotel & Casino ارەناسىندا ءوتىپ جاتقان بوكس كەشىندە دانيار ەلەۋسىنوۆ بۇرىنعى الەم چەمپيونى دجۋليۋسو يندونگومەن (23-2، 12 ك و) جەكپە- جەككە شىقتى. قوس بوكسشى العاشقى راۋندتى بىردەن قارقىندى باستادى. ارادا از ۋاقىت وتكەندە قازاقستاندىق بوكسشى قارسىلاسىن ءبىر رەت نوكداۋنعا ءتۇسىردى.

ەكىنشى راۋندتا يندونگو ساق قيمىلداي باستادى. ەلەۋسىنوۆ شابۋىلىن باسەڭدەتپەي، قارسىلاسىن تاعى دا نوكداۋنعا ءتۇسىردى. وسىلايشا، قارسىلاس جەكپە- جەكتەن باس تارتىپ، قازاقستاندىق بوكسشى جەڭىسكە جەتتى. سونداي- اق، ەلەۋسىنوۆ IBF Intercontinental تيتۋلىن يەلەندى. دانيار ەلەۋسىنوۆ جەكپە- جەكتەن كەيىنگى سۇحباتىندا جەڭىسكە وڭاي قول جەتكىزگەنىن جانە ۇلكەن ايقاستاردى اسىعا كۇتەتىنىن جەتكىزدى.

اۆتور: مۇحتار قاليموللا ۇلى