اتىراۋ وبلىسىندا ءيت تالاعان ءسابيدىڭ جاعدايى جاقساردى

اتىراۋ. قازاقپارات - اتىراۋ وبلىسىندا ءيت تالاپ اۋرۋحاناعا تۇسكەن ەكى جاسار بالا ۇيىنە شىعارىلدى، دەپ حابارلايدى قازاقپارات.

وڭىرلىك دەنساۋلىق ساقتاۋ باسقارماسىنىڭ باسپا ءسوز قىزمەتىنەن ءمالىم ەتكەندەي، وبلىستىق بالالار اۋرۋحاناسىندا ەم قابىلداعان ەكى جاسار ءسابيدىڭ جاعدايى جاقساردى. اتالمىش اۋرۋحانانىڭ دارىگەر- تراۆماتولوگى جاقسىلىق ماعزوموۆتىڭ ايتۋىنشا، 2 جاسار ءسابي اۋرۋحانانىڭ جاراقات بولىمىندە اپتا بويى ەم الدى.

«تاڭىلعان جارا ورىندارى جازىلعان سوڭ، تىگىستەرىن الدىق. بالانىڭ باس سۇيەگىن كومپيۋتەرلىك توموگرافياعا تۇسىردىك. قازىرگى ۋاقىتتا بالا ۇيىندە. حيرۋرگيالىق وڭدەۋ ورىندارىنا ءۇي جاعدايىندا اناسى كۇتىم جاساپ تۇرادى. ۋچاسكەلىك دارىگەردىڭ باقىلاۋىندا بولادى»، - دەدى ەمدەۋشى دارىگەر جاقسىلىق ماعزوموۆ.

ەسكە سالايىق، 18- قاراشا كۇنى اتىراۋ قالاسىنداعى جۇلدىز ىقشاماۋدانىندا 2018 -جىلى تۋعان بالانى ءيت تالاعان بولاتىن. ءسابي دەرەۋ اۋرۋحاناعا جەتكىزىلدى. اتىراۋ وبلىسىندا 15-22 - قازان ارالىعىندا 9 بالانى ءيت قاپقان.