قىتاي پارلامەنتىنىڭ سپيكەرى: نۇرسۇلتان نازاربايەۆ- حالىقارالىق قوعامداستىقتاعى بەدەلدى ساياساتكەر

نۇر- سۇلتان. قازاقپارات - قىتايدىڭ بۇكىل قىتايلىق حالىق وكىلدەرى جينالىسى تۇراقتى كوميتەتىنىڭ ءتوراعاسى لي جانشۋ ەلباسى نۇرسۇلتان نازاربايەۆتىڭ حالىقارالىق دەڭگەيدەگى جوعارى بەدەلىن جانە ونىڭ ەلىمىزدەگى تاريحي ءرولى تۋرالى ايتتى.

بۇل تۋرالى قازاقپارات ءماجىلىستىڭ باسپا ءسوز قىزمەتىنە سىلتەمە جاساپ حابارلايدى. كونفەرەنسيا قاتىسۋشىلارىنا ءسوز ارناعان لي جانشۋ تۇڭعىش پرەزيدەنت، ەلباسى نۇرسۇلتان نازاربايەۆتىڭ مەملەكەتتى قالىپتاستىرۋ، ونىڭ ساياسي جۇيەسىن جەتىلدىرۋ جانە تۇراقتىلىقتى قامتاماسىز ەتۋ جولىنداعى ەرەن ەڭبەگىنە توقتالدى.

«تۇڭعىش پرەزيدەنت نازاربايەۆ - حالىقارالىق قوعامداستىقتاعى بەدەلدى ساياساتكەر بولۋمەن قاتار، قىتاي حالقىنىڭ تىلەۋلەس دوسى رەتىندە ۇزاق ۋاقىتتان بەرى قىتايلىق- قازاقستاندىق تاتۋ كورشىلىك جانە دوستىق ىنتىماقتاستىقتى نىعايتىپ، قىتايدا جوعارى بەدەلگە يە بولىپ كەلەدى»- دەدى قىتاي پارلامەنتىنىڭ سپيكەرى.

لي جانشۋ قوس ەل اراسىنداعى پارلامەنتارالىق ءوزارا ءىس- قيمىل دەڭگەيىن جوعارى باعالاپ، ونىڭ ەكى ەل حالقىنا دا ءتيىمدى ەكەنىنە توقتالدى. سونىمەن قاتار، تۇراقتى كوميتەتتىڭ ءتوراعاسى ق ح ر بۇكىل قىتايلىق حالىق وكىلدەرى جينالىسىنىڭ قىتاي مەن قازاقستان اراسىنداعى ستراتەگيالىق ارىپتەستىك جان- جاقتى دامىتۋ ماقساتىندا ق ر پارلامەنتى ماجىلىسىمەن ىنتىماقتاستىقتى تەرەڭدەتۋگە دايىن ەكەندىگىن جەتكىزدى.