سەناتور جەتىسۋ جەرىندەگى تاريحي قاپال اۋىلىن ساقتاۋ ماسەلەسىن كوتەردى
وندا جەتىسۋ جەرىندە، ۇلى جىبەك جولىنىڭ بويىندا ورنالاسقان، تاريحى تەرەڭنەن تامىر تارتاتىن قاپال اۋىلىنىڭ بۇگىنگى جاي-كۇيىنە قاتىستى ماسەلە كوتەرىلگەن، دەپ حابارلايدى قازاقپارات ءتىلشىسى.
باقىتجان جۇماعۇلوۆ قاپالدىڭ ىرگەسى بەكىنىس رەتىندە 1847 -جىلى قالانعانىمەن، شەجىرەسى سوناۋ تۇركى داۋىرىنە، قيماق مەملەكەتىنە بارىپ تىرەلەتىنىن ايتتى. سەناتور اتالعان دەرەكتەردى تىزبەكتەي كەلە، قازاقستاننىڭ قاسيەتتى جەرلەرىنىڭ كارتاسى دايىندالىپ جاتقان قازىرگى كەزدە وسىنداي سان عاسىرلىق تاريحى بار ورىندار ەسكەرۋسىز قالماسا ەكەن دەگەن ۇسىنىسىن ايتتى. «ەلباسىمىزدىڭ «ۇلى دالانىڭ جەتى قىرى» اتتى ماقالاسىنان كەيىن رەسپۋبليكا بويىنشا قاسيەتتى ورىندار ىرىكتەلىپ جاتىر. بۇل تاريحىمىزدى تانۋعا، تۋعان ولكەمىزدىڭ عاجايىپ جەرلەرىن ايقىنداۋعا مۇمكىندىك بەرەدى»، - دەدى باقىتجان جۇماعۇلوۆ.
سونىمەن قاتار سەناتور بەكىنىس رەتىندە سالىنا باستاعان كەزەڭدە، ياعني وسىدان ەكى عاسىر بۇرىن تۇرعىزىلعان نىسانداردى ساقتاپ قالۋ ماسەلەسىنە دە نازار اۋداردى.
«XIX عاسىردىڭ ەسكەرتكىشى بولىپ سانالاتىن ۇيلەردىڭ بەت جاعى عانا ساقتالىپتى. ەسكى ەكى مەشىت ءۇيى قاراۋسىز قالىپ، قۇلاعان. اۋىلدىڭ رۋحاني ورتالىعى بولعان اقىن سارا مەن فاتيما عابيتوۆا مۋزەيلەرىنىڭ ءىزى دە جوق. ونداعى قۇندى ەكسپوناتتار قايدا؟»، - دەگەن باقىتجان جۇماعۇلوۆ بۇل جەرگىلىكتى حالىقتىڭ جانايقايى ەكەنىن ايتتى.
وسىعان وراي سەناتور پرەمەر-مينيستردەن ساۋلەتشىلەر، تاريحشىلار، ادەبيەتشىلەر، ەتنوگرافتاردان تۇراتىن ارنايى كوميسسيا قۇرۋدى، قاپال اۋىلىنىڭ مادەني-تاريحي ەسكەرتكىشتەرىن قورعاۋ ءۇشىن ءتيىستى شارالار قابىلداۋدى جانە ولاردى ۇكىمەت قورعاۋىنداعى ساناتتار قاتارىنا قوسۋدى سۇرادى.
