مۇمكىندىگى شەكتەۋلى ازاماتتارعا ارناۋلى جاردەماقى مولشەرى ۇلعايتىلادى - پرەزيدەنت

نۇر-سۇلتان. قازاقپارات - مۇمكىندىگى شەكتەۋلى ازاماتتارعا بەرىلەتىن ارناۋلى جاردەماقى ەڭ تومەنگى كۇنكورىس دەڭگەيىنىڭ 1,4 ەسە كوبەيتىلگەن مولشەرىنە دەيىن بولادى.

بۇل تۋرالى Nur Otan پارتياسىنىڭ كەزەكتەن تىس XX سەزىندە ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.

«تۇراقتى كۇتىمگە مۇقتاج جانە جەكە كومەكشى قىزمەتىن پايدالانبايتىن 1-توپتاعى مۇمكىندىگى شەكتەۋلى ازاماتتاردىڭ بارلىعىنا قوسىمشا الەۋمەتتىك قولداۋ كورسەتىلەدى. وسىعان وراي بەرىلەتىن ارناۋلى جاردەماقى ەڭ تومەنگى كۇنكورىس دەڭگەيىنىڭ 1,4 ەسە كوبەيتىلگەن مولشەرىنە دەيىن بولادى. الداعى 5 -جىل ىشىندە ءبىز ەرەكشە كۇتىمدى قاجەت ەتەتىن ادامداردى ارناۋلى تەحنيكالىق قۇرالدارمەن قامتاماسىز ەتەمىز. سونداي- اق ولارعا تولىقتاي وڭالتۋ- ساۋىقتىرۋ قىزمەتى ۇسىنىلادى. ءبىراق، ەڭ باستىسى ءار ادامعا تابىس تابۋ مۇمكىندىگىن بەرۋ كەرەك. بۇل رەتتە ءبىز ناقتى شارالار قابىلدايمىز»، - دەدى ق ر پرەزيدەنتى.

مەملەكەت باسشىسىنىڭ ايتۋىنشا، سونىڭ ناتيجەسىندە 2025 -جىلعا قاراي مۇمكىندىگى شەكتەۋلى ازاماتتاردى جۇمىسپەن قامتۋ كورسەتكىشى 30 پايىزعا جەتەدى.

«وسىنداي جانداردىڭ كاسىبي قىزمەتپەن اينالىسۋمەن بىرگە ءبىلىم الۋىنا دا جاعداي جاساۋ ماڭىزدى. 5 جىل ىشىندە كوللەدجدەر مەن جوعارى وقۋ ورىندارى ينكليۋزيۆتى ءبىلىم بەرۋ ۇدەرىسىمەن تولىق قامتىلادى. سونىمەن قاتار مەكتەپكە دەيىنگى بارلىق مەكەمەلەر مەن مەكتەپتەردە بۇل كورسەتكىشتى كەزەڭ- كەزەڭمەن 70 پايىزعا دەيىن جەتكىزەمىز»، - دەدى قاسىم-جومارت توقايەۆ.

اۆتور: مارلان جيەمباي