ۋكراينا ازاماتى اقمولالىق پوليتسەيلەرگە العىس ايتتى
اقمولا وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، بيىلعى 18-قاراشا كۇنى تۇندە «نۇر-سۇلتان - ەرەيمەنتاۋ - شىدەرتى» اۆتوجولىنىڭ 58-شاقىرىمىندا فۋرگوندا ەلەكتر قۇرىلعىسى ىستەن شىققان. وسىنىڭ سالدارىنان كولىك جارىقسىز قالىپ، جۇرگىزۋشى توقتاۋعا ءماجبۇر بولعان. ازىق-تۇلىك تيەلگەن كولىك نۇر-سۇلتان قالاسىنان پاۆلودارعا ءجۇرىپ بارا جاتقان. بىرنەشە ساعات قاڭتارىلىپ جولدىڭ شەتىندە تۇرعان كولىكتى اقمولا وبلىستىق پ د جول-پاترۋل پوليتسيا روتاسىنىڭ ينسپەكتورلارى، پوليتسيا لەيتەنانتى تورعايەۆ باتىر-بايان مەن پوليتسيا لەيتەنانتى تۇرار نۇرعازى كورىپ، كومەككە كەلگەن. ءتارتىپ ساقشىلارى قاتتى توڭىپ، جاۋراعان كولىك جۇرگىزۋشىسىن قىزمەتتىك اۆتوكولىكتە جىلىندىرىپ، تاماقتاندىرعان. ارتىنشا كولىگىن جوندەۋگە كومەكتەسىپ، تاڭەرتەڭ جولعا شىعارىپ سالدى. كولىك جۇرگىزۋشىسى ۋكراينا ەلىنىڭ ازاماتى اناتولي دوراش قازاقستان رەسپۋبليكاسىنىڭ پوليتسيا قىزمەتكەرلەرىنە بەينەۇندەۋ جولداپ، العىس ايتتى. وندا ۋكراينالىق جۇرگىزۋشى اقمولا ءتارتىپ ساقشىلارىنىڭ ادامگەرشىلىگىن ەرەكشە اتاپ ءوتتى.