ءبىز اۆتورلىق قۇقىقتى قورعاۋمەن ەمەس، شىعارماشىلىقپەن اينالىسۋىمىز كەرەك - روزا رىمبايەۆا
ءانشىنىڭ ايتۋىنشا، مەملەكەتتەردىڭ مادەني دامۋىنداعى قۇقىقتاردى ۇجىمدىق باسقارۋدىڭ ماڭىزى زور. بۇل ۇيىمداردىڭ ءتيىمدى قىزمەتى اۆتورلىق قۇقىق پەن ساباقتاس قۇقىقتاردىڭ جاڭا وبەكتىلەرىن قۇرۋ ءۇشىن قولايلى جاعداي جاسايدى.
سونىمەن قاتار، ول انشىلەر ورىندايتىن بارلىق شىعارمالار اۆتورلىق قۇقىقتى قورعاۋمەن بەلگىلەنۋى كەرەكتىگىن ايتتى. ال، سول اۆتورلىق قۇقىق ماسەلەلەرىن مامانداندىرىلعان ۇيىم شەشۋى كەرەك. «ءبىز شىعارماشىلىقتىڭ ادامدارىمىز، ءبىز ءوز قۇقىعىمىزدى باسقارا المايمىز، ياعني ءار قولدانۋشىمەن كەلىسىمشارت جاساۋعا ۋاقىتىمىز جوق. ياعني، انشىلەر ەڭ الدىمەن، شىعارماشىلىقپەن، رەپەرتۋارمەن، گاسترولدىك ساپارمەن، كونسەرت وتكىزىمەن اينالىسۋىمىز كەرەك. ءبىز اۆتورلىق قۇقىقتى قورعاۋمەن وعان تۇسەتىن اقشانى ەسەپتەۋمەن، ياعني قارجى ماسەلەسىمەن اينالىسپاۋىمىز كەرەك. مۇنىڭ بارلىعى ورىنداۋشىلاردىڭ، اۆتورلاردىڭ، كومپوزيتورلاردىڭ، اقىنداردىڭ اۆتورلىق قۇقىعىن قورعاۋمەن تىكەلەي اينالىساتىن ۇجىمدارعا قاتىستى. ءبىز ءوز قۇقىعىمىزدى ءوزىمىزدىڭ وكىلىمىز بولاتىن ۇجىمدىق ۇيىمدارعا بەرەمىز. اۆتورلىق جانە ساباقتاس قۇقىقتاردى ۇجىمدىق باسقارۋدىڭ ماڭىزدىلىعى وسىندا»، - دەدى روزا رىمبايەۆا.
سونىمەن قاتار، قازاقستاندىق ءانشى وزگەنىن ءانىن رۇقساتسىز كوشىرىپ جانە ونى ورىنداۋ - ۇرلىق دەپ سانايدى.
«بىزدە كوشىرۋ دەگەن بولماۋى كەرەك. ەگەر شىعارمانى بەلگىلى ءبىر ورىنداۋشىعا جازسا، ءبىراق ونى باسقا بىرەۋ كوشىرىپ الىپ ورىندايتىن بولسا، وندا بۇل ۇرلىق. بۇل ناعىز اۆتورلىق قويىلىم بولۋى كەرەك. مەنىڭ ويىمشا، بۇل ەڭ الدىمەن تۋىندىنىڭ يەسى اۆتورلىق قۇقىعىمەن قورعالۋى كەرەك»، - دەپ ءبولىستى ول.
اۆتور: الما مۇقانوۆا