بۇزىلعان كولىككە كومەككە كەلگەن تارازدىق پوليتسەيلەر تۋرالى ۆيدەو تارادى

تاراز. قازاقپارات - تارازدا پوليتسەيلەر بۇزىلعان كولىكتىڭ جۇرگىزۋشىسىنە كومەكتەسكەندىگى تۋرالى ۆيدەو الەۋمەتتىك جەلىدە كەڭىنەن تارالىپ، كوپشىلىكتىڭ ىقىلاسىنا يە بولدى، - دەپ حابارلايدى قازاقپارات ءتىلشىسى.

Instagram جەلىسىندە تارازدىق پاترۋلدىك پوليتسيا قىزمەتكەرلەرىنىڭ كولىگى جولدا بۇزىلىپ قالعان جۇرگىزۋشىگە كومەكتەسكەنى تۋرالى ۆيدەو تاراعان بولاتىن.

وبلىستىق پوليتسيا دەپارتامەنتىنىڭ باسپا ءسوز قىزمەتىناى مالىمەتىنشە، كۇندىزگى پاترۋلدەۋ كەزىندە تولە بي مەن جەلتوقسان كوشەلەرىنىڭ قيىلىسىندا تاراز قالاسىنىڭ پ ب پ پ ب قىزمەتكەرلەرى توقتاپ تۇرعان Toyota Camry كولىگىن بايقايدى.

كولىك جۇرگىزۋشىسى بىرنەشە رەت جولدان شىعىپ كەتۋگە تىرىسقانىمەن، كولىكتى قوزعالتا الماعان. وسى ساتتە جۇرگىزۋشىنىڭ جانىنا ءتارتىپ ساقشىلارىنىڭ قىزمەتتىك كولىگى كەلىپ توقتايدى. كولىگىنىڭ جۇرمەيتىنىنە كوزى جەتكەن جۇرگىزۋشى پوليتسەيلەردى كورىپ قۋانىپ كەتەدى. اۆتوكولىكتى جۇرگىزۋشىمەن بىرگە جولدىڭ شەتىنە يتەرىپ شىعارعان وفيتسەرلەر ونىڭ بەنزينى تاۋسىلعانىن انىقتاعان. پوليتسەيلەر قولايسىز اۋا رايىن ەسكەرە وتىرىپ، بىردەن جانارماي قۇيۋ بەكەتىنە بارىپ، قاجەتتى جانارماي اكەلىپ بەرەدى. ءوز كەزەگىندە اۆتوكولىك يەسى پوليتسيا قىزمەتكەرلەرىنە كورسەتىلگەن كومەك ءۇشىن ريزاشىلىعىن ءبىلدىرىپ، قىزمەتىنە ساتتىلىك تىلەدى. «قازىر كۇن سۋىق، بىرنەشە كۇننەن بەرى قار جاۋىپ تۇر، توقتاپ تۇرعان كولىك جول اپاتىن تۋدىرۋى مۇمكىن. پاترۋلدەۋ كەزىندە قينالىپ تۇرعان جۇرگىزۋشىنى بايقادىق. دەرەۋ كومەك كورسەتۋ تۋرالى شەشىم قابىلدادىق. ءبىزدى بىرەۋ ۆيدەوعا ءتۇسىرىپ، الەۋمەتتىك جەلىگە تاراتادى دەپ مۇلدە ويلامادىق. ءبىز تەك قولدان كەلگەنشە كومەكتەسۋگە تىرىستىق. جولدا ماشينانىڭ بۇزىلىپ قالۋى ءجيى كەزدەسەدى، ءبىز ءارقاشان كومەكتەسۋگە دايىنبىز»، - دەپ اتاپ ءوتتى ساقشىلار.

اۆتور: سايا سەمباي