اتىراۋدا وقۋشىلار ساباق اراسىنداعى ۇزىلىستە اباي اندەرىن شىرقايدى

اتىراۋ. قازاقپارات - اتىراۋدا وقۋشىلار ۇزىلىستە اباي اندەرىن شىرقايدى، دەپ حابارلايدى قازاقپارات.

وبلىستىق ءبىلىم باسقارماسى باسپا ءسوز قىزمەتىنىڭ اقپاراتىنا سۇيەنسەك، ماقات اۋدانىنداعى 2№ باستاۋىش مەكتەبىندە ۇلى ويشىل ابايدىڭ 175 جىلدىق مەرەيتويى اياسىندا ارنايى كابينەت اشىلعان.

مەكتەپتىڭ دالىزىنە كاراوكە، 3 ەكران، 8 دىبىس زورايتقىش قويىلعان. وقۋشىلار ءۇزىلىس كەزىندە اباي اندەرىن شىرقايدى.

«بالالارمەن قارىم-قاتىناس اشىق ديالوگ الاڭىنا نەگىزدەلىپ وتىر. وقۋشىلار ارنايى جاساقتالعان تاقتاعا بوس ۋاقىتتا نەمەن اينالىسقىسى كەلەتىنى تۋرالى جازادى. بالالار تاراپىنان تۇسكەن ۇسىنىستار نەگىزىندە مەكتەپ دالىزىنە كاراوكە ورناتتىق. بۇل ءادىس وقۋشىلاردىڭ مەكتەپتە وزدەرىن ەركىن سەزىنۋىنە ىقپال ەتۋدە»، - دەيدى ماقات كەنتىندەگى 2№ باستاۋىش مەكتەبىنىڭ ديرەكتورى رۋسلان بايمۇقاشيەۆ.

ونىڭ ايتۋىنشا، باستاۋىش مەكتەپتە ءداستۇرلى بىلىممەن بىرگە وقۋشىلارعا ۇلتتىق تاربيە بەرىلەدى. وسىعان وراي بىرنەشە كابينەتتەر اشىلعان.

«ماسەلەن، ۇلتتىق تاربيە كابينەتى حالقىمىزدىڭ داستۇرىنە، تاريحىنا نەگىزدەلگەن ساباقتارعا ارنالىپ وتىر. كابينەتتە قازاقتىڭ ماقال- ماتەلدەرى، ىرىم-تىيىمدارى ىلىنگەن. ۇلتتىق ويىندار تۋرالى تانىمدىق ماتەريالدار دا بار. بۇل كابينەتتە سىنىپ جەتەكشىلەرى وقۋشىلارعا ۇلتتىق قۇندىلىقتار تۇرعىسىندا ءدارىس وتكىزەدى»، - دەيدى مەكتەپ ديرەكتورى.

سونداي-اق، مەكتەپتە ولكەتانۋ كابينەتى دە بار. وندا ءداستۇرلى ساباقپەن بىرگە، وقۋشىلارعا اۋداننىڭ الەۋمەتتىك- ەكونوميكالىق، قوعامدىق، رۋحاني دامۋىنا ۇلەس قوسقان ازاماتتار، جالپى، ولكە تاريحى تۋرالى اقپاراتتار بەرىلەدى.

«مۇندا وقۋشىلارعا ەنتسيكلوپەديالىق دەرەكتەر، ءوڭىردىڭ ونەگەلى ازاماتتار تۋرالى جان- جاقتى مالىمەتتەر بەرىلەدى. ال، اباي كابينەتىندە ۇلى اقىننىڭ شىعارمالارىن ناسيحاتتاۋمەن بىرگە، ول تۋرالى تىڭ دەرەكتەر ۇسىنىلادى»، - دەيدى رۋسلان بايمۇقاشيەۆ.

ماقات اۋدانىنداعى 2№ باستاۋىش مەكتەبى 80 وقۋشىعا ارنالعان. قازىر مۇندا 203 وقۋشى وقيدى. ءبىلىم ورداسىندا باستاۋىش سىنىپتاردان بولەك، 37 شاعىن ورتالىق، 22 مەكتەپالدى دايارلىق توبى جۇمىس ىستەيدى.