وڭەشىنە ينە تۇرىپ قالعان تارازدىق امان قالدى
تاراز قالالىق كوپبەيىندى اۋرۋحاناسىنا اياق استىنان وكپەسى شانشىپ، اۋا جەتىسپەي، قينالعان 27 جاستاعى ب. ەسىمدى ايەل ادام كەلىپ ءتۇستى. ونىڭ ايتۋىنشا، بىرەر كۇننەن بەرى ءوزىن ناشار سەزىنە باستاعان. قالا سىرتىندا تۇراتىن ول العاشىندا اۋرۋىنا ءمان بەرمەي، ورتالىققا قاتىناۋدى قيىن كورىپ، جازىلىپ كەتەر دەگەن سەنىممەن جۇرە بەرگەن. ۋاقىت وزعان سايىن تاماعىنان اس وتپەي، وڭەشىندە بوگدە زات تۇرعانداي اسەر العان سوڭ عانا اۋرۋحاناعا كەلگەن.
تاراز قالالىق كوپبەيىندى اۋرۋحاناسىنىڭ دارىگەرلەرى شۇعىل تۇردە ناۋقاستى رەنتگەنوگرافياعا ءتۇسىرىپ، تاماعىندا ينە تۇرعاندىعىن انىقتايدى. ناۋقاس ينە جۇتىپ قويعانىن ءوزى دە بايقاماعان. حيرۋرگيا ءبولىمىنىڭ مەڭگەرۋشىسى، ەندوسكوپيست- حيرۋرگ راحىمجان عابيدەن كوپ ويلانباستان، ادامنىڭ ىشكى ورگاندارىن ارنايى اسپاپ ارقىلى تەكسەرۋ ادىسىمەن جاسالاتىن ەندوسكوپيالىق وتا جاساۋعا شەشىم قابىلداعان.
«بوگدە زاتتى بايقاماي جۇتىپ قوياتىن نەمەسە ەرىكسىز ىشكە ءتۇسىپ كەتەتىن مۇنداي جاعدايلار - تۇرعىندار اراسىندا كوپ كەزدەسەدى. كوپ جاعدايدا، نەرۆ تالشىقتارىنا تيمەسە، مۇنداي ارەكەتتەر العاشىندا ادامدى اسا مازالامايدى. ءبىراق، بوگدە زات اعزاعا وزدىگىنەن ءسىڭىپ نەمەسە شىعىپ كەتپەيدى. سوندىقتان، مۇنداي جاعدايعا جول بەرمەۋگە تىرىسۋ كەرەك»، - دەيدى راحىمجان عابيدەن.