قازاقستاندا سيفرلىق ۆاليۋتانى ەنگىزۋ ماسەلەسى قاراستىرىلۋدا
حالىقارالىق ەسەپتەر بانكى جۇرگىزگەن ساۋالنامانىڭ 2020 -جىلدىڭ باسىنداعى مالىمەتىنە سايكەس،СBDC بويىنشا جۇمىستى (زەرتتەۋ جۇرگىزۋدەن باستاپ، پيلوتتىق جوبالاردى ىسكە اسىرۋعا دەيىن) ورتالىق بانكتەردىڭ ساۋالنامادان وتكەن % 80 جۇرگىزگەن.
«الەمدەگى كوپتەگەن ورتالىق بانكتەر ءۇشىن تولەم جۇيەلەرىن سيفرلىق ترانسفورماتسيالاۋ وتە وزەكتى سانالادى. قازاقستان ۇلتتىق بانكى باسقا ەلدەردىڭ 28 ورتالىق بانكىمەن بىرگە سيفرلىق ۆاليۋتالار بويىنشا نەگىزگى حالىقارالىق زەرتتەۋ توبىنىڭ جۇمىسىنا قاتىسادى. ۇلتتىق بانك ماماندارى حالىقارالىق ەسەپتەر بانكىمەن جانە حالىقارالىق ۆاليۋتا قورىمەن بىرلەسە وتىرىپ، سيفرلىق ۆاليۋتانى رەتتەۋ تاسىلدەرىن زەردەلەي باستادى»، - دەپ حابارلادى بانكتەن.
سونىمەن قاتار ءمالىم ەتىلگەندەي، قازاقستان ۇلتتىق بانكى قىتاي حالىق رەسپۋبليكاسىندا، وڭتۇستىك- شىعىس ازيانىڭ ءبىرقاتار ەلىندە، كانادادا، سينگاپۋردا جانە ەۋروپالىق وداقتا سيفرلىق ۆاليۋتانى ەنگىزۋ جونىندەگى پيلوتتىق جوبالاردىڭ باقىلاۋشىسى بولىپ تابىلادى.
«قازىر ءارتۇرلى تەحنولوگيالىق ينفراقۇرىلىم مەن رەتتەۋ تاسىلدەرى ەسكەرىلەتىن قازاقستان رەسپۋبليكاسىندا سيفرلىق ۆاليۋتانى ەنگىزۋدىڭ ءارتۇرلى سسەنارييىنە ارنالعان بايانداما ازىرلەنىپ جاتىر. بايانداما 2021 -جىلدىڭ ەكىنشى جارتىسىندا جاريالانادى. بۇدان كەيىن قۇجات مۇددەلى مەملەكەتتىك ورگاندارمەن، حالىقارالىق قارجى ۇيىمدارىمەن، نارىق قاتىسۋشىلارىمەن جانە ساراپشىلارمەن تالقىعا ءتۇسىپ، سودان كەيىن قازاقستان رەسپۋبليكاسىندا ورتالىق بانكتىڭ سيفرلىق ۆاليۋتاسىن كەزەڭ- كەزەڭىمەن ەنگىزۋ بويىنشا پيلوتتىق جوبا ىسكە اسىرىلادى»، - دەپ اتاپ ءوتتى بانكتەن.
CBDC تەحنولوگياسى ەل اۋماعىندا تولەمدەردىڭ تيىمدىلىگى مەن قولجەتىمدىلىگىن ودان ءارى جەتىلدىرۋ ءۇشىن قولما- قول اقشامەن جانە قولما- قول اقشاسىز تولەمدەردىڭ ارتىقشىلىقتارىن بىرىكتىرۋگە ءتيىس. بۇل رەتتە سيفرلىق ۆاليۋتا تولەم ينفراقۇرىلىمىن ءارتاراپتاندىرۋعا ارنالعان. پيلوتتىق كەزەڭنىڭ قورىتىندىسى بويىنشا CBDC قىتايدا، جاپونيادا، كانادادا جانە ەۋروپالىق وداق ەلدەرىندە تەستىلەۋدەن وتۋدە. CBDC رەسمي دەڭگەيدە ەنگىزۋ رەسەي فەدەراتسياسىندا قاراستىرىلىپ جاتىر.
اۆتور: الما مۇقانوۆا