«دارىن» سىيلىعىنىڭ بيىلعى يەگەرلەرى انىقتالدى

None
None
نۇر-سۇلتان. قازاقپارات - ق ر ۇكىمەتى 2020 -جىلعى «دارىن» مەملەكەتتىك جاستار سىيلىعىنىڭ جەڭىمپازدارىن جاريالادى، دەپ حابارلايدى قازاقپارات ءتىلشىسى.

اتالعان سىيلىق جەمىستى عىلىمي، شىعارماشىلىق، قوعامدىق قىزمەتى مەن جوعارى سپورتتىق جەتىستىكتەرى ءۇشىن بەرىلەدى.

«ەسترادا» نوميناتسياسى بويىنشا سىيلىق ت. ق. جۇرگەنوۆ اتىنداعى قازاق ۇلتتىق ونەر اكادەمياسىنىڭ ستۋدەنتتەرى بولسانبەك ءداريا وڭالعازى قىزى جانە كەنىشقاليەۆ بەكسۇلتان تالعات ۇلىنا بەرىلدى.

«كلاسسيكالىق مۋزىكا» اتالىمىندا قازاق ۇلتتىق ونەر ۋنيۆەرسيتەتىنىڭ وقىتۋشىسى دۇيسەمبايەۆ قالقامان باعدات ۇلى جانە اتالعان ۋنيۆەرسيتەت ستۋدەنتى جىبەك قانات قىزى مۇسىرعاليەۆا ۇزدىك دەپ تانىلدى.

«حالىق شىعارماشىلىعى» نوميناتسياسى بويىنشا ق ر مادەنيەت جانە سپورت مينيسترلىگىنىڭ «قازاقكونتسەرت» مەملەكەتتىك كونسەرتتىك ۇيىمى» ر م ك ءسوليسى مۇقيات اسقار جانە قىزىلوردا وبلىستىق فيلارمونياسى ك م ك ءارتىسى كۇنسۇلۋ تۇرىكپەن قىزى تۇرىكپەن ماراپاتتالدى.

«ادەبيەت» نوميناتسياسى بويىنشا «ادەبيەت پورتالى» ينتەرنەت جوباسىنىڭ قىزمەتكەرى ارمان ماناربەك ۇلى شەريزاتوۆ وزىپ شىقتى.

«تەاتر جانە كينو» نوميناتسياسى بويىنشا ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ اكتەرى سەرىكوۆ ءابىلمانسۇر ءابدىناسىر ۇلى جانە حاديشا بوكەيەۆا اتىنداعى وبلىستىق قازاق دراما تەاترىنىڭ اكتەرى جاسقايرات ءسابيت ۇلى ۆاليۋلليەۆ جەڭىمپاز اتاندى. «سپورت» اتالىمىندا ق ر ۇلتتىق وليمپيادا كوميتەتىنىڭ فريستايل بويىنشا نۇسقاۋشى- سپورتشىسى يۋليا ەۆگەنەۆنا گالىشەۆا جانە جەڭىل اتلەتيكا جانە پاۋەرليفتينگ بويىنشا پاراليمپيادالىق سپورتشى، «TSG contruction» ج ش س وندىرىستىك- تەحنيكالىق ءبولىمى ينجەنەرىنىڭ كومەكشىسى جىگەر مالىك ۇلى كەنجەعاليەۆ جۇلدە الدى.

«ديزاين جانە بەينەلەۋ ونەرى» نوميناتسياسى بويىنشا زەرگەر، قازاقستان قولونەرشىلەر وداعىنىڭ مۇشەسى ارداق وتانعالي ۇلى ابىشەۆ جانە «Zeken Moda» ج ش س باس ديزاينەرى اقبوتا جولداسبەك قىزى توقتاسىنوۆا ماراپاتتالدى.

«جۋرناليستيكا» نوميناتسياسى بويىنشا «حابار» اگەنتتىگى ا ق «حابار 24» تەلەارناسىنىڭ جۋرناليسى مىڭبايەۆ راۋان ەرۇزاق ۇلى جانە «قازاقستان» رەسپۋبليكالىق تەلەراديوكورپوراتسياسى» ا ق ماڭعىستاۋ وبلىستىق فيليالىنىڭ جەتەكشى رەداكتورى سارتبايەۆا اسەم باقىت قىزى توپ جاردى. «قوعامدىق قىزمەت» نوميناتسياسى بويىنشا قازاقستان حالقى اسسامبلەياسى «» جاڭعىرۋ جولى» رەسپۋبليكالىق جاستار قوزعالىسىنىڭ ءتوراعاسى سپوتكاي ماكسيم الەكساندروۆيچ جانە «قازاقستان جاستارىنىڭ كونگرەسى» قاۋىمداستىعى ز ت ب اتقارۋشى ديرەكتورى بولىسوۆ توقتار كوممۋنار ۇلى ماراپات الدى.

«عىلىم» نوميناتسياسى جۇلدەسىن ق ر ءبىلىم جانە عىلىم مينيسترلىگى «م. ءا. ايتقوجين اتىنداعى مولەكۋليارلىق بيولوگيا جانە بيوحيميا ينستيتۋتى» ش ج ق ر م ك عىلىمي قىزمەتكەرى مۇقاتايەۆ جۇسىپبەك ەركىن ۇلى جانە «نازاربايەۆ ۋنيۆەرسيتەتى» دەربەس ءبىلىم بەرۋ ۇيىمىنىڭ دوكتورانتى ءاشىموۆا اسەم نۇرجان قىزى يەلەندى.

اۆتور: ايجان سەرىكجان قىزى

سوڭعى جاڭالىقتار