شەكارادان زاڭسىز ءوتۋدىڭ جاڭا تۇرلەرى پايدا بولدى

نۇر- سۇلتان. قازاقپارات - قازاقستاننىڭ مەملەكەتتىك شەكاراسىن كارانتيندىك شەكتەۋلەر كەزىندە زاڭسىز كەسىپ ءوتۋدىڭ جاڭا تۇرلەرى پايدا بولدى.

مۇنداي اقپاراتتى ق ر ۇلتتىق قاۋىپسىزدىك كوميتەتىنىڭ باسپا ءسوز قىزمەتى ۇسىنىپ وتىر، دەپ حابارلايدى قازاقپارات ءتىلشىسى.

ماسەلەن، وتكەن اپتادا «قاراسۋ» اۆتوموبيل وتكىزۋ پۋنكتتەرىندە مەملەكەتتىك شەكارانى زاڭسىز كەسىپ ءوتۋدىڭ 8 ارەكەتىنە توسقاۋىل قويىلدى: جامبىل وبلىسى - 1 فاكتى، ماڭعىستاۋ وبلىسى - 1 فاكتى، اقتوبە وبلىسى - 1 فاكتى، س ق و - 1 فاكتى، قوستاناي وبلىسى - 2 فاكتى، پاۆلودار وبلىسى - 2 فاكتى.

«جۇرگىزۋشىلەر حالىقارالىق جۇك تاسىمالىنىڭ شەكارادان وتۋىنە نەگىز بولاتىن ەكىنشى جۇرگىزۋشى رەتىندە جالعان جۇرگىزۋشى كۋالىكتەرىن قولدانا وتىرىپ، شەكارانى زاڭسىز كەسىپ وتۋگە تىرىسقان. اتالعان بارلىق جاعدايدا ق ر قىلمىستىق كودەكسىنىڭ «جالعان قۇجاتتاردى، ءمورتابانداردى، مورلەردى، بلانكىلەردى، پوشتا تولەمىنىڭ مەملەكەتتىك بەلگىلەرىن، مەملەكەتتىك ناگرادالاردى قولدان جاساۋ، دايىنداۋ نەمەسە وتكىزۋ» تۋرالى 385-بابىندا كوزدەلگەن قىلمىس بەلگىلەرى بويىنشا تەكسەرۋ ماتەريالدارى مەن كولىك قۇرالدارى ۋاكىلەتتى ورگاندارعا بەرىلدى»، - دەلىنگەن تاراتىلعان اقپاراتتا.

سونىمەن قاتار 18- قاراشادا «قاراسۋ» (جامبىل وبلىسى)، «جايساڭ» (اقتوبە وبلىسى)، «جاڭا جول» جانە «قاراقوعا» (س ق و) وتكىزۋ پۋنكتتەرىندە جالعان قۇجاتتار مەن سايكەستەندىرۋ نومىرلەرى بار اۆتوموبيلدەردى شەكارا ارقىلى زاڭسىز وتكىزۋدىڭ 4 ارەكەتىنىڭ جولى كەسىلگەن. جالپى، كارانتيندىك شەكتەۋلەر كەزەڭىندە مەملەكەتتىك شەكارانى زاڭسىز كەسىپ ءوتۋ ءۇشىن جالعان جۇرگىزۋشى كۋالىكتەرىن پايدالانعان 113 ادام (قازاقستان – 51، قىرعىزستان – 30، وزبەكستان – 20، تاجىكستان – 7، ر ف - 5)، جالعان مەديتسينالىق انىقتامالارى بار 35 ادام، سونداي- اق قازاقستاندىق مەديتسينالىق مەكەمەلەردەن جالعان شاقىرۋلارى بار 42 شەتەلدىك انىقتالدى.