كارانتيندە «تۇساۋ كەسەر»، «بەتاشار» جاساعان ەلوردالىقتار انىقتالدى

نۇر- سۇلتان. قازاقپارات - ەلوردا تۇرعىندارى كارانتيندىك رەجيمنىڭ شەكتەۋ شارالارىن ەلەمەي، مەيرامحانالاردا وتباسىلىق جيىنداردى وتكىزۋدى جالعاستىرۋدا، دەپ حابارلايدى قازاقپارات ءتىلشىسى.

«وتكەن دەمالىس كۇندەرى موبيلدى توپ كاسىپكەرلىكتىڭ 404 نىسانىن تەكسەرىپ، كارانتيندىك رەجيمدى بۇزۋدىڭ 34 فاكتىسىن انىقتالدى»، - دەپ اتالىپ وتكەن قالالىق پوليتسيا دەپارتامەنتى مالىمەتىندە.

موبيلدىك توپ قۇرامىنداعى پوليتسەيلەر كۇن سايىن رەيدتىك شارالاردى جۇرگىزىپ، ەرەجە بۇزعانداردى انىقتاپ جاتىر. 21 - قاراشا كۇنى «الاشا» مەيرەمحاناسىندا «تۇساۋ كەسەر» تويىنا ارناپ داستارحان جايىلعان. بۇل شاراعا 50-دەن استام قوناق جينالدى. سونىمەن قاتار، وتكەن سەنبىدە «New Stars» مەيرامحاناسىندا «بەتاشار» وتباسالىق شاراسى ۇيىمداستىرىلىپ، وعان 70-تەن استام مەيمان كەلگەن.

قوناقتار الەۋمەتتىك قاشىقتىقتى ساقتاماي ورنالاستىرىلعان. قالالىق پوليتسيا دەپارتامەنتىنىڭ مالىمەتىنشە، مەيرامحانا يەلەرى مەن قوناقتارى ادامداردىڭ كوپتەپ جينالۋى وزدەرىنىڭ دەنساۋلىعىنا، سونداي- اق وتباسى مۇشەلەرىنە، ياعني قارتتار مەن بالالاردىڭ دەنساۋلىعىنا قاتەر تۋدىراتىنىن تۇسىنبەي جاتىر. ولارعا قاتىستى ماتەريال جيناقتالىپ، اكىمشىلىك جاۋاپكەرشىلىككە تارتۋ ءۇشىن ءتيىستى مەكەمەگە جولداندى.

اۆتور: رۋسلان عابباسوۆ