پرەزيدەنت قاراعاندىداعى ءبىرقاتار سپورت نىسانىن ارالادى
قازاقستان پرەزيدەنتى قاراعاندى قالاسىنداعى جاڭادان سالىنعان تەننيس ورتالىعىنىڭ جۇمىسىمەن تانىستى. ورتالىقتا ءبىر مەزگىلدە 650 بالا جاتتىعا الادى. نىساننىڭ ينفراقۇرىلىمى الەمنىڭ ەڭ وزىق ستاندارتتارىنا ساي كەلەدى. مۇندا 11 كورت بار، ونىڭ 7 جابىق. سونىمەن قاتار جالپى جانە ارنايى دەنە شىنىقتىرۋ جۇمىستارىنا ارنالعان زالدار بار. قاسىم- جومارت توقايەۆقا ورتالىقتىڭ تەحنيكالىق جابدىقتالۋى تۋرالى ەگجەي- تەگجەيلى باياندالدى.
اتاپ ايتقاندا، ورتالىق ATP/WTA Challenger دەڭگەيىندەگى الەمنىڭ ۇزدىك 100 ويىنشىسى قاتىساتىن حالىقارالىق جانە رەسپۋبليكالىق تەننيس جارىستارىن وتكىزۋگە، سونداي- اق، وتاندىق سپورتشىلاردىڭ كاسىبي شەبەرلىگىن شىڭداۋعا مۇمكىندىك جاسالعان. - قالا ومىرىندەگى وسىنداي ماڭىزدى نىساننىڭ پايدالانۋعا بەرىلۋىمەن قۇتتىقتايمىن. ءبىز قازىر بۇقارالىق سپورتتى دامىتۋدى ماقسات ەتىپ وتىرمىز. مىنا سپورت ورتالىعى بارلىق بالالاردىڭ ۇلكەن تەننيسپەن شۇعىلدانىپ، دەنساۋلىعىن كۇشەيتۋگە مۇمكىندىك بەرەدى. بۇل كوپجاقتى ءارى ىڭعايلى نىسان. وسى مۇمكىندىكتى پايدالانا وتىرىپ، قازاقستان تەننيس فەدەراتسياسىنىڭ پرەزيدەنتى بولات ءجامىش ۇلى وتەمۇراتوۆقا ريزاشىلىعىمدى بىلدىرەمىن، - دەدى مەملەكەت باسشىسى.
ورتالىقتىڭ جالپى كولەمى 7,8 مىڭ شارشى مەتردى قۇرايدى. وندا ءماجىلىس زالى مەن 2 كافەتەري جانە قوناق ءۇي كەشەنى بار. شاھار شارۋاشىلىعىن دامىتۋدىڭ ۇزدىك الەمدىك تاجىريبەلەرىنە سايكەس تەننيس ورتالىعىنىڭ اينالاسىنداعى 1,5 گەكتار اۋماق تولىعىمەن اباتتاندىرىلىپ، كوگالداندىرىلعان. نىسان قۇرىلىسىنا جەكە ينۆەستورلار 2,4 ميلليارد تەڭگە كولەمىندەگى قاراجات سالعان. قازاقستاننىڭ تەننيس فەدەراتسياسى ورتالىقتى ادىستەمەلىك تۇرعىدان قامتاماسىز ەتىپ، وپەراتسيالىق باسقارۋ قىزمەتىن ۇيلەستىرەدى. سونىمەن قاتار قازاقستان پرەزيدەنتى ۇستەل تەننيسى ورتالىعىنىڭ جۇمىسىمەن تانىستى.
جاڭادان اشىلعان سپورت نىسانىندا 18 ۇستەلگە ارنالعان ويىن زالى، 9 تەننيس ۇستەلى ورنالاسقان جاتتىعۋ زالى، مەديتسينا جانە ماسساج كابينەتتەرى، جاتتىعۋ زالى، اكىمشىلىك عيماراتى، تورەشىلەر مەن باپكەرلەردىڭ بولمەلەرى، ءماجىلىس زالى مەن VIP- ورىندار بار. زاماناۋي ۇستەل تەننيسى ورتالىعىنىڭ اشىلۋى وقۋ- جاتتىعۋ جۇمىستارىن ساپالى وتكىزۋدى قامتاماسىز ەتۋگە، سونداي- اق، رەسپۋبليكالىق جانە حالىقارالىق دەڭگەيدەگى جارىستاردى جوعارى دەڭگەيدە وتكىزۋگە مۇمكىندىك بەرەدى. بۇل ءوز كەزەگىندە ەل سپورتشىلارىنىڭ شەبەرلىگىن شىڭداۋعا ىقپال ەتەدى.
ورتالىقتا كۇنىنە 400 ادام ۇستەل تەننيسىن ويناي الادى. مەملەكەت باسشىسى بۇقارالىق سپورتتى دامىتۋدىڭ، دەنە شىنىقتىرۋمەن جانە سپورتپەن اينالىساتىن حالىقتىڭ سانىن ارتتىرۋدىڭ ماڭىزدىلىعىن اتاپ ءوتتى. سونىمەن قاتار پرەزيدەنت اتالعان ورتالىقتىڭ سالاۋاتتى ءومىر سالتىن ناسيحاتتاۋعا، ايماقتاعى ۇستەل تەننيسىمەن شۇعىلداناتىن ادامداردىڭ قاتارىن ارتتىرۋعا جانە ونى دامىتۋعا زور ىقپال ەتەدى دەپ سەنىم ءبىلدىردى.
- بۇل تەك جاتتىعىپ قانا قويماي، حالىقارالىق جارىس وتكىزۋگە بارلىق جاعداي جاسالعان ادەمى ورتالىق ەكەن. ۇستەل تەننيسىنىڭ پرەزيدەنتى دانيار ابىلعازينگە، قاراعاندى وبلىسىنىڭ اكىمى جەڭىس قاسىمبەككە، قازاقستاننىڭ ۇستەل تەننيسىنەن باس باپكەرى ەلميرا الييەۆاعا العىس ايتقىم كەلەدى. بولاشاقتا ۇلكەن جەڭىسكە جەتەسىزدەر دەپ ۇمىتتەنەمىن. كوپ جاتتىقساڭىزدار، جەتىستىك تە مول بولادى، - دەدى قاسىم- جومارت توقايەۆ.
ورتالىق قۇرىلىسىنا قازاقستان رەسپۋبليكاسىنىڭ ۇستەل تەننيسى فەدەراتسياسى 1 ميلليارد 950 ميلليون تەڭگە قارجى جۇمساعان. بيىل قاراعاندى وبلىسىندا 85 سپورت نىسانى پايدالانۋعا بەرىلەدى دەپ جوسپارلانعان.
